Judits di ǀapes
1 Os Juditsa Betulias khoen ǃoa ge mî: “Ti ǃgâsado, toxopa ǃgâ te re. ǁGoaga nē danasa ū, î ǃās di ǂnubiǂgoab ai ǂgāmâi. 2 ǂGaeǂgui-aoba sadu ǃaroma ǁgaumâi, î sores ǁhaib ǀkha sadu ǀgaisa khoega ǀhaoǀhao, î gu ǁîgu ǁâtanina ū tsî ǁnā ǂgaeǂgui-aob ǀkha ǃāsa xu dāǁnâ, ǃgoaǃnāb ǃnâ ǁgôa tsî Asiriaǁîn hâǃkhaiba sī ra ǁnāǂam xū-i khami. 3 O gu ge Asiriaǁî toroǃkhamaoga ǃhaese ǁîgu ǁâtanina ū tsî toroǃkhamaogu di tentomdi ǃoa, ǁîgu di danakhoega gu nî sī ǂkhaiǂkhaise nî ǃkhoe-oa. Danakhoegu ge Holoferneb di tentoms ǃoa nî ǃkhoe, xawe sī hō bi tide tsîs ge hoaraga toroǂnubisa sago xa ǃao tsî nî ǁhâ. 4 O go ge sago tsî mâ Israelǁî-i hoa-e ǁîga ǃgôaǃgon tsî ǁhâ gu ra hîa nî ǃgam. 5 Xawe nēna go nî dīs aiǃâ Axiori, Amonǁîb sada ǀkha nî ǁōse ge ī iba ti ǃoa hā-ū. Tita ge nē danasab nî kō ǃkhaisa ǂhâba hâ, îb nē danas ǁnā khoeb, Israelǁîna gere ǃkhāǃkhāb di tama ǃkhaisa mûǃā.”
Axiori di ǃhobasens
6 On ge Axiora Usiab di omsa xu ge ǂgai. Xawe hā tsîb ge Holoferneb danasa ǀgui khoeb ǃomkha ǃnâ a mû, ob ge Axiora ǂnoaxūsen tsî ǃhūb ai ge ǁnā. 7 Tsî ūkhâiheb ge ob ge ǃgôasib ǀkha Judits aiǃâ ǃgamǃgâ tsî ge mî: “As mâ omaris hîa Judab ǃnâ hâs hoasa koa si tsî sa ǀonsa ra ǁnâu ǁaes hoasa ǃaob xa ǀkhū re. 8 Toxopa, mâtis ge nēsa hōbē ǃkhaisa mîba te re.”
Os ge Juditsa hoaraga khoen ǁîs ǂnamipe mâ hîa, ǃgûs ge tsēsa xu nēs ra ǃhoa ǁaeb kōse dīs ge xūn hoana ǁîba ge mîba. 9 Tsî ǃhoatoas ge on ge khoena ǃgâiaǂgaob xa ge ǃau tsîb ge ǃgâiaǂgaob di ǂkhupiba ǁîn di ǃās ǃnâ gere ǀgana. 10 Tsî Axiori ge Elob ge Israelǁaesa dība xūnab ge mû, o Elob ǃnâ ǁaposase ǂgom. ǁÎb ge aikhōb âba ǃgaohe tsî ge Israelǁaes ǀhûhâsib di ǁani kai ǁîb di ôananôagub ge nēsis kōse ǁnāti hâhâse.
Asiriaǁîn ge ra danhe
11 Sao ra ǁgoagan ge Israelǁîna Holoferneb di danasa ǃās di ǂnubiǂgoab ai ge ǂgāmâi. Tsîn ge hoana ǁâtanin âna ū tsî ǃnandi ǃnâ, ǃās aiǃâ ge ǁgoe i ǃhomgu ai ge ǃgûǂoa. 12 Asiriaǁîn ge tare-i ra ī ǃkhaisan ge mû, o haisi-e ǁîn ǃkhōdana-aogu ǃoa ge sî tsî gu ge ǁîga ǂamkhoega ge mîba. 13 O gu ge nē khoega Holoferneb tentoms ǃoa ǃgû tsî Bagoaba ge mîba: “ǃGôahesatse, ǃkhōdana-aoba ǂkhaiǂkhai re! ǁNā Israelǁîn ge sadan nî ǁnāǂamse ǃhomma xu ra ǁgôaxa; ǁîn ge hoaragase hîkākāhesa ra ǂgan.”
14 Bagoab ge tentoms ǃnâ ǂgâ tsî Holoferneb ganupe Judits ǀkha ǁgoe tib ge ǂâi hâ i xui-ao, dao-ams tawa ge ǃgubu-am. 15 Xawe khoe-i ge ǃeream tama i, ob ge ǁkhowa-am tsî ge ǂgâ tsî Holoferneb sorosa danas oses ǂgapab ai ǁgoese ge hō. 16 ǁÎb ge ǃgari dommi ǀkha ǂgaiǂui, ā, ǃgae, ǃau tsî saran âba ge ǀkhau. 17 Tsîb ge ǁnās khaoǃgâ Judits gere hâ tentoms ǃoa ge ǃgû. ǁÎsab ge hō tama i, ob ge ǃkhoeǂoa tsî danakhoegu ǃoa ge ǃhao: 18 “ǁÎra ge go gāxaǃnâ da! ǀGui Hebreǁî tarekhoes ge gao-aob Nebukadnesari di gao-ommi ǂama taosiba go hā kai. Kō hā re, Holoferneb ge ǃhūb ai ǁōǁgoe tsî danas âb ge a ǀkhai!”
19 Asiriaǁî ǂgaeǂgui-aogu ge nēsa gu ge ǁnâu, o ǃoab xa saran âga ǀkhau tsî kaise ge burugâ. ǁÎgu ge ǃaob xa ge ǃkhōhe tsîb ge ǁîgu di ǃau-āba hoaraga hâǃkhaib ǃnâ gere ǁnâuhe.
© Khoekhoegowab Elobmîs © Bible Society in Namibia, 2020.
