Oniab tsî Simonni hâkha ǁaegu hâ ǂnoagus
1 Oniab ǃNonaǁîb ge Jerusalems di ǀgapiprister i, ob ge ǂkhîb tsî ǃgâiǃgâb tsîna ǃanu ǃās ǃnâ ge hâ i, tsî ǁîb ge eloǃaoǃgâxa i tsî ǂkhababa ǃhuisa i xui-ao gu ge ǁîs di ǂhanuga ǁkhōse gere ǁnâuǀnamhe. 2 Siriab tsî Egipteb tsîkha di gao-aokha ge Tempela ge ǃgôa hâ i tsî ǁîba ǃgomǀgausa ǀkhaexūna ge ǀkhae 3 tsî gao-aob Seleukub Hakaǁîb, Filopator tis tsîna ge ǂansa ib, hoaraga Asiab di ǂgaeǂgui-ao ge ib ge Tempelǁguibade ǁgui-aimaris hîab ra hōǂgās ǀkha gere matare.
4 Xawe Simonni, Benjaminni ǃhaosa xu ge hâ ib, Tempeli di ǃkhōdana-aob ge ǂnoagu-i, ǃās di ǁamaguǃkhaib di ǂgaeǂuis xa gere ǃgû-e Oniab ǃoagu ge ǂoaǃnâ. 5 ǁNā ǁaeb ǃnâb ge Apoloniub Tarsus diba ge Kai Siriab di ǂgaeǂgui-ao i tsîb ge Simonna ǁîb ǃoa ǃgû 6 tsî ǃgôaheǁoasa kai ǃgôab di mari-i ge Tempeli di ǁuiǂgaes ǃnâ hâ i tsî mari-i ge ǁguibadi ǃaroma ǂhâbasa tama hâ i, amaga i nē mari-e gao-aob di mûǂams ǃnaka māhe, ti ge mî.
Heliodorub ge Jerusalems ǃoa ra sîhe
7 Apoloniub ge gao-aob ǀkhab ge ǀhao, o nē mari-i xa ǁîba ge mîba, tsîb ge gao-aoba ǁîb di xūn di mûǂamaob Heliodoruba nē mari-eb nî sī ū ǃkhaisa ge mîmā. 8 Heliodorub ge ǁnātimîsi sîheb ge ǃaromas ai ge ǃgû, xaweb ge Kai Siriab ǃādeb nî kōǃgâ ga ǀguib garu ti khoena gere mîba. 9 Jerusalems ǃnâb ge sī, ob ge ǀgapipristeri xa ǁkhorexase ge ǃkhōǃoahe, tsîb ge ǁîba ǀgapipristera saris âb xa mîǃāba tsî mîbaheb gen a ama ǃkhaisa ge dî. 10-11 ǀGapipristeri ge Simonni amaba ǃhoa tama hâ ǃkhaisa ge mîǃā. Tempeli di ǁuiǂgaes ǃnâ i ge mari-e ge hâ i, xawe i ge ǀnî ǃâ-e ǃoataradi tsî ǃguniǀgôan tsîn ǃaroma ge ǂnûiǂuihe hâ i tsî nau ǃâ-i ge Tobiab ôab Hirkanub hîa ǀgapi ǃharosa ūhâb di. ǁKhātib ge ǀoasa ǃgôab ge disiǃnonaǀaǀoadisi kiloxramgu ǀhaiǀuri tsî ǃnaniǀoadisi tsî korokaidisi kiloxramgu ǃhuniǀuri i ǃkhais tsîna ge mîǃā. 12 Hoaragase īǁoa ǃkhais ge khoe-i nî nē khoen, hîa ge ǃanusib tsî ǃnorasasib ǃhūbaib hoaragab ǃnâ ǃgôahesa Tempeli ǃnâ ǂgomǃgâsa ūhâna xu nē mari-e ū ǃkhaisa nî mā-amsa.
