Tempeli di ǂnubihes
1 Hakakaidisi tsî ǁkhaisadisi kurigu, Israelǁîn ge Egipteba xu doeǂoas khaoǃgâ, hakaǁî kurib Salomob gaosis Israeli ǂamas dib ǃnâb ge ǁîba ǃKhūb di Tempela ǂnubis ǀkha ge tsoatsoa; nēs ge ǀgamǁî ǁkhâb, Sifi ǃnâ ge ī. 2 Nē Tempeli, gao-aob Salomob ge ǃKhūba ǂnubibab ge ǃnonadisi metergu kōse gaxu, disi metergu kōse ǂhaba tsî disikoroǀa metergu kōse ge ǀgapi i. 3 Aisǀkhāb ǃnā-oms, Tempeli di dao-ams dis ge disi metergu kōse ge gaxu i, Tempeli di ǂhabab khami tsîs ge ge koro metergu kōse ǂhaba i. 4 Tsîb ge Tempela mûǂuidaode ge dība, ǃaugab ǀkhāb ai ǂō tsî ǂganagabǀkhāb ai harade. 5 Ommi ǂnubiǂgoab ǂnamipeb ge ǃnona ǁhaoxa omde ge omǀaro, mâs hoas ǀgam meterkha ǀgapisiba ge ūhâ ide. 6 Hoadi xa ǃnaka hâ ǃnā-oms ge ǀgam tsî ǃkhare metergu kōse ge ǂhaba i; ǁaegu hâsa ǃnona metergu kōse ǂhaba tsî ǃnaon ǁîs din ge ǃnona tsî ǃkhare metergu kōse ge ǂhaba i. Tempeli di ǂnubiǂgoab ge mâ ǃgû-aiǂgapab ǀgapise hâb hoab tawa ǃnaka hâb xa ge ǀui i, ǃnā-omde Tempeli di ǂnubiǂgoab ǀkha omǀhaos ge ǁnās ǀkha ge ǂhâbasa tama hâ i.
7 Tempeli gere ǂnubi-ūhe ǀuidi ge ǁhāǂuihedi ra ǃkhaib ai gere ǂhomitoahe, Tempeli ra ǂnubihe ǃkhais ai i hamer-i kas, ǃō-i kas, ǀnî ǀurikuru-ūxū-i kas hoas di ǀō-e ǁnâusen tidese.
8 ǃNaka hâ ǁhao-oms di dao-ams ge ǃkhawagasǀkhāb Tempeli dib ai ge hâ i. ǁÎsa xu di ge ǃapa-ūdade ǀgamǁîs tsî ǃnonaǁî ǁhao-oms tsîra ǃoa gere ǂoa. 9 Nētib ge Salomoba Tempela ǂnubitoa tsî omǂamǃnâba sederhain ǀkha ge kuru. 10 Tempeli di ǂnubiǂgoab xōǀkhā ge omǀarohe ǃnā-omdi, ǀgam tsî ǃkhare metergu kōse ge ǀgapi ideb ge sederhaigu ǀkha Tempeli ǂnubiǂgoab ǀkha ge kuruǀhao.
11 Ob ge ǃKhūba Salomob ǃoa ge mî: 12 “Ti ǂhanugu tsî mîmādi tsînats ga ǁnâuǀnam, o ta ge sa îb Davida ta ge mîmâiban hoana satsa nî dība. 13 Tita ge ti ǁaes Israels tawa nē Tempeli ǃnâ nî ǁan tsî ta ge ǁîna tātsē ǁnāxū tide.”
14 Nētib ge Salomoba Tempela ge ǂnubitoa.
ǂGanagab ommi dib dītoahes
(2 Kroniks 3:8-14)15 Ommi di ǂnubiǂgoagu ge ǂganagab ai sederhaiǃnaogu ǀkha, ǃnakaba xu ǂamǃnâb kōse ge ǁguiǂuiǃnâsa i, tsî ǃgû-aiǂgapab ommi dib ge denehaiǃnaogu ǀkha ge ǁguiǂuisa i. 16 ǂGanaga hâ ǃnā-oms, Hoan xa ǃAnu, ti gere ǀonǂgaihes ge ǃgâbǀkhāb Tempeli dib ǃnâ ge kuruhe. ǁÎs ge khoese meterga ge gaxu i tsî ǃnakaba xu omǂamǃnâb kōse sederǃnaogu ǀkha ge omǀgorasa i. 17 Hoan xa ǃAnu ǃKhaib aiǃâ ge hâ i ǃnā-oms ge disiǁkhaisaǀa meterga ge gaxu i. 18 Sederhaigu ǃnâ di ge apadi tsî ǃkhādi tsîna ge ǃgaoǂuisa i. ǂGanagab hoab ge sederhain ǀguin ǀkha ge ǁguiǂuisa i tsî i ge ǀui-i tsîna ge mûsen tama hâ i.
