Jerusalems di ǁanǂgāsaben
1 ǁAes di ǂgaeǂgui-aogu ge Jerusalems ǃnâ ge ǁan. Nau khoen ge ǀkhūsa ge ao, în mâ disi omaridi hoade xu ǀguisa ǁhûiǂui, ǃanu ǃās Jerusalems ǃnâs nî ǁanse. Nau khoen ge nau ǃādi ǃnâ ge ǁan ǁkhā i. 2 Khoen ge Jerusalems ǃnâ ǁansa ge māsen xa i aogu hoaga ge koa. 3 Judab di ǃādi ǃnân ge nau Israelǁîn, pristergu, Leviǁîgu, Tempelǃoaba-aogu tsî Salomob ǃgāgu di ôananôagub tsîna, mâ-i hoa-e ǁî-i ǃkhais ai, ǁîn di ǃādi ǃnâ ge ǁan.
Nē ra saogu ge Judab ǀkharib di ǂgaeǂgui-aogu Jerusalems ǃnâ ge ǁan ga:
4 Judab ǃhaoǃnāsa xu:
Atajab, Usiab ôa tsî Saxariab ǁnurib. Nau aboxagu ǁîb digu ge Amariab, Sefatjab tsî Mahalaleli, Judab ôab Peresi surib diga.
5 Maasejab, Baruxi ôa tsî Kolhoseb ǁnurib. Nau aboxagu ǁîb digu ge Hasajab, Adajab,
Jojarib tsî Saxariab, Judab ôab Selab surib diga.
6 Peresi di ôananôagub xa gu ge hakakaidisi tsî ǃnanidisiǁkhaisaǀa ǁkhoaǂgaoxa aoga Jerusalems ǃnâ ge ǁan hâ i.
7 Benjaminni ǃhaoǃnāsa xu:
Salub, Mesulammi ôa tsî Joedi ǁnurib. Nau aboxagu ǁîb digu ge Pedajab, Kolajab, Maasejab, Itieli tsî Jesajab tsîgu
8 tsî ǁkhāti Gabaib tsî Salaib tsîkha.
ǀHaob ai gu ge khoesekaidisi tsî ǀgamdisiǁkhaisaǀa Benjaminǁîga.
Jerusalems ǃnâ ge ǁan hâ i. 9 Sixrib ôab Joeli ge ge ǁîn ǂgaeǂgui-ao i tsî Hasenuab ôab Judab ge ge ǃās di ǀgamǁî ǂgaeǂgui-ao i.
10 Pristergu:
Jojarib ôab Jedajab, tsî Jakinni tsîkha.
11 Serajab, Hilkiab ôa tsî Mesulammi ǁnurib. Nau aboxagu ǁîb digu ge Sadoki, Merajoti tsî ǀgapipristeri Ahitub tsîga. 12 ǀHaob ai gu ge ǁkhaisakaidisi tsî ǀgamdisiǀgamǀa aogu nē ǃhaoǃnās diga Tempeli ǃnâ gere ǃoaba.
Adajab, Jerohammi ôa tsî Pelaljab ǁnurib. Nau aboxagu ǁîb digu ge Amsib, Saxariab, Pasuri tsî Malkiab tsîga. 13 ǀHaob ai gu ge ǁîn ǃhaoǃnādi danakhoega ge ǀgamkaidisi tsî hakadisiǀgamǀa i.
Amasaib, Asareli ôa tsî Axsaib ǁnurib. Nau aboxakha ǁîb dikha ge Mesilemoti tsî Imer hâkha. 14 ǀHaob ai gu ge ǁkhoaǂgaoxa toroǃkhamaogu ǁîb ǃhaoǃnās diga ge ǀguikaidisi tsî ǀgamdisiǁkhaisaǀa i. ǁÎgu di ǂgaeǂgui-aob ge Hagedolimmi ôa Sabela ge i.
15 Leviǁîgu:
Semajab, Hasub ôa tsî Asrikammi ǁnurib. Nau aboxagu ǁîb digu ge Hasabjab tsî Bunib,
16 Sabetaib tsî Josabadi tsîkha, ǃaugab ǃoabadi Tempeli dide ra mûǂam Leviǁîga.
17 Matanjab, Mikab ôa tsî Sabdib ǁnurib, Asafi surib diba. ǁÎb ge ǁnaeba ǀgores tsî gangans ǃnâ gere ǂgaeǂgui.
Bakbukjab, Matanjab hui-ao ge ib,
Abdab, Samuab ôa tsî Galali ǁnurib, Jedutunni surib dib tsîga.
