1 Tita ge a Tobit tsî nēb ge ti ûiǂgaroba. Ti îb ge ge Tobiel i, ti ǁnaosaba Ananiel tsî ti kai ǁnaosab ge ge Aduel i. Adueli îb ge ge Gabael i, ǁîb ǁnaosaba Rafael tsî ǁîb kai ǁnaosab ge ge Raguel i, Asieli ôananôagub tsî Naftalib ǃhaos di ge iba. 2 ǁNā ǁaeb ǃnâb ge Salmanesera ge Asiriaǁîn di gao-ao i. Tsî tita ge ti ǁanǃās, Tisbes hîa Galileab di ǀapasǀkhāb, Kades ǃkhawagas Naftalib dis ǃnâ, ǀapas huriǂoas Hasori dis tsî ǀapas Fogori dis ǃnâ ǂnôas ǃnâ ǃkhōsis ǃnâ ge ūhe hâ i.
Tobiti ge Eloba ǂgomǂgomsase ra ǃoaba
3 Ti hoaraga ûib ǃnâ ta ge amab tsî ǂhanu-aisib tsîkha ǀguikha ta nî dī ǃkhaisa gere dītsâ. Tita ge ǂhâb ǃnâ hâ ǀaokhoen tsî horesa Jodeǁîn tita ǀkha ge Asiriab danaǃās, Nineves ǁga ǃkhōsis ǃnâ ǁgariǃgû-ūhe hâ ina ta nî huise mari-e ge mā.
4 ǂKham ta ge i tsî Israeli ǀapasǀkhāb ai ǁan hâ i, o di ge hoaraga ǃhaodi Israeli ǃnâ ge hâ ide, ǁguibade Eloba Jerusalems ǃnâ nî ǁguibase ge ī i. Nē ǃās ge hoaraga ǃādi Israelǁaes didi ǁaegu, ǁnāpab nî Tempela ǂnubihe tsîb Eloba ǁnāpa ǀamose nî ǁanse ge ǁhûiǂuihe. Xawen ge ti hoaraga khoen, Naftalib ǃhaos dina Jerusalems tsî gao-aogu Davidi di ôananôaguba xu ge hâ iga ǂgao tama ge i. 5 Ti ǂhunuma ǀaokhoen tsî hoaraga khoen nē ǃhaos din ge Dans, Galileab ǃhomgu ǀapasǀkhāb ǃnâ ǂnôas ǃoa gere ǃgû, ǁnāpan ǁguibade Jerobeammi ge mâi ǃhuniǀuri ǁgōb di ība nî ǁguibase.
6 Tita ge ti ǀaokhoen ǃnâ hūs di ǀguita, Jerusalems ǃoa gagasi ǁâudīgu ǁga Moseb ǂhanub ra khoe-i hoa-e ǁgui-ai khami gere ǃgû ta. Tita ge ǁnaetisase Jerusalems ǃoa ǂguro ǃâs ti ǃgaos dis, ǂguroǃnaesan ǀgoan din, disiǁîǃâs ti goman dis tsî ǂguro ǀûn, ti gūna xu ǂkhomhe hân din ǀkha gere īǁkhā i as kōse ǃnoe ta. Tsî ta ge Tempeli ǃnâ altars aiǃâ mâ tsî ǁîna Aronni ôananôaguba xu hâ pristerga gere mā. 7 Tita ge disiǁîǃâs ti ǃhoro-i, ǂauxûi-i, ǀkhera-oli-i, xranatn, ǀnoman tsî ǀnî haiǂûn tsîn disa Levib ôagu, Jerusalems ǃnâ gere Eloba ǃoabaga gere mā. Hûǁî kurib, ǃhanab ra sâb ǀguib ose ta ge mâ kurib hoaba ǀgamǁî, disiǁîǃâs ti ūhâxūn disa ǁamaxū tsî ǁnā mari-e Jerusalems ǁâudīb tawa gere sîsenū.
8 ǂKham ta a hîab ge ti îba ge ǁō tsî ta ge ge ǃguniǀgôa kai. Ti ǁnaosas Deboras ge mîmādi, Moseb ǂhanub dide ta nî ǁnâuǀnam ǃkhais tsî ǃguniǀgôan, ǃoataradi tsî ǃhaokhoen sida ǂgoms ǃnâ ge ǃhobasenna ǃkhōǂhomi ti ra mîde ge ǁkhāǁkhā te. ǁNā-amaga ta ge mâ ǃnonaǁî kurib hoab ǃnâ, ǃnonaǁî disiǁîǃâs ǃgaos disa nē khoena mā tsî ǁâudīb ǂûsa ǁîn ǀkha gere ǂûǁare. 9 Kaikhâi ta ge, o ta ge ti ǂhunuma ǃhaos di ǁanis, Annasa ge ǃgame. Tsî axarobam ge hō, om ge ǁîba Tobias ti ge ǀonǂgai. 10 Ega ta ge ǃkhōhe tsî Asiriab ǁga sîbēhe tsî ǁnā ǀgaub ai Nineves ǃnâ sī ge ǁan.
