Jesajab ôab ge khoena saose ība
1 ǃKhūb ge tita ǃoa ge mî: “Kai ǀuiǂgapaba ū, î ǁîb ai ǁnaetisa xoaǀgaub ǀkha kaise xoa; ‘Maher-salal-has-bas .’ 2 O ta ge ti ǂgomǂgomsa ǀhûǀguitimî-aokha, prister Uriab tsî Jeberekiab ôab Saxariab tsîkha nî ǂgaiǀkhī.”
3 Tsî ta ge sorosise kēbo-aos ǀkha ge ǂangu; ǁîs ge ǀgamǀkhā tsî ǀgôaba ge ǁora. Ob ge ǃKhūba tita ǃoa ge mî: “Maher-salal-has-bas ti ǀonǂgai bi. 4 Nē ǀgôarob ‘Ti îtse’ tamas ka io ‘Ti îse,’ ti nî mîs aiǃâb ge Asiriab gao-aoba Damaskus ǃkhūsib tsî Samariaba xu ge ǀhanahe xūn hoana nî tanibē.”
Asiriab di ǂgaeǂgui-aob ge ra hā
5 ǃKhūb ge ǁkhawa tita ǃoa ge mî: 6 “Nē ǁaes ge ǃgâi ǀgaub ai ra dâu ǁgammi Siloas diba ǂhara tsîb ge Resinni tsî Remaliab ôab tsîkha ǃaob xa ǀkhū xui-ao. 7 ǁNā-amagab ge ǃKhūba ǁîn ǃoagu kai ǀgaisa ǁgammi Eufratǃāb, Asiriab gao-aob tsî ǁîb hoaraga ǂkhaisib tsîkha diba nî ǁgôaxa kai; ǁîb ge ǀoaǃnō tsî ǁîb ǀnomamkha nî dâuǃkhū. 8 Nē kai ǁgammi dâus ge Judaba dâuǃkhū tsî nî hara.”
ǁÎb di khoraǂuisa ǁgapokha hoakha ge ǃhūb âdu ǂamai nî ǃāǂuihe, Immanueltse.
9 ǂHomisen î du ǂgaeǀhao, sa khoedo, î ǃaob xa ǀkhū! Sadu ǃnū ǃhūgu dido, ǃgâise ǃgâ! ǃKhams ǃaroma ǂhomisen, xawe ǃaob xa ǀkhū; ā, ǃkhams ǃaroma ǂhomisen, xawe ǃaob xa ǀkhū! 10 ǀApeǀhao! Xawen ge xū-i xare-e ǃoaǂui tide. Sîǂui mîmādi âdo, xawe sîsenǂuihe tide! Elob sida ǀkha hâ xui-ao!
ǃKhūb ge kēbo-aoba ra ǃkhâikhom
11 Amase, nēs ge ǃKhūb ge tita mîbasa. ǁÎb ge ǁaposase ǃkhō te tsî khoen ra dī khami ta dī tidesa ge ǃkhâikhom te: 12 “Tā nē khoen ra ‘ǀapeǀhaos’ ti ǃgapaǀî xū-i hoa-e ‘ǀapeǀhaos’ ase mû. Tā ǁîn ra ǃao xūn xa ǃaoǃaohe, tā ǃhuri. 13 Xawets ge ǃKhūb Hoaǀgaixab ǀgaiba nî ǂanǃgâ. ǁÎbats ge nî ǃgôa; ǁîbats ge nî ǃaoǃgâ. 14 ǁÎb ge nîra ǃanu ǃkhai, xawe khoen xa nî ǃnôa-aihe ǀuis ase tsî khoen xa nî ǂgâusenaihe ǃgareǀuis ase; Israeli ǀgam ǃhaora ǃaroma. ǁÎb ge Jerusalems khoen ǃaroma ǃnuis tsî ǁnoas ase nî ī. 15 ǂGuin ge ǃnôa tsî nî ǁnā; ǁîn ge ǁnā tsî nî khôa; ǁîn ge ǃnuihe tsî nî ǃkhōhe.”
ǁŌ hân ǀkha ǃhoas ǃoagu hâ ǃkhâikhoms
16 Ti ǀhûǀguitimîsa ǂōrisase sâu, î Elob ge mā te ǁguiǂamde ti saoǃgonaoga mā. 17 Tita ge ǃnūǃnâxase ǃKhūb ǁîb aisa Jakob di omarisa xu gaugau hâba nî ǃâu; tita ge ǁîba nî ǃâu.
18 Mû, nē ta ge a ǃKhūb ge mā te ǀgôan hoan ǀkha, ǂâiǂâisens tsî Israeli ǁkhāǁkhās ase, ǃKhūb Hoaǀgaixab, Sionǃhommi ai ǁan hâba xu sîhe hâse.
19 Xawe khoen ga mîba du, î du aimûǀgaru-aon tawa ǀape-ôa tsî ǃgai-aon mîde ǃgâ; ǁaesa kha ǁîn Elob tawa ǀape-ôa tide, ǁō hân tawa ûitsaman di ǃgoaxaǁaeb xa dîs xa?
20 Ots ge ǃKhūb di ǂHanub tsî kēbosi ǀhûǀguitimîs ǃoa oa. ǁÎn ǂâidi gagasise ǃkhae, amagan ge ǁnāti ī xūna ra mî.
ǂŌǂōsib ǁaeb
21 Khoen ge kaise ǃan hâse tsî ǃâ hâse ǃhūb ǃnâ-u nî ǃkharu; ǃâs xan ge ǁîna ǁaixa tsî ǁîn gao-aob tsî ǁîn Eloba nî ǀâxare ǀgapikab ǁgan ra kōkhâise. 22 ǃHūb ǃoan ga kō, on ge ǂōǂōsib tsî ǃkhaenas ǀguisa ra mû; ǃaoǃaosa ǃkhaenas hîan nî ǁgariǂgāǃnâhesa.
© Khoekhoegowab Elobmîs © Bible Society in Namibia, 2020.
