ǀGôan tsî ǁgûn nî ûi ǀgaub
1 ǀGôado, sadu îna ǃKhūb ǃnâ ǃgôasiba mā, ǁnāb a ǂhanu ǀgau xuige. 2-3 “Sa îb tsî sa îs tsîrats ge nî ǃgôa, ǃgâibahets nîse tsîts nî ǂomxase ǃhūbaib ai ûise.” Nēs ge ǂguro mîmās, mîmâis ǀkha hâsa.
4 ǁGûdo, tā sadu ôana ǁaixan nîse ûi-ū, xawe ǁîna ǃKhūb di ǂâis ǃoa Xristesi ûib ǃnâ kaikai, ǁkhāǁkhā tsî ǁnama.
ǃGān tsî ǀhonkhoen nî ûi-ūgu ǀgaub
5 ǃGādo, sadu ǃhūbaisi ǀhonkhoena Xristuba* du ga ǃoaba hâ khami ǂgaob hoab ǀkha ǁnâuǀnam, ǃaob tsî ǀkhūb ǀkha. 6 Tā koas ǃaroma mûhe du ra ǁaerob ai ǀgui sîsen; xawe Xristub di ǃoaba-aodu ase, ǂgaob hoaba xu Elob di ǂâisa dī. 7 Sadu sîsenna ǃKhūba ǃoabas ase ǃgâi ǂâis ǀkha dī, xawe khoe-e ǃoabas khamis ose. 8 Mâ khoe-i hoa-i nî ǂanǁapose, nēsi i ga sîsenao tamas ka io ǃnorasa xaweb ǃKhūba ǁî-e dī-i ra ǃgâi sîsengu ǃaroma nî mādawa-am ǃkhaisa.
9 ǀHonkhoedo, sadu tsîna sadu ǃgāna ǁkhā ǀgaub ai sîsenū, î ǁîna tā ǁgoaǂui. ǀHonkhoedu tsî ǃgādu hoado, ǁkhā ǃKhūb ǀhommi ǃnâ hâb, ǀgora-e khoe-i ǃnâ ūhâ tamab didu a ǃkhaisa ǂanǁapo.
Hoaraga ǁâtanin Elob din
10 ǀUnis ai, hoa ǁkhāsiba ūhâ ǃKhūb di ǀgaib ǀkha du ǀgaiǀgaihe re. 11 Hoaraga ǁâtanin Elob ge mā dun ǁgâuab* di ǀhôagao ǀapede du a mâǃoa-ū ǁkhāna ǂgaeǂgā. 12 Sada ge khoesi khākhoen ǃoagu ǃkham tama hâ, xawe danaǂgaeǂgui-aogu tsî ǁkhāsigu, nē ǃkhae ǁaeb di ǃhūbaisi ǂgaeǂgui-aogu tsî ǀhomsi ǃkhaidi ǃnâ hâ ǂkhabab di gagasi ǀgaigu tsîn ǃoagu. 13 ǁNā-amaga, hoaraga ǁâtanin Elob dina ǂgaeǂgā, ǂkhaba tsēdi ga hā, o du nî khākhoeb di ǀhôagao ǀapede ǃkhamǃoa ǁkhāse; tsî ǃkhamtoas khaoǃgâ mâǁapo. Nē Toroǃkhamaob ǂgaeǂgā hâ saran ge nē xoas ǃnâ ǃgāsase ra mîhe, tsîb ge nē ai-īsiba ǁnās ǃoa ra sîsenūhe.
14 ǁNā-amaga ǂhomisen hâse mâ, sadu kamanab ǃgae-ūdasa amab ǀkha tsî sadu ǁkhaiǁkhausaraba* ǂhanu-aisib ǀkha ǃgae hâse, 15 îs sadu ǁharode ǂgaeǂgāsa, ǁaposasib ǂkhîb di ǃGâiǂhôas aoǁnâs ase ī. 16 As sadu ǂgomsa hoaǁae ǁkhaukhōs ase ī, ǁîs ǀkha du hoaraga ǀaexa ǂāgu, ǁnāb hîa a ǂKhabab xa ra ǁhâihega nî ǁkhauǀarise. 17 Sadu toroǀgapasa ǃgâiǃōsib di mās ase tsî gôab hîa a Elob di mîsa, Gagab di mās ase ūǃoa. 18 Hoaǁae Gagab ǃnâ-u ǀgorehâhâ tsî Elob huiba ǂgan, î mâ ǁāxasi-i hoa-i tawa Gagab di ǀgaib ǃnâ ǀgore. Tsēb tsî tsuxuba hoaraga khoen Elob dina ǀû tamase ǀgoreba. 19 Tita tsîna ǀgoreba, îb Eloba ǂhanu mîde ti ams ǃnâ ǁgui, î ta ǂganǃgâsib ǃGâiǂhôas diba ǁkhoase ǂanǂan. 20 ǁÎs ǃaroma ta ge sîsabe kaisa, ǃkhōsis ǃnâ ta ǂnôa xawe. ǀGoreba te re, î ta īǁkhāba te i as kōse ǁkhoase ǃGâiǂhôasa ǂhôa.
ǀUni tawededi
21 Tsî nēsi du ga tita xa hoa xūna ǂan ǂgao, ob ge Tixikub, sida ǀnam ǃgâsab tsî ǂgomǂgomsa ǃoaba-aob ǃKhūb di sîsenni ǃnâba, tita gere dī xūn hoana nî ǃhoaba du. 22 ǁÎba ta ge sadu ǁga ra sî, îb sige xa hoana ǃhoaba du tsî sadu ǂgaogu tsîna ǀgaiǀgaiǃnâ.
23 Ti ǀnamsa ǃgâsado, ab ǃKhūb di ǂkhîb tsî ǂgomǂgomsa ǀnammi ǁGûb Elob tsî ǃKhūb Jesub Xristub diba sadu hoadu ǀkha hâ. 24 Ab ǃKhūb di ǀkhomma ǁnān, ǃKhūb Jesub Xristuba ǀûs ose a ǀnam hân ǀkha hâ.
© Khoekhoegowab Elobmîs © Bible Society in Namibia, 2020.