Nineves ǃnâ da ǁan hâ hîan ge ti ǀaokhoen hoan tsî horesa Jodeǁîn tsîna, Jodeǁî taman ǁnāpa ge ǁan hâ in gere ǂû, ǂûǃnôan ǁkhāna gere ǂû, 11 xawe ta ge tita ǁnāsa dīsa ge ǂkhā. 12 Elob di mîmāde ǁnâuǀnams a ǂhâǂhâsaba te xui-aob 13 ge Hoan xa ǀGapi Eloba ǁnāti ge dī, îb gao-aob Salmanesera tita ǃgôasiba mā. Sao raseb ge tita gao-ommi xūna ta nî ǁamaba bise ge ǁgaumâi.
14 Gao-aob nî ǁōs aiǃâ ta ge ǁnaetisa ǃnaride Mediaǃhūb ǁga, ǁîba ta sī xūna nî ǁamabase gere ǃgû. ǀGui ǃnā-e ta Rages, Mediaǃhūb ǃnâ ǂnôas tawa hâ hîa ta ge ǀnîkhamakō ǁhōdi marina Gabaeli, Gabriab di ǃgâsab ǀkha ǁnāpa xu tsî ǁîba ge ǂgan, îb ūǀgaraba te. Nē ǁhōdi ǃnân ge ǁaubexa ǃnonakaidisi kiloxramgu ǃgomma ūhâ ǀhaiǀuri marina ge hâ i. 15 Tsî Salmaneseri ge ǁō, ob ge ǁîb ôab Sanheriba ǁîba gao-aose ge saoǃgon. ǁÎb di ǂgaeǂguis ǁaeb ǃnâs ge Mediab ǁga garu daob ai ǃnarisa ge ǃaorosa i tsî ta ge ǃaruǀî ǁnāǀî ge ǃgû ǁoa i.
Tobiti ge ǁō hâna ra ǁkhō
16 Salmaneseri ge ûi hâ i ǁaeb ǃnâ ta ge ti ǀaokhoena ǂhâsib ǃnân gere hâo ǃgâise gere ǃkhōǂhomi. 17 ǃÂsan ge i, o ta ge ti ǂû-e ǁîn ǀkha gere ǀgoragu; saranan gere ǂhâba, o ta ge ǁîna ti sarana xu gere mā. Tsî ti ǂhunuma khoen ǀgui-i di ǁō hâ soros, ǃās di ǂnubiǂgoab ǃauga aoǂuihe hâ ǃkhaisa ta ga mû, o ta ge ǁî-e ǂoaǂamsa ǁkhōsa gere dība.
18 Nē gao-aob Sanherib ge ǀû tamase Elob, Gao-aob ǀHommi diba gere ǀâxare; sao raseb ge Eloba ge ǁkhara bi tsîb ge Judaba xu ge ǁnā-oa. Mediab ǁgab oagaru hîab ge ǁnātikōse ǁaixa tsî ǂgui Israelǁîna ge ǃgam. Xawe ta ge ǁîn sorode ǂganǃgâsib ǃnâ ūbē tsî ge ǁkhō. Sanherib ge egab ge nē sorode ôa, xawe ǁîde hō tama ge i.
19 ǀGui khoe-i, Nineves di-i ge ǁîb ge ǃgam khoena ta ge tita ǁkhō ǃkhaisa gao-aoba ge mîba. Gao-aob hoa xūna tita xa a ǂan tsîb ti ûiba ǃaorosasib ǃnâ hâ ǃkhaisa ta ge ǂanǃnâ, o ta ge ǃaob xa ge ǃkhōhe. Tsî ta ge ǁnātimîsi ǃkhoeni tsî sī ge gau. 20 Ti ǂhunuma xūn hoan ge ge ǁkhâuhe tsî ta ge xūose ge ǁnāxūhe. Ti taras Annas tsî ti ôab Tobiab tsîra ǀkha ǀgui ta ge ge ǃgau.
Tobiti ge ǁnurisab xa ra huiǂuihe
21 ǁAubexa ǃnani wekhegu ǃkharu hâse kha ge Sanherib ôakha ǁîba ǃgam tsî ǁnās khaoǃgâ Araratǃhomgu ǁga ge ǃkhoeni. ǀNî ǀgôab, Esarhadonni ge ge gao-ao kai tsîb ge Ahikari, ti ǃgâsab Anaeli ôaba, mariǁhōgu gaosib diga ǃûiǃgâs ǃaroma ge ǁgaumâi. 22 Nēs ge ǀgamǁî ǃnās Ahikari nē soas ǃnâ ra ǁgaumâihesa. Sanherib ge Asiriab gao-ao i, ob ge Ahikara gao-aob ǂauxûiǂnâ-ao, marimûǂamao, mariǃgôa-ao tsî ǁkhāti gaosi ǁgauǁgaus di ǀkhunuǂnûidas mûǂamaose ge hâ i. Ti ǁnurisab Ahikari ge ǃgâi mî-e gao-aob tawa ge dība te tsî ta ge Nineves ǁga oasa ge mā-amhe.
© Khoekhoegowab Elobmîs © Bible Society in Namibia, 2020.
