Paulub ge Kaesari aiǃâ ǂhaisa ra ǂgan
1 ǃNona tsēde ǁîb di mûǂamaose ǁnā ǃhūǃâs ǃnâ mâihes khaoǃgâb ge Festuba Kaesareasa xu Jerusalems ǁga ge ǃgâu. 2 O gu ge danapristergu tsî Jodeǁî ǂgaeǂgui-aoga ǁîba Paulub ǃoagu gu ūhâ ǃnuriǃgâdi xa mîba tsî ǁîba ge ǀkhoma, 3 ǁîgab nî ǃgâidī tsîb Pauluba Jerusalems ǃoa sî ǃkhaisa. ǀNai ǁîgu ǃnâ ǁîba daob ǃnâ ǁgoeǃâu tsî ǃgamsa ǀapeǀhao hâse. 4 Ob ge Festuba ge ǃeream gu: “Paulub ge Kaesareas tawa ǃkhōsis ǃnâ hâ, xawe ta ge tita tsîna kaise ǃnubu ǁaeb ǃnâ ǁnāǀî nî oa. 5 Sago hîa ǂgaeǂguis ǃnâ mâgo ge tita ǁnāǀî a sao ǁkhā. Tsîb ga Pauluba tsū xū-e dī hâ io, o gu ge ǁîgu di ǀanaǃgâsa ǁîb ǃoagu a dī ǁkhā.”
6 Tsîb ge Festuba Kaesareas ǁgab nî ǃgûs aiǃâ ǁkhaisas tsî disis tsîn ǁaegu hâ tsēde ǁnāpa ge hâ. Tsî sao ra tsēb ge ǁîba ǀgoraǃgâ-aose ǁîb ǂnûǃkhaisa ū tsî Paulub ǀgoraǃgâs ǃaroma nî hā-ūhe ǃkhaisa ge mîmā. 7 Tsî Paulub ge ǁnâuǃgâǃkhaib ǃnâ ǂgâxa on ge Jerusalemsa xu ge hā hâ Jodeǁîna Paulub ǂnamipe ǀhao tsî ǁgauǁgau ǁoan a ǁkhōǁkhōsa ǀanaǃgâde ǁîb ǃoagu gere dī. 8 Ob ge Pauluba ge ǃereambasen: “Tita ge a ǀhapio, Jodeǁîn di ǂhanub ǃoagus kas, Tempeli ǃoagus kas, Kaesari ǃoagus kas hoasa ta tsūdī tama amaga.” 9 Xaweb ge Festuba Jodeǁîna ǃgâiǀîgusa ǁgau ǂgao tsî Pauluba ge dî: “Jerusalems ǁga ǃgû tsî ǁnāpa sī ti aiǃâ ǁnâuǃgâhesa māsenxats a?”
10 Ob ge Pauluba “Tātsē, nē ta ǁîb aiǃâ mâb ge Kaesari di ǀgoraǃgâǃkhaiba tsî nēpas ge ǁnâuǃgâhe ta nîsa. Tsî sats tsîn ǃamkuse ǂanse ta ge tita Jodeǁîna xū-e dī tama hâ. 11 ǁŌb ǁkharaba ta a mābahe ǁkhā ǃûǂam-e ta ga dī hâ, o ta ge māsenxa ǁōsa, xawe ta ge ǀhapio tsî-i ge sats tamas ka io tari-i ǀgui-i ka xawe tita ǃgamhe ta nîse nē khoen ai a māǁnâ ǁoa. Kaesari ai ta ge ra ǂgaimāsen.” 12 Tsî nēsab ge Pauluba mî, ob ge Festuba ǁîb di ǂgaeǂgui-aon ǀkha ǃhoaǁare tsî “Ā, Kaesarats go ǂgaimāsen, ots ge Kaesari ǁga nî ǃgû!” ti ge mî.
Paulub ge Agripab tsî Bernises tsîra aiǃâ ra ǂhai
13 Tsî ǀnîkhamakō tsēdi khaoǃgâb ge Gao-aob Agripaba, Bernises ǀkha Festubab nî tawedese Kaesareasa xu ge sī. 14 Tsî ǁnāpa ra ge ǀoro tsēde hâs khaoǃgâb ge Festuba Paulub ǁhōba gao-aoba ge mîǃāba: “Nēpab ge Feliksi xa ge ǃkhōsab ase ǁnāxūhe ǃkhōsabeba hâ. 15 Jerusalems tawa ta ge sī, o gu ge danapristergu tsî Jodeǁîn di ǂnomdomgu* tsîna ǁîba ǀanaǃgâ tsî ǁîba ta nî ǁkhara ǃkhaisa ge ǂgan te. 16 O ta ge ǁîga Romeǁî ǁnaetib khoe-e ǁnâuǃgâ-i ose ǀgoraǃgâ tama ǃkhaisa ge mîba. ǁÎ-i ge ǁnā aiǂhanub ǀanaǃgâ-aon aiǃâ aitsama ǂnoabasens diba ra māhe.
