ǀGam ǀgurukha
1 Tsî ta ge ǀguruba huriba xub ra ǂoaxase ge mû. ǁÎb ge disi ǁnâgu tsî hû danadi tsîna ge ūhâ i; mâ ǁnâb hoab ais ge kronsa ge hâ i tsî mâ danas hoas ai i ge Eloba ra ǃkhāǃkhā ǀon-e ge hâ i. 2 Tsîb ge nē ǀguruba ǀgarub di īsiba ge ūhâ i, ǂaidi hîa bēri didi khami īdi tsî xammi di amǃnâb khami ī amǃnâb ǀkha. Draki* ge ǁîb di ǂhunuma ǀgaib, ǁîb di trons tsî ǁîb di kai ǁkhāsib tsîna ge mā. 3 ǀGui danas ǀgurub dis ge ǁōǁōsa ǀhapi-e ūhâ khami ge ī i, xawes ge nē ǁōǁōsa ǀhapisa ge ǂgau. Hoaraga khoen ǃhūbaib ai hân ge kaise burugâ tsî ǀguruba gere sao. 4 Tsîn ge hoaragana ǁîb di ǁkhāsibab ge ǀguruba mā xui-ao, draka gere ǀgoreǀî. ǁKhātin ge ǀgurub tsîna ǀgoreǀî tsî gere mî: “Tari-e ǀgurub khami ī-e? Tari-e ǁîb ǃoagu a ǃkham ǁkhā?”
5 Tsîb ge ǀguruba ǁîb xa ǂama tsî eloǃkhāǃkhās di ǂhanuba ge māhe tsîb ge nē ǁkhāsiba hakadisiǀgamǀa ǁkhâgu di ǁaeba ge māhe hâ i. 6 Ob ge Eloba ge ǃkhāǃkhātsoatsoa. ǁÎb ge Elob di ǀons, ǁîb di Tabernakeli tsî ǀhommi ǃnâ ǁan hân tsîn hoana gere ǃkhāǃkhā. 7 ǁKhātib ge Elob di khoen ǃoagu torodī tsî ǁîna ǃkhamdans di ǀgaiba ge māhe, tsî ǁkhāti ǁkhāsiba mâ ǃhaos, khoen, gowab tsî ǁaes hoas ǂama. 8 Tsîn ge ǃhūbaib ai ǁan hân hoana ǁîba nî ǀgoreǀî, ǁnān ǀondi âna ǃhūbaib di ǂnubihes aiǃâba xu, ǁKhaob ǂāhe hâb di ǂkhanis ûib dis ǃnâ xoamâihe hân ǀguin ose.
9 “ǂGaera ūhâ-e, a-i ǁnâu!
10 “Khoe-i ǃkhō-oms ǃoa ra ǂgaeǂguihe-i
ge ǃkhō-oms ǃnâ nî ǂgâ-e.
Tsî gôab ǀkha ra ǃgam-i
ge ǁkhāti gôab ǀkha nî ǃgamhe.
Nēpan ge Elob di khoena ǃnūǃnâxasib tsî ǂgoms tsîna nî ūhâ.”
11 Tsî ta ge ǀnî ǀgurub hîa ǃhūba xu ra ǂoaxaba ge mû. ǁÎb ge ǁnâgu ǁkhaob digu khami īga ge ūhâ i tsî draki khami gere ǃhoa. 12 ǁÎb ge hoaraga ǁkhāsib ǂguro ǀgurub diba ǁîb aiǃâ sîsenǂui tsî hoaraga ǃhūbaib tsî ǁîb ǃnâ hân nî ǂguro ǀgurub, ǁōǁōsa ǀhapis âb ge ǂuruǂuruheba ǀgoreǀî ǃkhaisa gere ǂgao. 13 Nē ǀgamǁî ǀgurub ge kai saode gere dī; tsîb ge ǀaesa ǀhomma xu ǃhūbaib ǁga gere ǁgôaxa kai, hoan nî mûse. 14 Tsîb ge ǃhūbaib ai ǁan hâna ǁîb ge ǂguro ǀgurub aiǃâ dīb nîsa mā-amhe hâ i saodi ǀkha gere ǂgaeǂhapu. Tsîb ge ǁîna ǁnā ǀgurub hîa ǁkhōǁkhōsaseb ge tsû xawe ûitsamab di ǃgôasiba ǃoan nî ī-e kuru ǃkhaisa ge mîba. 15 ǀGamǁî ǀgurub ge ǂguro ǀgurub di ībab nî ûiba ǃnâiǂgāǃnâ ǃkhaisa ge mā-amhe tsîb ge ǀgurub di ība ge ǃhoa ǁkhā tsî ǁnān hîa ǁîb di ība ǀgoreǀî tamana gere ǃgam kai. 16 Tsîb ge ǀgamǁî ǀguruba kain tsî ǂkharin, ǃkhū hân tsî ǀgâsan, ǃnorasan tsî khobon tsîna gere ǂgaoǀkhā, ǁîn di amǀkhāb ǃomgu tamas ka io ǃūdi ain nî saohe ǃkhaisa. 17 Nē saos ose i ge khoe-i xare-e ǁama tamas ka io ge ǁamaxū ǁoa i, ǁnās ge ǀgurub di ǀons tamas ka io ǃgôas hîa nē ǀonsa hâbasa.
18 Nēpab ge gā-aisiba ǂhâbasa. ǁNâuǃāba ga ūhâ-i ge ǂâibasens nē ǀgurub di ǃgôas disa ǂanǂui ǁkhā, khoe-es nē ǃgôasa mâba amaga. ǁÎb di ǃgôas ge ǃnanikaidisi tsî ǃnanidisiǃnaniǀa.
© Khoekhoegowab Elobmîs © Bible Society in Namibia, 2020.
