1 ǃUi i ge, on ge ǁkhausabena ǃhaese ge ǁaru. Ob ge Bagoaba tentomsa ǃaugaba xu, ǃgān ǂgâ-oa tidega ge ǂganam. ǂÛǁares ge kaise gaxuse ū tsîn ge hoatsama tsau hâ i xui-aon ge ge ǁomǃgû. 2 Judits ge ǀguri tentoms ǃnâ, Holoferneb hîa ge ǀhoro hâse kharob âb ai ǁgoe ib ǀkha ge ǁnāxūhe. 3 Judits di khobos ge ǁîsa tentoms ǃauga, mâ tsuxub hoabas gere dī khamis nî sī ǀgorese ge ǃâumâ i. Judits ge Bagoab tsîna ǀnais gere dī khamis nî ǂoa tsî ǀgore ǃkhaisa ge mîba hâ i.
4 Hoaraga ǁâudī-aon tsî ǃgān tsîn ge ge oa hâ i tsîra ge Judits tsî Holoferneb hâra ǀguri tentoms ǃnâ ge hâ i. Judits ge Holoferneb di kharob tawa mâ tsî ǃnōsasib ǃnâ ge ǀgore: “ǃKhū, Elo Hoaǀgaixatse, nē ta ra dī ǃkhais ǃnâ Jerusalems di ǃgôasib ǃaroma hui te re. 5 Nēsib ge sa ǁhûiǂuisa ǁaesats nî ore ǁaeba go ǀoa, xuige ti ǀapes, sida ǁnāǂamsa ra ǀape khākhoena ta ra hîkākā ǂgaos ǃnâ hui te re.” 6 Judits ge Holoferneb kharob di danaǂams tawa sī tsî ǁîb di gôaba ge ū. 7 ǁÎs ge mâǀgū tsî Holoferneba ǀûgu ai ǃkhō tsî ge ǀgore: “ǃKhū, Israelǁaes di Elotse, nēsi ǀgaiba mā te re.” 8 Tsîs ge Juditsa ǁîs di ǀgaib hoab ǀkha ǀgam ǃnāra ǃaos âb ai ǁhā tsî danas âba ge ǁhāǁnâ. 9 ǁNās khaoǃgâs ge soros âba kharoba xu ge ǂhāǁnâ tsî ǀûitsin di ǀûisa kharob di ramsa xu ge ūǁnâ. Tsîs ge ǂoaxa tsî Holoferneb di danasa khobos âsa ge mā, 10 îs ǂûn ǁgarub ǃnâ ǂgā.
Judits tsî khobos tsîra ge Betulias ǁga ra oa
O ra ge nē ǀgam khoera ǀhaosase ge ǃgûǂoa, hūga ra ge ǀgoreǃgû ra gereo, gere dī khami. Asiriaǁîn di hâǃkhaib ǃnâ-ū ra ge ǃkharus khaoǃgâ ra ge ǃgoaǃnāb ǃnâ ǃkharu tsî ǃhommi ai ge ǂoa Betulias dao-amdi tawa ra ge sīs kōse. 11 Ganupe ra ǀgūtoa tama hîas ge Juditsa daoǃûi-aogu ǃoa ge ǂgai: “Dao-amsa ǁkhowa-am re! Dao-amsa ǁkhowa-am re! Sada Elob ge ganupe sada ǀkha hâ. Nētsēb ge ǁkhawa ǁîb ǀgaiba Israelǁaes ǃnâ go ǁgau tsî ǁîb di ǀgaiba sada khākhoen ǃoagu go sîsenū.”
12 Khoegu ge ǁîs domma gu ge ǁnâuo, dao-amde ǃoa ǃnoeǃnoesen tsî ǃās di ǂgaeǂgui-aoga ge ǂgai. 13 Hoatsaman ge ǂkhamn tsî kain tsîna dao-ams ǁga ge ǃkhoe. ǀGui-i tsîn ge Judits go oahā ǃkhaisa ge ǂgom tama hâ i. ǁÎn ge dao-amsa ǁîs tsî ǁîs di khobos tsîra ǁkhowa-amba tsî ǁîra ge ǁkhoreǁhare. ǃNâba nî māsen ge ǀae-e khau tsî nē ǀgam khoera ǂnamipe a ǀhao, 14 os ge Juditsa ge ǂgaiǂui: “Eloba koa re, ǁîba ǃgôasiba mā re! Israelǁaesa xu ǀkhommi âba ǂgae-oa tama Eloba koa re. Nē tsuxub ǃnâb ge tita go sîsenū, sada khākhoenab nî hîkākāse.”
15 ǁNās khaoǃgâs ge danasa ǂûn ǁgaruba xu ūǂui tsî khoena ǁgau tsî ge mî: “Nēs ge Holoferneb, Asiriaǁî toroǂnubis ǃkhōdana-aob di danasa tsî ǀûitsin di ǀûis, ǁîb di kharob, ǀhoro hâseb ge ǁgoe-ai ib dis tsîna. ǃKhūb ge ǁîba nî ǃgamse tarekhoesa ge sîsenū. 16 ǃKhūb ûi hâ ǃkhais ao ta ge ra nū, Holoferneb tātsēs tsîna tsâǀkhā te tamasa, xaweb ge ti îsasib xa ǁîb di hîkākāhes kōse ge ǂgaeǂhapuhe. Tita ge ǁîb xa ǀgaiǃkhōhe tsî taotaohe tama hâ. Elob ge nēn hoan ǃnâ tita ge sâuǃkharu.”
17 ǃĀs di khoen hoan ge kaise ge burugâ. ǁÎn ge ǃgamǃgâ, Eloba ǀgoreǀî tsî hoatsama ge ǀgoreǀhao: “Koahesats ge anu sida Elots, nētsē go sa khoen di khākhoena dantsa.”
18 Ob ge Usiaba ge mî: “Judit, ti ǃgôahesase, Hoan xa ǀGapi Elob ge ǃhūbaib di khoedi hoadi ǃnâ sasa ǃnāǂamsase ǀkhae hâ; ǃKhūb Elob, ǀhommi tsî ǃhūbaib tsîkha ge ǂnubib ge koahesa anu hâ. Elob ge sada ǁkhōǁkhōsa khākhoeb di danasas ge ǁhāǁnâ, o sasa ge ǂgaeǂgui. 19 Sa ǂgomǃgâs hîas Elob ǃnâ ūhâs ge ǁnān hîa Elob di ǀgaib xa ra ǃhoan xa tātsē ǀuruhe tide. 20 Ab Eloba ǀamo ǃgôasiba dīs gen ǃaroma mā si re. Ab ǀkhaegu ǀkha mādawa-am si re, sas ǁîb ǃoagu ǂgomǂgomsa tsîs ge îganǀgē tamase, sa khoenas ǁgâiǀāba xu nî orega sa ǂhunuma ûiba ǃaorosasib ǃnâ mâi amaga.”
On ge hoa khoena “Amen, Amen” ti ge ǃeream.
© Khoekhoegowab Elobmîs © Bible Society in Namibia, 2020.
