Disikhoeseǀaǁî mîǀgaub
1 Tā ǂkhabadī-ao-i ûiǀgauba tura tamas ka io tā ǁî-i ǀkha ǀhōsagu. 2 ǁÎ-i ǂkhabab ǀguiba ra ǂâi tsî ǁî-i amǁgaukha hîkākās mîdi ǀguide ra ǃhoa xuige.
ǀGamdisiǁî mîǀgaub
3 Gā-aisib ǀkhas ge oms ra omhesa tsî ǁnâuǃāb ǀkhas ge ǁîs ra ǂnubikhâihesa. 4 ǂAns ǀkhas ge ǁîs ǃnā-omdi ǂguiǃnâgu ǀō-aisa tsî ǃgomǀgausa xūn ǀkha ra ǀoaǀoahesa.
ǀGamdisiǀguiǀaǁî mîǀgaub
5 Gā-ai ǃkhamao-i ge ǀgaisa tsî ǂansa ūhâ khoe-i ge ǀgaisa-i ǃgâ-ai a ǁkhā. 6 Gā-ai ǀapedi ǀkha ǀguits ge toroǃkhams ǃnâ nî ǂgâ tsî ǂgui ǀapemā-aon di ǀapemās ǀkha ǀguits ge dan ǁkhā.
ǀGamdisiǀgamǀaǁî mîǀgaub
7 Gâre khoe-i ǃaromab ge gā-aisiba kaise ǀgapi; ǀgoraǃgâǃkhaib tawa i ge ams â-e ǁkhowa-am ǁoa.
ǀGamdisiǃnonaǀaǁî mîǀgaub
8 Hoaǁaets ga ǂkhababa ǀape, ots ge ǃgomsiba ra ǃaroma khoese ra ǂansa. 9 Gâre khoe-i ra ǀapeǂui xū-i hoa-i ge a ǁore. ǃHō-ao-i ge hoa khoen aiǃâ a ui-uisa.
ǀGamdisihakaǀaǁî mîǀgaub
10 ǃGomsib ǁaeb aits ga ǂkhabusa, ots ge amase a ǂkhabusa.
ǀGamdisikoroǀaǁî mîǀgaub
11 ǂHanuoǃnâse ǁōb ǁkharaba ra ǁgui-aihe khoe-e huiǂuisa dītsâ; ǁî-i ûiba sâusa hoaǁae dītsâ. 12 Sats ga mî: “Xawe sida ge nēsa a ǀū” ti, ob ǂgaoga ra ôaǃnâba nēsa ǂâiǃgâ ǁoa? Sa ûiba ra ǃûiba nēsa ǂan tama hâ? ǁÎba mâ khoe-i hoa-e ǁî-i dīb ǃoa sîsenū tide?
ǀGamdisiǃnaniǀaǁî mîǀgaub
13 Ti ôatse, dani-e ǂû, ǁî-i a ǃgâi xuige tsî daniǂgoasa xu ra ǂnâ dani-i ge ǂkhonse ra ǁkhoa. 14 ǁKhā ǀgaus aib ge gā-aisiba sa ǀomsa ǂkhonba; ǁîbats ga hō, ots ge ǃgoaxa ǁaeba ūhâ tsîs ge sa ǃâubasensa ǁarahe ǁkhā tide.
ǀGamdisihûǀaǁî mîǀgaub
15 Tā ǂkhabadī-ao-i khami ǂhanu-ai khoen di oms ǃoagu gauǁgoe; tā ǁîn omsa hîkākā. 16 ǂHanu-ai khoe-i ge hû ǃnāde i ga ǁnā, xawe ǁkhawa ra khâimâ; xawe eloxoresa-i ge ǂkhabadīb xa nî ǁnā kaihe.
ǀGamdisiǁkhaisaǀaǁî mîǀgaub
17 Tā sa khākhoe-i ga ǁnā, o ǃgâiaǂgao tsî ǁî-i ga ǃnôa, o dâ. 18 ǁNā tamas ka iob ge ǃKhūba mû tsî ǃgâibahe tide tsî ǁîb ǁaiba khākhoen âtsa xu nî ǂgae-oa.
ǀGamdisikhoeseǀaǁî mîǀgaub
19 Tā eloxoresan ǂama ǂâiǂhansen, î tā ǂkhabadī-aon ǃoagu surixa, 20 ǂkhabadīb ǃgoaxaǁae-e ūhâ tama xuige; eloxoresan di ǃamǀaes ge nî ǀari.
ǃNonadisiǁî mîǀgaub
21 Ti ôatse, ǃKhūb tsî gao-aob tsîkha ǃaoǃgâba ūhâba, tā ǁîkha ǁnâuǀnamoǃnâ. 22 ǁNā tamas ka io, ob ge ǂōǂōsiba ǃhaese nî hāǂam tsi, tsî tari-e ǁîkha nî ǃaroma ǂkhôaba nî ǂan ǁkhā?
ǃNāsa gā-ai mîǀgaugu
23 Nē gu tsîn ge gā-ai khoen di mîǀgauga:
ǀGoraǃgâs ǃnâ ǀkhāǁhûis ge a tsū. 24 ǂKhabadī-ao-i ǃoa ga mî: “Sats ge a ǀhapio” ti khoe-i, ge khoen xa nî ǀâxarexūhe tsî ǃhaodi xa nî mîǁnâhe. 25 Xawe ǂkhabadī-ao-e ga ǀhapixase hō khoe-i ge ǂkhîba nî ūhâ tsî ǁî-i ûib ge nî ǀkhaexaǃnâ.
26 ǂHauǃnâse ra ǃeream khoe-i ge ama khoexasiba ra ǃaroma.
27 ǂGuro ǃaugab ai sîsentsoatsoa, î aibe sa ǃhanaga ǂhomisase ūhâ; ǁnās khaoǃgâ ǀgui sa omsa omtsoatsoa.
28 Tā ǃaroma i ose sa ǀgūkhoe-i ǃoagu ǀhûǀguitimî î tā sa amǁgaukha ǀkha ǂhumiǂgā-am. 29 Tā mî: “ǁÎ-i ge tita dī i ǀgui-e ta ǁî-e ra dīǃoa; ǁî-i ge dī te i ǀgui-e ta ra ǀkhao,” ti.
30 ǀOpesa khoe-i ǃhanab tawa ta ge ge ǃkharu, gâre-i di draibeǃhanab xōǀkhā. 31 Mû, ǁkhūn ge hoaraga ǃhanab ǃnâ ge ǀoa hâ i; ǁîǁhaiben ge hoaraga ǃkhaib ai ge ǂoaxa hâ i tsî ǀuiǂnubiǂgoab âb ge ge ǃkhom hâ i. 32 Nēsa ta ge mû, o ta ge ǂōrisase kō tsî ǁnāpa xu xū-e ge ǁkhāǁkhāsen. 33 ǂKharirose ǀgui ǁoms, ǂkharirose ǀgui ǂomhîs, ǂkharirose ǀgui ǃomkha sâsâs, 34 ge nî ǃaroma ǀgâsib ǃnari-ao-i khami nî hāǂam tsisa tsî ǁâtanisa ǃkhamao-i khami nî ǁnāǂam tsisa.
© Khoekhoegowab Elobmîs © Bible Society in Namibia, 2020.
