ǃNaniǁî mîǀgaub
1 Dana ǂgaeǂgui-ao-i ǀkhats ga ǂûǀhao, o ǃgâise ǃgaoǃgâ tari-i ǀkhats a ǁaxa ǃkhaisa. 2 Kaisets ga ǂûna, o sa ǂûǀgauba ǀoroǀoro. 3 Tā dana ǂgaeǂgui-ao-i ra ǂû ǁkhoaxa ǂûna tura, ǁîn nî ǂgaeǂhapu tsi xuige.
Hûǁî mîǀgaub
4 Tā ǃkhūsib ǃaroma dītoasen; gā-aisib ǀkha ǁkhaesen. 5 ǃKhūsib ge hāb ra khami ǃhaese ra ǃkharu; ǁîb ge ǁnātimîsi ǁgapokha hō tsî ǃariǃkhās khami ǂoab ǃnâ ra ǁkhanabē.
ǁKhaisaǁî mîǀgaub
6 Tā xūǃgunuxa khoe-i ǀkha ǀguipa ǂû; tā ǁî-i ǁkhoaxa ǂûna tura. 7 ǁÎ-i ge ǀoms â-i ǃnâ mâtikō ǂgui marin nî matarehesa ra ǃgôakhâi khoe-i khami ī. ǁÎ-i ge “ǂÛ î ā” ti sa ǃoa ra mî, xaweb ǂgaob â-e ǂgao tama hîa. 8 ǂKhari ǂûro-i hîats go ǂû-ets nî ǀkhûiǂui tsîts ǃgâi mîdi âtsa nî ǁauǁau xuige.
Khoeseǁî mîǀgaub
9 Tā sa mîde gâre khoe-i ai ǂkhôa, ǁî-i sa gā-ai mîde nî ǃharaxū xuige.
Disiǁî mîǀgaub
10 Tā ǀoro saoǁnâuǀuisa ūbē tamas ka io ǃguniǀgôan di ǃhūǃâsa ǀhana. 11 ǁÎn di Sâu-aob ge a ǀgaisa tsî ǁîna sats ǃoagu nî ǂnoaba.
Disiǀguiǀaǁî mîǀgaub
12 Sa ǂgaoba sa ǁgauǃnâs ai ǃammâi tsî sa ǂgaera ǂans di mîdi ai.
Disiǀgamǀaǁî mîǀgaub
13 Tā sa ôa-e ǂgōǀausa ǀû, ǃnabas ǀkha ǁî-e ǂnaus ge ǁî-e ǃgam tide. 14 ǁÎ-e ǃnabas ǀkha ǂgōǀaus ge ǁî-e ǁŌhân Hâǃkhaiba xu nî sâu.
Disiǃnonaǀaǁî mîǀgaub
15 Ti ôatse, gā-ai ǂgaobats ga ūhâ, o ta ge tita tsîna nî ǃgâiaǂgao. 16 Ti ǀoms ge nî ǃgâiaǂgao, sa amǁgaukha ga ǂhanuse ǃhoao.
Disihakaǀaǁî mîǀgaub
17 Tā ǁore-aon ra dī xūna tura, xawe hoaǁae ǃKhūb di ǃaoǃgâb ǃnâ ûis ǀkha aiǃgû. 18 Ots ge amase ǃgoaxa ǁaeba ūhâ tsîs ge sa ǃâubasensa ǁkhaehe ǁkhā tide.
Disikoroǀaǁî mîǀgaub
19 Ti ôatse, ǃgâ î gā-ai re, î sa ǂâisa ǂhanu daob ai ǃammâi re. 20 Tā ǀhoroseman tsî ǁganō-aon tsîn ǀkha ǀguipa hâ. 21 ǀHoroseman tsî ō-aon tsîn ge nî ǀgâǂnû tsîb ge ǁîn ǀopesasiba ǀoro tsî ǀharexa saran ǀguin ǀkha ǁîna nî ǃgau kai.
Disiǃnaniǀaǁî mîǀgaub
22 Sâ îb satsa ûib ǃnâ ge ǀkhī-ūba ǃgâ, î sa îsa kairas ka, o tā sora.
23 Amaba hōbasen, tā ǁîba ǁamaxū; gā-aisib, ǃgâi ǂūsib tsî ǁnâuǃāb tsîga hōbasen.
24 ǂHanu-ai khoe-i di îb ge nî ǃgâiaǂgao; gā-ai ǀgôa-e ga ǁora khoe-i ge ǁî-i ai nî ǂnīsa.
25 A ra sa îb tsî îs tsîra ǃgâiaǂgao, as satsa ge ǁorasa dâ.
Disihûǀaǁî mîǀgaub
26 Ti ôatse, sa ǂgaoba mā te re tsî a ra sa mûra ti daoba ǃgaoǃgâ. 27 ǀAi-aos ge ǃgam āb khami ī xui-ao; ǃgame khôa-aos ge ǂō tsaus khami ī. 28 ǃNari-ao-i khamis ge ǁîsa ǃâuǁgoe tsî ǂgomoǃnâ khoegu di ǃgôaba ra ǃnā kai.
Disiǁkhaisaǀaǁî mîǀgaub
29 Tari-e ǂōǂōsib ǃnâ hâ-e? Tari-e ǃoab ǃnâ hâ-e? Tari-e ǂkhabab ǃnâ hâ-e? Tari-e kaise ra ǃhoa-e? Tari-e ǃaroma i ose ǂnau-amde ūhâ-e? Tari-i mûra ǀapa? 30 ǁNān ǃkhariǃkhōs ǃnâ ǀgui ra hân ge, ǁnān ǃkharagaǃnâgu ǂauxûiba ra ān ge. 31 Tā ǂauxûib di ǀapa īsib tsî āǃnâxapas ǃnâb ra ǂkhai tsî ǁkhoaxase ǁgôa ǃkhais xa ǂgaeǁnâhe. 32 ǀAms ai i ge ǁî-e ǀaob khami nâ tsî ǃgais khami ra ǃkhā. 33 Sa mûra ge ǀkhai a xūna nî mû tsî ǀhomaxa xūna nî ǃhoa kai tsi. 34 Hurib ǁaegub ǃnâts ǁgoe khamits nî tsâ, ǀhommi ǃnâts ǀgapise ǁkhana garu khami. 35 Sats ge nî mî: “ǂNauhe ta hâ, xawe ta ge tsûtsûhe tama hâ! ǂNau ten hâ, xawe ta ge hōǃâ tama hâ! Xare khâi ta kha nî? Tita ge ǁkhawa ǀnî ǂauxûi-e nî ôabasen.”
© Khoekhoegowab Elobmîs © Bible Society in Namibia, 2020.
