Babilonsa xu hâ sîsabegu
(2 Gao-aogu 20:12-19)1 ǁNā ǁaeb ǃnâb ge Baladanni ôab Merodaki, Babilons gao-aoba sîsabega sîǂkhanidi tsî ǀkhaexūn tsîn ǀkha Hiskiab ǃoa ge sî, ǁîb ge Hiskiab ge ǀaesen hâ i tsî a ǂgau ti ǁnâu xui-ao. 2 Hiskiab ge ǁîga ge ǁkhoreǁhare; ǁîb ge ǁîga ǁîb ǁui-oms, ǀhaiǀurib, ǃhuniǀurib, ǂûǁkhoaǁkhoaxūn, ǀō-aisa oli-i, hoaraga ǁâtanin âb, tsî hoaraga xūn ǁîb sâu-ommi ǃnâ hân tsîna ge ǁgau. Hoaraga xūn ǁîb ommi ǃnâ hân tamas ka io ǁîb ǃkhaib ǃnâ hân hoanab ge Hiskiaba ǁîga ge ǁgau. 3 Ob ge kēbo-aob Jesajaba gao-aob Hiskiab tawa hā tsî ge mî: “Tare-e gu nē khoega ge mî? Mâpa xu gu ǁîga ge hā?”
Ob ge Hiskiaba ge ǃeream: “ǁÎgu ge ǃnū ǃhūb Babilons diba xu ge hā.”
4 Ob ge ǁîba ge mî: “Tare-e gu ǁîga sa ommi ǃnâ ge mû?”
Ob ge Hiskiaba ge ǃeream: “Ti ommi ǃnâ hâ xūn hoana gu ge ge mû; ti sâu-oms ǃnâ hân hoana ta ge ǁîga ge ǁgau.”
5 Ob ge Jesajaba Hiskiab ǃoa ge mî: “ǃKhūb Hoaǀgaixab di mîde ǃgâ re: 6 Tsēdi ge nî hā, sa ommi ǃnâ hâ xūn hoan tsî nētsēs kōse gu sa aboxaga sâu hân hoan, Babilons ǁga nî tanibēhede. Xū-i xare-i ge ǃgauhe tide, tib ge ǃKhūba ra mî. 7 ǀNîgu, sa ǂhunuma ǀgôagu digu hîats ge ǁorabahegu, ge nî ūbēhe; ǁîgu ge Babilons gao-aob gao-ommi ǃnâ dabisagu ase nî hâ.” 8 Ob ge Hiskiaba Jesajab ǃoa ge mî: “ǃKhūb mîs hîats go ǃhoas ge a ǃgâi.” ǁÎb ge ǂâi xui-ao: “Ti tsēdi ǃnâ kha ge ǂkhîb tsî sâsasib tsîkha nî hâ.”
© Khoekhoegowab Elobmîs © Bible Society in Namibia, 2020.