17 “Tsî ǁîn ge ǁnâuǃgâs ǃaroma ǀkhī, o ta ge sao ra tsē mâiǂui tamase ti ǂnûǃkhaisa ǀgoraǃgâǃnaos ǃnâ ūǂgā tsî Paulub nî tita ǃoa hā-ūhe ǃkhaisa ge mîmā. 18 ǁÎb di mâǃoa-aon ge khâimâ o ta ge tita ǀnîsib kaise ǁgaiǁgaisa ǃûǂam-e dī hâ ti ge ǂâi, xawen ge tita gere ǃâubasen kō ǃgomǃgâxa ǃnuriǃgâde ge ūhâ tama hâ i. 19 Hūs di ǃnuriǃgâdi hîan ge ǁîb ǃoagu ūhâ idi ge ǁîn di ǂhunuma eloǃoabas xa hâ xūn, ǀnai ge ǁō khoeb, Jesub ti ǀon hâb hîab Pauluba ûitsama ti ra mîb ǂama hâna. 20 Tsî tita ge mâti ta nē ǁhōba nî ôaǃnâ ǃkhaisa ta ge ǀūa-ai xui-ao ǁîba ge dî, Jerusalems ǁga ǃgû tsî ǁnāpa sī nē ǃnuriǃgâdi ai ǁnâuǃgâhesab a māsenxa ǃkhaisa. 21 Xaweb ge Pauluba Kaesari ai ǂgaimāsen tsî ǁîb xa ǁnâuǃgâhesa ǂgan, o ta ge ǃkhō-oms ǁgab nî oa-ūhe ǃkhaisa ge mîmā, Kaesari ǃoa ta nî sî bis kōse.”
22 Ob ge Agripaba Festub ǁga “Tita ge aitsama tare-eb nē khoeba mîb nîse ūhâ ǃkhaisa ra ǁnâu ǂgao” ti ge mî.
Ob ge Festuba “ǁArits ge ǁîba nî ǁnâu!” ti ge ǃeream bi.
23 Tsî sao ra tsē ra ge Agripab tsî Bernises tsîra kai ǂkhaib ǀkha, toroǃkhamaogu di mâisagu tsî ǃās di ǁanǂgāsaben xa ge ǀgapiǃgôahe hâ i khoegu tsîn xa ǁnūhe hâse ǁnâuǃgâ-ommi tawa ge sī. Tsîb ge Pauluba Festub di mîmās ai ǁnâuǃgâ-ommi ǃnâ ge ǂgâxa-ūhe. 24 Tsîb ge Festuba ge mî: “Gao-ao Agripatse tsî sadu nēpa hâdo, nē khoeb nē du ra mûb ge hoaraga Jodeǁîn Jerusalems tsî Sesareas din xa ǃaruǀî ûisab anu tama ti gere mîhe. 25 Xawe ti mûǂgāb ǃoab ge ǁîba ǁōb ǁkharaba anu hâ ǃûǂam-e dī tama hâ. Tsî ta ge ǁîb di ǂgans, Kaesari ai ǂgaimāsens dis ai Romes ǁga ǁîba sîsa tita ǃnâ ge mîǁgui. 26 Xawe ta ge kai ǁaposasib ǀkha ta ǁîb xa ti ǀhonkhoeb Kaesara nî xoaba xū-e ūhâ tama hâ. ǁNā-amaga ta ge ǁîba sadu aiǃâ tsî ǃgōsase gao-aob Agripab aiǃâ go ǀkhī-ū, î ta ôaǃnâs khaoǃgâ xoa ta nî xū-e ūhâ ǁkhā. 27 Tita i ǂâibasenoǃnâba xui-ao, ǃkhōsabe-e ǁî-i ǃoagu hâ ǃnuriǃgâdi ose Kaesari ǁga sîsa.”
© Khoekhoegowab Elobmîs © Bible Society in Namibia, 2020.
