Deuteronomium 25 - Khoekhoegowab New Translation 2020 (KKG20)

1 “ǀGam Israelǁîkha ga ǂnoagu tsî ǀgoraǃgâǃkhaib aiǃâ ǂhai, tsîb ga ǀgoraǃgâ-aoba ǀguiba ǀhapiose tsî nauba ǀhapixase hō, 2 tsîb ga ǀhapixaba ǂnauhes di ǁkharaba ǁgui-aihe, ob ge ǀgoraǃgâ-aoba ǁîba ǃnā-arib ai ǁgoe kai tsî ǁîb di mûǁae, ǁkharaba anu hâ kō ǃnabaga nî ǂnau kai. 3 ǁÎb ge hakadisis xa ǃnāsa ǃnabaga ǂnauhe tide, xaweb ga ǁnās xa ǃnāsa ǃnabaga ǂnauhe, ob ge ǀhûhâsib mûǁae khoesis âba ra ǀhanahe.

4 “Tā ǃhoroba ǃgaos ǃaromats ra sîsenū gomaba ǃgaeǂganamǃnâ.

ǁŌ ge ǃgâsab ǃaroma hâ ǃereams

5 “ǀGam khoeǃgâgukha ǁkhā hâǃkhaib ai hâ hîab ga ǁîkha ǀguiba aore ǀgôaba hō tamase ǁō, os ge ǁîb di ǃoatarasa aob di ǀaokhoe tama khoeb ǀkha ǃgame tide. ǁŌ ge khoeb di ǃgâsab ǁgui-ais ge ǁîsa ǃgamesa. 6 ǂGuro ǀgôab hîa ǁîra xu nî ǃnaeb ge ǁō hâ khoeb di ôab ase nî ǃgôahe, îs ǁîb di ǀonsa tā Israelǁîna xu xoaǂuihe. 7 Xaweb ga ǁîb di ǃgâsaba ǁîs ǀkha ǃgame ǂgao tama i, os ge tarasa ǃās di ǂgaeǂgui-aogu ǃās ǂgâ-ams tawa hâgu tawa sī tsî nî mî: ‘Ti aob ǃgâsab ge Israeli ǃnâ ǁîb ǃgâsab di ǀonsa aiǃgû-ū ǂgao tama hâ. ǃGâsab di ǁgui-aisab ge tita ǀkha dīǀoaǀoa ǂgao tama hâ.’ 8 O gu ge ǃās di ǂgaeǂgui-aoga ǁîba ǂgaiǀkhī tsî ǁîb ǀkha nî ǃhoa. ǁÎb ga ǁnās khaoǃgâ ǁîs ǀkha ǃgamesa ǂgao tama i, 9 os ge ǁîsa ǃās di ǂgaeǂgui-aogu mûǁae, ǁîb tawa sī tsî ǁîb amǀkhāb ǀkhapusa ǂgaeǂui, ais âb ǃnâ ǂara tsî nî mî: ‘Nēs ge khoeb ga ǁîb ǃgâsab suriba aiǃgû-ū ǂgao tama i, o ra ī.’ 10 ǁÎb omaris ge, ǀkhapusa ge ǂgaeǂui-aiheb di omaris ase nî ǃgapaǀîhe.

Nau ǂhanumādi

11 “ǀGam khoekha ga ǃkham tsîs ga ǀguib di tarasa ǁîs aoba huis ǃaroma nau khoeba ǃupura ai ǃkhō, 12 o ǁîsa ǀkhom tamase, ǃommi âsa ǁhāǁnâ.

13-14 “Tā ǀnō-ūdade sîsenūs ǀkha nau khoena ǀhôagaoǃnâ. 15 ǂHanu tsî ǂhanu-aise ra ǀnō ǀnō-ūdade sîsenū, îts ǂomxa ǁaeba ǃKhūb sadu Elob nî mā du ǃhūb ǃnâ ûi. 16 ǃKhūb di mûǁaen ge nau khoena ra ǀhôagaoǃnâ khoena a ui-uisa.

Amalekǁîna ǃgams di ǁguiǂams

17 “Amalekǁîn ge Egipteba xu du ra doeǂoaxa hîa dī-ū du ǀgausa tā ǀuru re. 18 ǁÎn ge tsau tsî du ǂkhabu hâ hîa ǃgâbǀkhāba xu ge ǁnāǂam du tsî Eloba ǃao tamase, îbe ge ǂkhabu hâ i khoena ge ǃgam. 19 ǁNā-amaga, ǃKhūb sadu Elob ga ǃhūb ūbasen du nîba mā du tsî sadu ǂnamipe hâ khākhoen hoana xu sâu du, o du ge hoaraga Amalekǁîna ǀhommi ǃnakaba xu nî ǃgamǂui. Tā ǁnāsa ǀuru!