Mateub 16 - Khoekhoegowab New Translation 2020 (KKG20)

Buruxa sao-e ǂgaoǀkhās

1 Tsî ǀnî Farisegu* tsî Sadusegu* tsîgu ge Jesub ǃoa ǃâitsâ bi nîse hā tsî ǁîba ǀhomma xu hâ sao-e gere ǂgaoǀkhā. [2 Ob ge Jesuba “Sores ǂgâb aib ga ǀhommi-aiba a ǀapa, o go ge ra mî: ‘ǁArikam tsēs ǂoab tsî ǀnanub di mâsib ge nî ǃgâi.’ 3 Xawe ǃnauǁgoagas ga soresa ǂoaxa tsîb ga ǀhommi-aiba ǀapa tsî a ǃkhae, o go ge ra mî: ‘ǁGaoǂoab tsî ǁaixa ǀnanub ge nētsē nî hā.’ ǂOab tsî ǀnanub tsîn di mâsiba go ge ǀhommi ai kōǃapas ǀkha a ǀhae ǁkhā, xawe go ge nētsē ra ī xūn di saode khomai tsî a ǁnâuǃā ǁoa!] 4 ǂKhabaxa tsî ǃgamekhôaxa surib ge sao-e ra ǂhâba, xawen ge sao-e māhe tide, Jonab di saos ǀguis ose.”

ǁNās khaoǃgâb ge Jesuba ǁîga ǁnāxū tsî ge ǃgûbē.

Farisegu tsî Sadusegu di khūkhū-i

(Markub 8:14-21)

5 Tsî huriroba gu ge ǃgâutoas khaoǃgâ ǀgui gu ge ǁkhāǁkhāsabega* ge pūǃnoa pere-e ūsa gu go ǀurusa. 6 Tsîb ge Jesuba ǁîga ge mîba: “ǂAnbasen, Farisegu tsî Sadusegu khūkhū-i khami ī gu xa.”

7 O gu ge ǁkhāǁkhāsabega nē ǃkhais xa ǁîǃnābe ge mîbagu: “Pere-e ge ūsao tama hâ xui-aob ge nēna ra mî.”

8 Xaweb ge Jesuba ge ǂan i tare-e gu ra ǂâisa tsî ǁîgu ǃoa ge mî: “Sa ǂkhariǂgomxago! Tare xū-i ǃaroma go pere-i di ǀkhais xa ǁnātikōse ra ǂhanihe? 9 Ganupe go kha ǁnâuǃā tama hâ? ǀNai go kha koroǀoadisi khoen di ǂûmāhesa ǀuru hâ tsî ǁnā ǀharudi, ǃgau ge ǃâron koro peregu din xa ge ǀoadi xa? 10 Tsî hakaǀoadisi khoegu di hû peregu tsî mâtikō ǀharude go ge ǀoaǀoasa? 11 Tare xū-i ǃaroma go pere-i xa ta ra ǃhoa ti ra ǂâi? ǂAnbasen ǁnâi re, Farisegu tsî Sadusegu di khūkhū-i xa!”

12 ǀUnis ai ǀgui gu ge ǁkhāǁkhāsabega hā ra ǁnâuǃā Jesub pere-i ra khūkhū-ūhe khūkhū-i xa ǂâibasen tamasa, xaweb Farisegu tsî Sadusegu di ǁkhāǁkhādi xa gere ǃhoasa.

Petrub ge Jesub xa ra ǁguiǁnâ

(Markub 8:27-30Lukab 9:18-21)

13 Jesub ge Kaesarea Filipiǀkharib ǃoa hā tsî ǁîb ǁkhāǁkhāsabega ge dî: “Khoen Ôab a tari, ti ra mî khoena?”

14 O gu ge ǁîga ge ǃeream bi: “ǀNî khoen ge ra mî, Johaneb ǁĀǁnâ-aob, ǀnîna Eliab, ǀnîna Jeremiab tsî ǀnîna kēbo-aogu di ǀguib ti.”

