ǃKhūb ge ǃgareǀuiba xu ǁgam-e ra ǂoaxa kai
(Numeri 20:1-13)1 Hoaraga ǀhûhâsib Israelǁîn dib ge Sinǃgaroǃhūba xu dāǁnâ tsî ǃKhūb ge ǁîna mîmā khami, ǃkhaisa xu ǃkhais kōse gere ǃgû. ǁÎn ge Refidims tawa sī hâǃkhaiba ge ǂnaumâi, xawe i ge ǁnāpa āǁgam-e ge ǀkhai i. 2 ǁNā-amagan ge khoena Moseb ǀkha ge ǂkhaba: “Ā da nî ǁgam-e mā da!”
Ob ge Moseba ge ǃeream: “Tare-e du tita ǀkha ra ǂkhababa? Tare-i ǃaroma du ǃKhūba ra ǃâitsâ?”
3 Khoen ge kaisen ge ǁgâsa i xui-ao ǁkhawa Moseb ai ǁîn di ǂkhîoǃnâsiba ge gowaǂui: “Sida, sida ôan, sida ǀgoan tsî goman tsînats nî ǁgâǁō kaisets ge Egipteba xu ǂoaxa-ū da?”
4 Moseb ge ǃKhūba ge ǀkhoma: “Tare-e ta nē khoen ǀkha nî dī? ǁÎn nî ǀuiǁhomǃan te ǁaeb ǀguib ge go ǃgau.”
5 Ob ge ǃKhūba Moseb ǃoa ge mî: “ǀNî ǂgaeǂgui-aogu Israelǁîn diga ūsao, î khoena aimâba. ǁKhāti Nylǃābats ge ǂnau-ū ǀkharub tsîna ūsao. 6 Mû, tita ge sa aiǃâ Sinaiǃhommi di ǃgareǀuib ai nî ǃâumâ tsi. Tsîts ge sa ǀkharub ǀkha ǃgareǀuib ai nî ǂnau, o i ge ǁgam-e ǁnāpa xu nî ǂoaxa tsîn ge khoena nî ā.” Moseb ge Israelǁîn di ǂgaeǂgui-aogu ra mûse mîbaheb ge khami ge dī.
7 Moseb ge nē ǃkhaiba Masa tsî Meriba ti ge ǀonǂgai, Israelǁîn ge ǃKhūb ǀkha ǂkhaba tsî ǁîba nēti ǃâitsâ xui-ao: “ǃKhūba amase sida ǀkhab hâb a?”
Amalekǁîn ra ǃkhamdanhe
8 Amalekǁîn ge Israelǁîna Refidims tawa sī ge ǁnāǂam. 9 Ob ge Moseba Josuab ǃoa ge mî: “ǀNî khoega ǁhûiǂuiba ge, î ǃgû tsî Amalekǁîna ǁari sī ǁnāǂam. Ti ǀkharub Elob ge ūsao kai teba ǃomǁae ūhâse ta ge ǃnâub ai nî ǃâumâ.” 10 Josuab ge Moseb ge mîmā bi khami ǃgû tsî Moseb, Aronni tsî Huri tsîgu ǃnâub ai ra ǂoa hîa, Amalekǁîna ge ǁnāǂam. 11 Moseb ǁîb ǃomma ūkhâi hâs kōsen ge Israelǁîna gere dan, xaweb ga Moseba ǃomma âba ūǁnâ, on ge Amalekǁîna gere dan. 12 Moseb ǃomma ge ǁkhamatsoatsoa, o kha ge Aronni tsî Hur hâkha Moseb nî ǂnû-aise ǀui-e ge ǀkhī-ū. ǁÎkha ge Moseb di amǀkhāb tsî ǁareǀkhāb tsîkha ai mâ tsî Moseb ǃomma sores nî ǂgâs kōse ǂgōse ge ǃkhōmâi. 13 ǁNā ǀgaub aib ge Josuaba Amalekǁîna ge ǃkhamdan.
14 ǁNās khaoǃgâb ge ǃKhūba Moseba ge mîmā: “Nē dansa ǂâiǂâisens ase xoamâi, î ǃgari dommi ǀkha Josuaba mâti ta Amalekǁîna hoaragase ǃhūbaiba xu nî hîkākā ǃkhaisa mîba.” 15 Tsîb ge Moseba altarsa ǁnāpa ǂnubi tsî ǁîsa “ǃKhūb ge tita dansa ra mā,” ti ge ǀonǂgai. 16 ǁÎb ge ǃaruǀî ge mî: “ǃKhūb di dans ǃkhauba ǀgapise ūhâ! ǃKhūb ge Amalekǁîn ǃoagu ǀamosib kōse nî ǃkham.”
© Khoekhoegowab Elobmîs © Bible Society in Namibia, 2020.