13 Xaweb ge Heliodoruba gao-aob ge mîmā khami i nî nē mari-e gaosi ǁuiǂgaes ǃoa ūhe ǃkhaisa ge ǂgaoǀkhā. 14 ǁNā-amagab ge tsē-e ǂnûiǂui tsî nē mariǃgôasa nî mûǂamse Tempeli ǃnâ ge ǂgâ. Nē ǃkhais ge khâikhâisensa hoaraga ǃās ǃnâ ge ǃaroma. 15 Pristergu, pristersi ǂamsaraga ana hâgu ge ais ǂama altars ais ai ǁnāǁgoe tsî ǁîb ge khoen ge Tempeli ǃnâ ǁguiǂgā mari-i nî ǁkhaubahe ǃkhais di ǂhanuga mā xui-ao, Eloba ge ǀkhoma îb mari-e sâu. 16 Tita ge ǀgapipristera ta ge mû, o kaise ge tsûaǂgao. ǁÎb di ais di ǀhaib ge ǁîb ǀoms di tsâba gere ǁgauǂui 17 tsî ǁîb soros ge ǃaob xa ǀkhū, ǂgaob tsûba ra ǁgauǂuise. 18 Khoen ge omdi âna xu ǀgoren nîse ge ǃkhoeǁare, îb Tempela tā ǃanuoǃnâ kaihe. 19 Tarekhoedi ge ǀnî saran ose, ǀhaon ǀkha kuruhe hâ kamanarokhoede ana hâse ǃgāngu ǃnâ ge ǀhao. ǂKhamkhoedi tātsēs tsîna ǃauga di nî hâ ǃkhaisa ǁgûn xa ge mā-amhe tama hâ idi ge dao-amdi tamas ka io ǂnubiǂgoagu ǃoa gere ǃkhoe, tamas ka io mûǂuidaodi ǃnâ-u ǀgui gere ǂui. 20 ǁÎn ge ǃomgu âna ǀhōǂui tsî Elob ǃoa gere ǀgore. 21 Tarekōse i ge ǀkhomǀkhomsa i ǀgapipristera ǁnāti ī tsâb tsî ǁaib ǃnâ mûs tsî ǃās ǃnâ hâ-i hoa-e ǀgomaǂâi tsî ais ǂama ǃhūb ai ǁgoese mûsa.
ǃKhūb ge ǁîb di Tempela ra ǁkhauba
22 Khoen hoan ge mari-i ǁîb sâub ǃnân ge ǂgomǃgâ-i nî ǁkhaubahe ǃkhaisa ǃKhūb Hoaǀgaixab ai ǀkhoma, 23 xaweb ge Heliodoruba ǁîb ǀapes ǀkha ge aiǃgû. 24 Xawe ǁîb tsî ǁîb ǃûi-aob hâkha ge ǁuib tawa hā, ob ge ǃKhūb hoa ǀgaiba ūhâba ai-īsi-e ge ǂhai kai, tsî i ge ǁnāpa gere Heliodorub ǀkha ǂgâ ǂgao-i hoa-e, Elob di ǀgaib xa burugâ tsî ǃaob xa ge ǂkhabu. 25 Nē īsib ǃnân ge hā-i tsî ǃgapi-aob tsîna ge mû. Hātoms ge kaise îsase ge anisa i tsî ǃhuniǀuri torosaraba ge ana hâ i ǃgapi-aob ge khoena gere ǃao kai. ǀAses timîsib ge hāba Heliodorub ǃoa ǃkhoe, khaoǃūgu ai mâ tsî aiǁkhoradi ǀkha ǁîba ge ǁhā. 26 Heliodorub ge ǁkhāti ǀgam ǀgaisa tsî anusa ǂkham khoekha, îsase ge ana hâ ikha ge mû. ǁÎkha ge Heliodorub di hoaǀkhākha ai mâ tsî ǁîba ǀkhomoǃnâse ge ǂnau. 27 ǁÎb ge ǃnapetamase ǂnora rase ǃhūb ai ge ǁnā tsî gu ge ǁîb khoega tani-ūxūb ai ǁgui 28 tsî ge taniǂui bi. Nēs nî īs aiǃâb ge nē khoeba, ǂgui khoegu tsî ǁîb di ǃûi-aogu ǀkha ǁuib ommi ǃnâ ge ǂgâ hâ i, xaweb ge nēsi aitsama ge huisen ǁoa i. ǁÎgu hoagu ge Elob di ǀgaiba ge mûǂan.