18 ǀHaob ai gu ge ǀgamkaidisi tsî ǁkhaisadisihakaǀa Leviǁîga Jerusalems ǃnâ ge ǁan hâ i.
19 Tempelǃûi-aogu:
Akub, Talmonni tsî ǁîkha di surib tsîgu, ǀhaob ai ge ǀguikaidisi tsî hûdisiǀgamǀa iga.
20 Nau khoen Israeli din tsî ǃgauge pristergu tsî Leviǁîgu tsîn ge ǁîn di ǃkhaidi ai, nau ǃādi Judab didi ǃnâ ge ǁan hâ i. 21 Tempelǃgāgu ge Ofel ti ra ǀonǂgaihe ǃâs Jerusalems dis ǃnâ ǁan tsî Sihab tsî Gispab tsîkha mûǂams ǃnaka gere sîsen.
22 Jerusalems ǃnâ ge ǁan hâ i Leviǁîgu ǂamab ge Usib, Banib ôa tsî Hasabjab ǁnuriba ge mûǂamao i. Nau aboxakha ǁîb dikha ge Matanjab tsî Mikab tsîkha, Asafi ǃhaoǃnās dikha ge i. ǁNā ǃhaoǃnās ge Tempelǃoabadi ǃnâ ra dīhe ǁnaeb ǂama ǃereamsa ge ūhâ i. 23 Gao-aob ge ǁîn ǂama ǂnûiǂgāsa ge māǂui hâ i, mâ ǁaegu ain, mâ tsēs hoasa Tempelǁnaeba nî ǂgaeǂguisa.
24 Mesesabeli, Serab ǃhaoǃnās tsî Judab ǃhaos dib di ôab Petaxjab ge gao-aoba ǁaes di ǁhōgu ǃnâ gere mâxōǀkhā.
Nau ǃādi ǃnâ ge ǁan hâ i khoen
25 ǂGui khoen ge ǁîn di ǃgaroǃādi ǀgūse hâ ǃādi ǃnâ ge ǁan hâ i. Judab ǃhaos din ge Kiriat-Arbas, Dibons tsî Jekabseels tsî ǁnā ǃādi ǀgūse ǁgoe ǃārodi tsîdi ǃnâ ge ǁan hâ i. 26 ǁÎn ge ǁkhāti Jesuas, Moladas, Bet-Pelets, 27 Hasar-Suals, Bersebas tsî ǁîs ǂnamipe hâ ǃārodi tsîdi ǃnâ ge ǁan hâ i, 28 tsî Siklags, Mekonas tsî ǁîs ǂnamipe ǁgoe ǃārodi, 29 Enrimons, Soras, Jarmuts, 30 Sanoaxs, Adulams tsî ǁîdi ǂnamipe ǁgoe ǃārodi tsîdi ǃnâ. ǁÎn ge ǁkhāti Lakis tsî ǁîs ǀgūse ǁgoe ǃārodi tsî Asekas tsî ǁîs ǀgūse ǁgoe ǃārodi tsîdi ǃnâ ge ǁan hâ i; ǁnās ge ra ǂâibasen, ǁîn ge Bersebasa xu tsoatsoa tsî Hinomǃgoaǃnāb kōse ǁan hâ isa.
31 Benjaminni ǃhaos di khoen ge ǁanǃnâ hâ i ǃādi ge Gebas, Mikmas, Ajas, Betels tsî ǁîs ǀgūse ǁgoe ǃārodi, 32 Anatots, Nobs, Ananjas, 33 Hasors, Ramas, Gitaims, 34 Hadids, Seboims, Nebalats, 35 Lods tsî Onos tsî Kuru-aoguǃgoaǃnāb tsîna. 36 ǀNî Leviǁîgu Judab digu ge Benjaminni ǃnâ sī ge ǁan.
© Khoekhoegowab Elobmîs © Bible Society in Namibia, 2020.
