ǁNaetisa ǁguibadi
(Eksodus 29:38-46)1 ǃKhūb ge Moseba ge mîmā, 2 îb Israelǁîna mîmâisa ǁaegu ai Elob di ǃgôasib ǃaroma ǂhâbasa ǂûǁguibadi, ǃgâi ǁamaba ūhâdi ǃKhūba ǃgâibase īde ǁguibasa ǁgui-ai.
3 Sao radi ge ǂûǁguibadi ǃKhūb di ǃgôasib ǃaroma nî ǁguibahede: Tsēkorobe khauǁguibas ǃaroma, ǀgam ǀgui kurixa ūo ǁkhaokha. 4 ǂGuro ǁkhaoba ǁgoaga tsî nauba ǃoes ǃnâ ǁguiba, 5 mâb hoaba ǃhoroǁguibas ǀgui kiloxram mel-i, ǀgui liter ǀkhera-oli-i ǀkha habasa-i ǀkha. 6 Nēs ge tsēkorobe ǁguibas hoaragase ǂhubiǂuihe hâs, ǂguro Sinaiǃhommi ai ǂûǁguibas, ǃgâi ǁamaba ūhâs, ǃKhūba ǃgâibas ase īse ge ǁguibahesa. 7 ǁKhāti ǂguro ǁkhaob ǀkhas ge ǂauxûiǁguibas ǀgui literi ǂauxûi-i disa altars ai nî ǂnâǂuihe. 8 ǃOes di ǁguibas ge ǁgoas di ǁguibas ra dīhe ǀgaub ai, ǂauxûiǁguibas ǀkha nî dīǀhaohe. Nēs ge ǁkhāti ǂûǁguibas, ǃgâi ǁamaba ūhâs ǃKhūba ǃgâibas ase ī.
Sabbattsēs ǁguibas
9 Sabbattsēs ai ǃhoroǁguibas tsî ǂauxûiǁguibas ase, ǀgam ǀgui kurixa ūo ǁkhaokha, ǀgam kiloxram mel-i, ǀkhera-oli-i ǀkha habasa-i ǀkha ǁguiba. 10 Nē khauǁguibas ge Sabbattsēkorobe, tsēkorobe ra ǁguibahe ǂauxûiǁguibas xōǀkhā nî dīhe.
ǁKhâb di ǂguros ai ra dīhe ǁguibas
11 Mâ ǂguro tsēs mâ ǁkhâb hoab dis ai ǃKhūb di ǃgôasib ǃaroma khauǁguibasa sao ra ǀgaub ai dī: ǀGam ǂkham ǁgōkha, ǀgui baib, hû ǀgui kurixa ǁkhaogu, hoagu a ūoga. 12 ǃHoroǁguibas ase ǀkhera-oli-i ǀkha habasa mel-e mâ ǁgōb hoab ǀkha, ǃnona kiloxramgu mel-e; baib ǀkha, ǀgam kiloxramkha; 13 tsî mâ ǁkhaob hoab ǃaroma ǀgui kiloxramma. Nē khauǁguibadi ge ǂûǁguibadi ǃgâi ǁamaba ūhâdi ǃKhūba ǃgâibase īde. 14 ǀGausa ǂauxûiǁguibas ge ǀgam literkha ǂauxûi-e mâ ǁgōb hoab ǃaroma, ǀgui tsî ǃkhare liter ǂauxûi-e baib ǀkha, tsî litera mâ ǁkhaob hoab ǀkha. Nēb ge khauǁguibas ǃaroma hâ ǁgarab, mâ ǁkhâb hoab di ǂguro tsēs ai hoaraga kuriba nî ǁnâuǀnamheba. 15 Tsî tsēkorobe khauǁguibas ǂauxûiǁguibas ǀkha hâs xōǀkhā, ǁoreǁguibas ase ǀgui piriba ǁguiba.
Khūkhū-e ūhâ tama Pereb ǁÂudīb ai ra dīhe ǁguibadi
(Levitikus 23:5-14)16 Pasxaǁâudīb ge ǃKhūb di ǃgôasib ǃaroma disihakaǀaǁî tsēs ǂguro ǁkhâb dis ai nî tsēdīhe. 17 Disikoroǀaǁî tsēs aib ge elosi ǁâudība hû tsēdi ǁaeba nî tsēdīhe; ǁnā tsēdi ai i ge khūkhū-e ūhâ tama pere-i ǀgui-e nî ǂûhe. 18 ǂGuro tsēs ǁâudīb dis ai du ge eloǃoabas ǃaroma nî ǀhao, tsî sîsen-i xare-e dī tide. 19 Khauǁguibasa ǃKhūb di ǃgôasib ǃaroma hâ ǂûǁguibas ase dī: ǀGam ūo ǂkham ǁgōkha, ūo baib tsî hû ūo ǀgui kurixa ǁkhaogu tsîgu ǀkha. 20 ǀGausa ǃhoroǁguibas, mel-i hîa oli-i ǀkha habasa-i; ǃnona kiloxramga mâ ǁgōb hoab ǃaroma, ǀgam kiloxramkha baib ǀkha, 21 tsî ǀgui kiloxramma mâ ǁkhaob hoab ǀkha ǁguiba. 22 ǁKhāti ǀgui piriba ǁoreǁguibas ǃaroma khoen di ǂkhîbagus ǁāxasib ǃaroma ǁguiba. 23 Nē ǁguibasa ǁnaetisa ǁgoakhauǁguibas xōǀkhā dī. 24 ǁKhā ǀgaub ai ǃKhūb di ǃgôasib ǃaroma ǂûǁguibas, ǃgâi ǁamaba ūhâs ǁîba ǃgâibasa, hû tsēdi ǁaeba dī. Nē ǁguibasa ǁnaetisa ǁgoakhauǁguibas tsî ǂauxûiǁguibas tsîra xōǀkhā dī. 25 Hûǁî tsēs ai ǀgoreǀîs ǃaroma ǀhao, î tā sîsen-i xare-e dī.
ǃGaos ǁÂudīb di ǁguibadi
(Levitikus 23:15-22)26 ǂGuro tsēs ǃGaos ǁÂudīb dis ai du ga ǂguro ǃhoroba ǃKhūb di ǃgôasib ǃaroma ǁguiba, o du ge eloǃoabas ǃaroma nî ǀhao, tsî sîsen-i xare-e dī tide. 27 Khauǁguibas, ǃgâi ǁamaba ūhâs, ǃKhūba ǃgâibasa ǁguiba: ǀGam ūo ǂkham ǁgōkha, ūo baib, tsî hû ǀgui kurixa ǁkhaogu tsîga. 28 ǀGausa ǃhoroǁguibas, mel-i hîa oli-i ǀkha habasa-i; ǃnona kiloxramga mâ ǁgōb hoab ǃaroma, ǀgam kiloxramkha baib ǀkha, 29 tsî ǀgui kiloxramma mâ ǁkhaob hoab ǀkha ǁguiba. 30 ǁKhāti ǀgui piriba ǁoreǁguibas ǃaroma khoen di ǂkhîbagus ǁaxasib ǃaroma ǁguiba. 31 Nē xūn tsî ǂauxûiǁguibas tsîna tsēkorobe khauǁguibas tsî ǃhoroǁguibas tsîra xōǀkhā ǁguiba.
© Khoekhoegowab Elobmîs © Bible Society in Namibia, 2020.
