ǁGuiǂamdi ǂamkhoegu ǃoagu
1 Mâ khoe-i hoa-i ge ǂhanuba nî ǁnâuǀnam. Eloba xu hâ tama ǂhanu-i hâ tama tsî hâ an Elob xa ǁgaumâihe hâ xui-ao. 2 ǂHanuba ra mâǃoa-i hoa-i ge Elob di ǂnûiǂgāsa ra mâǃoa tsî mâǃoa ra-i ge ǀgoraǃgâsa nî ǃkhōǃoa. 3 Danaǂgaeǂgui-ao-i ge ǃgâina ra dīn ǃaroma ǃaoǃaosa tama hâ, xawe ǁnān ǂkhababa ra dīn ǃaroma. ǂHanub di ǂgaeǂguis ǃnâ hâna du ǃao ǂgao tama? O ǃgâiba dī, îts ǁîga xu koasa ǃkhōǃoa. 4 ǁÎ-i sa ǃgâiba ǃoa Elob di ǃoaba-ao amaga. Xawe ǂkhababats ga dī, ots ge nî ǃao, ǁî-i ǁause gôaba tani tama amaga. ǁÎ-i ge Elob di ǃoaba-ao tsî a ǁaib di ǀkhao-ao, ǁnā-i ǂkhababa ra dī-i ǃoagu. 5 ǁNā-amagats ge ǂgaeǂgui-aona nî ǁnâuǀnam, Elob di ǁkharab ǃaroma ǀguis ose, xawe sa ǂgaoǂans tsîn ǃaroma.
6 Nēs ǃaroma du ge ǁkhāti ǁgui-aimarisa* ra matare. ǂHanub di sîsenaon a Elob di ǃoaba-ao tsî ǁîn di ǁguiǂamsa nî dīǀoaǀoa amaga. 7 Mâ-i hoa-e ǁî-e du surude hâ-e mā, ǁgui-aimaris kao ǁgui-aimarisa, hōǂgās kao hōǂgāsa, ǃaob kao ǃaoba tsî ǃgôasib kao ǃgôasiba.
ǁÎǃnābe ǀnamgus
8 Tā khoe-e xū-e surude, ǀnamgu du nîs ǀguis ose. ǁÎ-i ǀgūkhoe-e a ǀnam-i ge ǂHanuba ra dīǀoaǀoa. 9 Nē mîmādi “ǃGamekhôats ge tide, ǃgamts ge tide, ǃnarits ge tide, ǂkhabasets ge ǂgā-am tide tsî turats ge tide” tsî ǀnî mîmā-i ga hâo, ǁîn hoan ge ǀgui mîmās “Sa ǀgūkhoe-ets ge sats ǁkhāts khami nî ǀnam” ti hâs ǃnâ ǃkhōǀhaohe hâ. 10 Sa ǀgūkhoeba ǀnams ǀkhats ge ǂkhaba-e dī tama hâ, ǂHanub ra ǀnammi ǃnâ dīǀoaǀoahe xui-ao.
11 Nēsa dīs ǀkhats ge ra ǂan, mîǁguisa ǁaeb sadu ǂomsa xu du nî ǂkhaiǂkhaiheb go hāsa. Iri hîa da nî ǃgâiǃōb aibe da ge ǂgom hâ is xa nēsi a ǀgū amaga. 12 Tsuxub ge ra ǃgû-ī tsîs ge tsēsa go ǀgū, xuige a da ǃkhaenab di sîsenga ǁguiǁnâ tsî ǃnâb di ǁâtanina ǂgaeǂgā. 13 As sada tanisensa tsēaba anu hâse ī, î da tā ǁgauoǃnâ ǃgâiǃgâisens tsî āǀhorob, ǀaib tsî ǁgauoǃnâsib tamas ka io ǂkhabagub tsî tauxasib tsîn ǃnâ hōhe. 14 Xawe ǃKhūb Jesub Xristub* ǀkha ǂgaeǂgāsen, î tā sorosi turaga du mâti nî ǂkhîǂkhî ǃkhais xa ǂâi.
© Khoekhoegowab Elobmîs © Bible Society in Namibia, 2020.