19 Tsîb ge ǂganaga hâ ǃnā-oms Tempeli dis ǃnâ, ǃGaeǀhaos ǂGaes ǃKhūb disab ǁnāpa nî mâise ǃkhai-e ge ǂhomi. 20 Nē ǃnā-oms ge khoese meterga gaxu, khoese meterga ǂhaba tsî khoese meterga ge ǀgapi i; tsîb ge ǁîsa ǃūmû ǃhuniǀurib ǀkha ǃkhûǂuiǃnâ tsî altarsa sederhain ǀkha ge ǃkhûǀkhā. 21 ǂGanagab ommi dib hoabab ge ǃhuniǀurib ǀkha ge ǁguiǂuiǃnâ tsîb ge dao-ams, ǁîs tsîn ǃhuniǀurib ǀkha ǁguiǂuiǃnâsas, ais ai ǃhuniǀuri khedega ge ǃgae. 22 Tempeli hoaragab di ǂganagab tsî ǁkhāti altars Hoan xa ǃAnu ǃkhais ǃnâ mâs tsîn hoan ge ǃhuniǀurib ǀkha ge ǁguiǂuiǃnâsa i.
23 Hoan xa ǃAnu ǃkhais ǃnâb ge ǀkherahain ǀkha kurusa xerukha, mâb hoab ge koro metergu kōse ǀgapi ikha ge mâi. 24 Mâ ǁgabob xerub dib hoab ge ǀgam tsî ǃkhare metergu kōse ge gaxu i. ǀGui ǀamsa xu nau ǀams kōse kha ge ǁgabokha koro metergu kōse ge gaxu i. 25 Hoa xerukha ge ǀguitikō tsî ǁkhāti ǀguiti ge ī i. 26 Hoakha ge koro metergu kōse ge ǀgapi i. 27 Salomob ge ǁîkha Hoan xa ǃAnu ǃkhais ǃnâ ge mâi, ǀguiǀkhāb khoraǂuisa ǁgabokha âkha dib ge ǃnā-oms ǁaegub ǃnâ gere tsâǀkhāgu tsî nauǀkhāb ǁgabokha ge ǂnubiǂgoakha gere tsâǀkhā. 28 Salomob ge ǁîkha ǃhuniǀurib ǀkha ge ǃkhûǀkhā.
29 Dana ǃnā-oms tsî ǂganaga hâ ǃnā-oms tsîra di ǂnubiǂgoagab ge ǂganagab ǃnâs tsî ǃaugab ais tsîna, ǃgaoǂuisa xerugu, palmdi tsî ǃkhādi tsîn ǀkha ge ani. 30 ǃGû-aiǂgapab ǁîra dib on ge ǃhuniǀurib ǀkha ge ǁguiǂuisa i.
31 Hoan xa ǃAnu ǃkhaisab ge ǀkherahain ǀkha dao-amsa ge dība. Dao-ams haigu ge koroǁhôaxase ge dīsa i. 32 ǀKherahain ǀkha dīsa dao-amra ge ǃgaoǂuisa xerugu, palmdi tsî ǃkhādi tsîn ǀkha ge anihe hâ i tsîn ge ǁîn hoana ǃhuniǀurib ǀkha ge ǃkhûǀkhāhe hâ i.
33 Ommi dao-amra ramrab ge ǀkherahaigu ǀkha hakaǁhôaxase ge kuru 34 tsî dao-amrab ge denehain ǀkha ge kuru. Nē ǀgam dao-amra ge apusen rase ge kurusa i, 35 tsî mâs hoas ain ge xerukha, palmdi tsî ǃkhādi tsîna ǃgaoǂgāhe tsî hoana ǃhuniǀurib ǀkha ge ǃkhûǀkhāsa i.
36 Omǂnamibab ge Tempeli ais ai ge ǂnubi, ǃnona raiga ǁhāsa ǀuidi ǀkha tsî ǀguib sederhain ǀkha ge kurusa iba.
37 Hakaǁî kurib Salomob gaosis dib ǃnâ, ǀgamǁî ǁkhâb, Sifi ǃnâb ge Tempeli di ǃgaoǃgaoba ge ǁguihe. 38 Tsîb ge nē omma disiǀguiǀaǁî kurib Salomob gaosis dib ǃnâ, ǁkhaisaǁî ǁkhâb, Buli ǃnâ hoaragase ge dītoahe. Hû kurigab ge ǁîba Tempela ge ǂnubi.
© Khoekhoegowab Elobmîs © Bible Society in Namibia, 2020.
