ǀGom mâsib Jerusalems ǃnâ
1 ǃKhūb Hoaǀgaixab ge Jerusalems tsî Judab tsîna xu hoa ǁkhaubas di ǁkhāsigu, ǂûn tsî ǁgam-i tsîn hoana nî ūbē; 2 ǃgari-aogu tsî toroǃkhamaogu, ǀgoraǃgâ-aogu tsî kēbo-aogu, ǀkhū-aogu tsî ǂgaeǂgui-aogu; 3 korodisigu ǃnandi danakhoegu, ǃgôahesa ǃhūǁîn, ǀapemā-aogu tsî ǃgaidīs ǂansa ūhâgu tsî ǀkhūǂnau-aogu tsîn hoana. 4 ǃKhūb ge ǀgôaroga ǁîn gao-aogu ase nî dī; ǂkham khoegu ge ǁîna nî ǂgaeǂgui. 5 Khoen ge ǁîǃnābe nî ǁgâiǀāgu, nē-e nau-i xa tsî mâ-i hoa-e ǁî-i ǀgūkhoe-i xa. ǂKhamn ge kaina nî mâǃoa tsî xū tama khoen ge ǁîn ǀhonkhoena ǃgôasiba mā tide.
6 ǀNî khoeb ge ǁîb ǃgâsaba ǁîb îb oms ǃnâ ǃommi ai ǃkhō tsî nî ǀkhoma: “Sats ge saraba ūhâ, sada omaris dana kai re! Nē ǀapob hoab ge sa ǂgaeǂguis ǃnaka nî hâ.”
7 Xaweb ge ǁîba ǁnātsē ǃgari dommi ǀkha nî mî: “Tita ge ǂgauǂgau-ao tama ta, ǂû-i tamas ka io sara-i ge ti oms ǃnâ a ǀkhai; tā tita khoen ǂgaeǂgui-aose dī.”
8 Amases ge Jerusalemsa ge ǃnôa tsî Judab ge ge ǁnâ; ǁîn ra ǃhoa tsî dī xūn ge ǃKhūb aiǃâ anu tama hâ; ǁîn ge ǁîb ǂkhaisib ǃoagu ra khâikhâisen. 9 ǁÎn aidi īsib ge ǁîn a ǀhapixa ǃkhaisa ra ǀhûǀgui. Sodoms khamin ge ǁîna ǁîn ǁoreb xa ǂhaisase ra koasen. Tsūba ǁîn di ǀomsa! ǁÎ-aitsaman ra tsūdīsen amaga.
10 ǂHanu-ai khoen nî ǃgâiǃgâ, ǁîn ge ǃgâisen ge dī xūn ǃaroma nî mādawa-amhe. 11 Tsūba, eloxoresan ǃaroma! ǁÎn ge dīn gen ǀguina nî matare-oahe.
12 Ti ǁaese, ǀgôaron ge ǁîna nî ǁgâiǀā tsî taradi ge ǁîna nî ǂgaeǂgui.
Ti ǁaese, sadu ǂgaeǂgui-aon ge sado ǂgaeǂhapu tsî tsū daogu ai ra ǂgaeǂgui.
ǃKhūb ge ǁîb khoena ra ǀgoraǃgâ
13 ǃKhūb ge khoen âb ǃoagub nî ǂnoaguse a ǂhomisa, ǁîb ge ǁînab nî ǀgoraǃgâse ǃâumâ. 14 ǃKhūb ge ǁîb ǁaes di ǂgaeǂgui-aogu tsî ǂamkhoegu tsîgu ǀkha ǀgoraǃgâs ǃnâ ǂgâ tsî ǁîgu ǃoa ra mî: “Sago ge draibeǃhanaba ge hîkākāgo! Sago omdi ge ǀgâsana xu go ge ǃnari xūn ǀkha ǀoaǀoasa. 15 Tare-i ǃaroma go ti ǁaesa dāǃgâ tsî ǀgâsana ǃgâi tamase ra ûi-ū? Tita ǃKhū Elo Hoaǀgaixata ge nēsa go mî.”
ǃKhâikhoms Jerusalems tarekhoedi ǃoagu
16 ǃKhūb ge ge mî: “Sions di tarekhoedi ge a ǂnīsa. ǁÎdi ge ǃhū-i ai dā tama khami, ǂgaeǂhapuxa mûdi ǀkha ra ǃgû, ǃgorodi âdi ai hâ ǃganudi garu ra ǀōse. 17 ǁNā-amagab ge ǃKhūba Sions tarekhoedi ǃūde khōǀaesenni ǀkha nî ǁkhara; ǁîdi danaǀûna ǂkhomǁnâ tsî ǁîde nî ǃgoradana kai.”
18 ǁNā tsēs aib ge ǃKhūba ǁîdi ǃgorodi ai hâ îsa ǃganudi, danadi ai ǃgaesa ǃkhaigu tsî ǃaogu ai hâ karagu tsîna nî ūǁnâ. 19 Tsî ǁkhāti ǁîdi ǂgaeradi, kamanakaragu tsî ǃaob ǃkhaigu tsîna. 20 ǁÎdi ǀgapadi, ǁîdi ǃganudi ǃomgu tsî kamanagu ai hâdi, ǃgâihamxūxapadi tsî ǃoredi; 21 ǀkhunuǂnûidadi tsî ǂguirâidi tsîna; 22 ǁâudīb rokhoedi, saragu, ǃkhaigu tsî mariǁgarudi tsîn hoan; 23 mûǃkharuǃnâsenhe ra saragu, tsaura lapisaran, ǃkhaigu tsî ǃaob ǃkhaigu tsîn hoana nî ūbē.
24 ǃGâihamxūn ge ǀō hammi ǀkha nî ǃkhōǃkhunihe; tsaura îsa kamana lapiǃgaesenna tsurib ǀkha; îsa ǀûn ge ǂgās ǀkha nî ǃkhōǃkhunihe; îsa ǃkhaisaraba ǀhaosarab ǀkha; ǁîdi anusib ge taob ǀkha nî ǃkhōǃkhunihe!
25 Saso aorekhoegu ge gôab xa nî ǃgamhe tsî ǀgaisa ǃkhamaogu hoagu ge ǃkhammi ǃnâ nî ǁō. 26 ǃĀs di dao-amdi ge ǃoa tsî nî ǃgae; ǁîs khoena ǀhanahe hâses ge ǃhūb ai nî ǂnû.
© Khoekhoegowab Elobmîs © Bible Society in Namibia, 2020.
