Dans di ǀgores
ǁNaeǃnans ǂgaeǂgui-aob ǃoa.
Davidi Psalms
1 Ab ǃKhūba ǂōǂōsib tsēs ai ǁnâu-am tsi re!
Ab Jakob Eloba sâu tsi!
2 Ab ǁîb di Tempela xu ǃnâǃkhoe tsi
tsî Sionǃhomma xu ǂkhâǃnâ tsi re.
3 Ab hoaraga ǁguibadi âtsa ūǃoa
tsî hoaraga ǁguibadi âts ǀkha ǂkhîǂâixa.
4 Ab sa ǂgaob ra ǁkhorena mā tsi
tsî ǀapedi âts ǃnâ ǃgâiǃgâxa kai tsi re.
5 Sida ge sa dans xa nî dâ
tsî da ge sida Elob ǀonsa sa dans ǂama nî kare.
Ab ǃKhūba sa ǁkhoregu hoaga dīǀoaǀoa.
6 Nēsi ta ge ǃKhūb ra ǁhûiǂuib hâ gao-aoba dansa mā ǃkhaisa a ǂan;
ǁîb ge ǁîba ǃanu ǃhommi âba xu ǃeream
tsî ǁîb ǀgaiba xu dansa ra mā.
7 ǀNîn ge torokunidi ân ai ra ǂgomaiǂnûi
tsî ǀnîna ǁîn di hān ai,
xawe sida ge sida ǃKhū tsî Elob di ǀgaib ai ra ǂgomaiǂnûi.
8 ǁNāti ī khoen ge ǃnôa tsî nî ǁnā
xawe da ge sida khâi tsî ǁaposase nî mâ.
9 O ǃKhūtse gao-aoba dansa mā re;
î ǂgai da kao ǁnâu da re.
© Khoekhoegowab Elobmîs © Bible Society in Namibia, 2020.