Oniab ge Heliodorub di ǂurusiba ra ǀgoreba
29 Heliodorub ge Elob di ǀgaiba mû tsî ge hōǃâ, tsîb ge ǃhoa ǁoase tsî ǂurub nî ǃkhais di ǃâubasen-e ūhâ tamase ǁnāpa ge ǁgoe i. 30 Xawen ge Jodeǁîna, Hoaǀgaixa ǃKhūba buruxa ǀgaub aib ge Tempela ǁkhauba ǃkhais tsî kai ǃgâiaǂgaoba ǃnubu ǁaeb ǃnâ ǃaob tsî ǂâiǂhansens ge hâ i ǃkhaib ai hā-ū ǃkhais ǃaroma ge koa. 31 ǀNî ǀhōsan Heliodorub din ge ǃhaese ǀgapipristeri Oniaba, Hoan xa ǀGapib ǃoab nî ǀgore, îb nē khoeb, hîa ǁōǁga rase ǁgoeb di ûiba sâuhe ga ge ǂgan. 32 ǁNā-amagab ge ǀgapipristera Elob nî Heliodoruba sâu ǃkhais di ǃâubasens ǃnâ ǁguiba-e ge dī. ǁÎb ge gao-aob nî nē khoeb, ǁîb ge sîb ǀkhan ge Jodeǁîna nēti dī ti ǂâi ǃkhaisa ge ǂgao tama hâ i. 33 Oniab ra nē ǁguibasa dī hîa kha ge ǀgam ǂkham khoekha ǀnai kha ge ana hâ i saran ǀguin ǃnâ hā tsî Heliodoruba ge mîba: “ǀGapipristera gangan, ǃKhūb go ǁîb ǃaroma sa ûiba sâu xuige. 34 Elob ǀhommi dib go ǁkhara tsi ǃkhaisa ǂâis ǃnâ ūhâ. Nēsi ǃgû, î mâ-i hoa-e ǁîb di kai ǀgaib xa mîba.” Nēsa kha ge mîtoa, o kha ge ge bē.
Heliodorub ge Eloba ra koa
35 Heliodorub ge ǃKhūb ge ǁîb ûiba sâu xui-ao ǁguiba-e ǁguiba tsî ǂgui mîmâide ge dī. ǁNās khaoǃgâb ge Oniaba tawedeǁnāxū tsî ǁîb toroǂnubis ǀkha gao-aob ǃoa ge oa. 36 ǁNāpab ge elon hoan xa ǀgaisa Elob ge tarena dī ǃkhaisa mâ khoe-i hoa-e ge mîba.
37 Gao-aob ge Heliodoruba, mâ khoebab nî ǁkhawa ga Jerusalems ǃoa hâ sîǂuis ǃnâ sî ǃkhaisa dî, ob ge Heliodoruba ge ǃeream: 38 “Khākhoe-ets ga ūhâ tamas ka iots ga sa ǂhanuba ra ǀapeǃgâ khoeba ǂan, o ǁîba sî. ǁÎb ge tsūse ǂnauhe hâse, hanab nî oahās kao, Elob di buruxa ǀgaib ǁnāpa ra sîsen xui-ao nî oahā. 39 ǀHommi di Elob ge Tempela ra ǃûi tsî ǁnā-i ǂkhôa nîse ra hā-e ǂnauǁgui tsî nî hîkākā.” 40 Nēs ge mâtib ge Tempeli di ǁuiba Heliodoruba xu sâuhe ǃkhais di ǂhôasa.
© Khoekhoegowab Elobmîs © Bible Society in Namibia, 2020.