15 Ob ge Jesuba ge dî gu: “O sago, tarita tita ti go ra mî?”

16 Ob ge Simon Petruba ge ǃeream “Sats ge Xristuts,* ûitsama Elob di Ôatsa” ti.

17 Ob ge Jesuba ǁîba ge ǃeream: “ǀKhaehets ge hâ satsa Simon, Johaneb ôatse, nēsats ge soro tsîts a ǀao xui-ao satsa xu aitsama ǂhaiǂhai tama hâ, xaweb ge ti Îb ǀhommi ǃnâ hâba nēsa satsa go ǂhaiǂhaiba. 18 ǁNā-amaga ta ge ra Petrub ti ǀonǂgai tsi, ǃgareǀuib ti ra ǂâibasensa. Nē ǃgareǀuib ai ta ge ti kerkheba nî ǂnubi, ǁŌhân Hâǃkhaib ǀgaigu tsîn xa xū-e dīhe tideba. 19 Tita ge Gaosib ǀHommi dib di ǁkhowa-amma nî mā tsi. ǃHūbaib aits ga ǂganamǂui-i hoa-i ge ǀhommi tsîn ǃnâ nî ǂganamǂuihe tsî ǃhūbaib aits ga ǁkhowa-amba-i hoa-i ge ǀhommi tsîn ǃnâ nî ǁkhowa-ambahe.” 20 ǁNāpa xub ge Jesuba ǁkhāǁkhāsabega ge mîmā, î gu tā khoe-i xare-e mîba ǁîb a Xristu ǃkhaisa.

Jesub ge ǁîb tsâb tsî ǁōb xa ra ǃhoa

(Markub 8:31—9:1Lukab 9:22-27)

21 ǁNās khaoǃgâb ge Jesuba ǁîb di ǁkhāǁkhāsabega ǃgāsase ge mîba, ǁîb nî Jerusalems ǃoa ǃgû ǃkhais tsî mâtib nî ǁnāpa dī-ūhesa. ǁÎb ge ǂnomdomgu,* danapristergu tsî Moseb ǂhanub* di ǁkhāǁkhā-aogu tsîgu xa ǃaromahe hâse tsâ tsî nî ǃgamhe. Tsîb ge ǃnonaǁî tsēs ai ǁōba xu nî khâi.

22 Xaweb ge Petruba Jesuba ǀgui ǀkhāb ǁga ǂgai tsî ge ǃgabe: “Ab Eloba ǀkhomxa tsi, îs nēsa tā sats ǀkha ī!”

23 Ob ge Jesuba Petrub ǃoa dabasen tsî ge mî: “Bēxū te, Satantse!* Sats ge ti aiǃâ ǃnôa-aiǃnaose ī. Sats ge khoesi ǂâiǀgauba xu ra ǃhoa, xawe Eloba xus ose.”

24 ǁNās khaoǃgâb ge Jesuba ǁîb ǁkhāǁkhāsabegu ǃoa ge mî: “Tita ga sao ǂgaob hoab ge ǁî-aitsama ǀurusen tsî ǃgâuhaiba* ūkhâi tsî tita nî sao. 25 Ûib â-e ga sâu ǂgao-i hoa-i ge ǁîba nî ǂoaǃnâ; xawe tita ǃaroma ga ûib â-e a ǂoaǃnâ-i hoa-i ge ǁîba nî hō-oa. 26 Xawe tare xū-e i kha khoe-e harebeba hâ, ǃhūbaib hoaba i ga hō xawe-i ga ǁî-i ûiba hîkākāo? Xū-i xare-i ge a ǀkhai ǁkhawats nî sa ûiba hō-oa-ū-e. 27 Kaise ǃhae ǁaeb ǃnâb ge Khoen Ôaba, ǁGûb di ǂkhaisib ǃnâ, ǁîb ǀhomǃgāgu ǀkha hā tsî hoa khoena nî ǀgoraǃgâ, mâ-i hoa-e ǁî-i di ǃoaǂuis ǃoa. 28 Amase ta ra mîba du, ǀnîn sadu din hîa nēsis tsîna nēpa mân ǁō tidesa, Khoen Ôaban mû tama tsî Gao-aoseb nî hās aiǃâ.”