Elob nî ǃgâiǃgâiǂgaohe ǀgaus
1 Ab ǃgâsaǀnamguba hoaǁae aiǃgû. 2 Tā ǃhaokhoena sadu omdi ǃnâ ǃkhōǃoasa ǁnākhao, nēs ǃnâ-un ge ǀnîna ǀūǂamsib ǃnâ ǀhomǃgāna ǃgâidī xuige. 3 ǂÂi re ǁnān ǃkhō-oms ǃnâ ǂnôan xa, ǁîn ǀkha du ǃkhōsis ǃnâ ǂnôas ase; ǁkhāti ǁnān ǃgomma ra tsân xa, ǁîn ǀkha du sadu ǂûdo ra tsâs ase.
4 Ab ǃgameba hoa khoen xa ǃgôasib ǃnâ ūhâhe, îb ǃgamekharoba ǂnao-ose ī, Elob nî ǀai-aon tsî ǃgamekhôa-aona ǀgoraǃgâ xuige.
5 Tāb sadu di ûiba mariǃgunuxasib xa gaoǂamhe, î du ū du hân ǀkha ǂâu; Elob ǂûb ge mî xui-ao: “Tita ge tātsē ǁnāxū tsi tsî ǃharaxū tsi tide.” 6 ǁNā-amaga da kom ǁkhoase a mî ǁkhāo:
“ǃKhūb ge a ti Hui-ao
tsî ta ge ǃao tide.
Khoe-e tare-e nî dī te?”
7 ǂÂihō re sadu aiǃgû-aogu Elob di mîsa gere ǃhoaba du gu xa. ǁÎgu gere ûi tsî ǁō ǀgaub xa ǂâiǃgâ, î du ǁîgu ǂgomsa ǁgaeǁgae. 8 Jesub Xristub* ge ǁaris, nētsēs tsî ǀamos kōse a ǁkhā. 9 Tā ǃkharagaǃnâgu tsî ǃhao ǁkhāǁkhā-aidi xa ǂgaeǂhapu kaisen. Elob di ǀkhommi ge sada di ǂgaoga ra ǀgaiǀgai, xawe ǂû-i ge ǁnān hîa ǁî-i ǃnâ ra ûina a harebeoǃnâba.
10 Sada ge altar-i, Tentommi ǃnâ gere ǃoaba pristergu ge ǁî-i ai hâ ǁguibade ǂûs di aiǂhanuba ūhâ tama hâ i-e ūhâ. 11 Ûitsama xūn di ǀaob ge ǀgapipristeri* xa ǁoreǁguibas ase Hoan xa ǃAnu ǃKhaib ǃnâ ra ǂgâ-ūhe, xawen ge ǁîn di sorode hâǃkhaib ǃauga ra ǂhubiǂuihe. 12 ǁNā-amagab ge Jesuba ǁkhāti ǃās ǃauga ǁaesab nî ǁîb ǀaob ǀkha ǃanuǃanuse ge tsâ. 13 A da ǁnâi nēsi ǁîb ǃoa, hâǃkhaib ǃaugab ǁga ǃgû tsî ǁîb di taosib ǃnâ sī ǁhao. 14 Nēpa da ge ǁaposa ǃā-e ūhâ tama, amaga da ge ǃgoaxaǁaeb di-e ra ôa. 15 Xuige a da ǀû tamase Eloba Jesub ǃnâ-u koaǁguiba-i, ǁîb di ǀonsa ra ǂanǃgâ amǁgauga xu ra ǂoaxa-e ǁguiba. 16 ǃGâidīs tsî ūts hâ xūna naun ǀkha ǀgoragusa tā ǀuru, nēti ī ǁguibadi ǃnâb Eloba ǃgâiǃgâibasensa ūhâ xuige.
17 Sadu aiǃgû-aona ǁnâuǀnam, î ǁîn ǃnaka ǃgamǃgamsen ǁîn sado ǀomde ǃûi hâ Elob aiǃâ nî ǃereamsa māse xui-ao. An nēsa ǃgâiaǂgaob ǀkha dī, tsûaǂgaob ǀkhas ose. ǁÎs xa du ǃgâibahe tide xuige.
18 ǀGoreba da re, sige di ǂgaoǂans a ǃanu tsî ge mâǁaeb hoab ai ǂhanuse ra ûi ǂgao xuige. 19 Tsî ǁnās ǃgâ-ai ta ra ǀkhoma, î du ǀgore, îb Eloba ǃhaese sadu tawa oasī kai te.
ǀUni ǀgores
20 Ab ǂkhîb di Elob, sada ǃKhūb Jesuba ge ǁōba xu ǂkhaiǂkhai tsî ǁîba kai ǃÛi-aob gūn dib ase ǀamo ǃgaeǀhaos di ǀaob ǀkha dība, 21 hoa ǃgâi xūn ǀkha ǁîb di ǂâisa du nî dīse ǁāǁā du. Ab Eloba sada ǃnâ Jesub Xristub ǃnâ-u ǁîba a ǃgâibase sîsen; ǁîb dib ge ǂkhaisiba ǀamosib kōse, Amen.*
ǀUni mîdi tsî tawededi
22 ǀKhoma du ta ge ra ǃgâsado. Nē ǀgaiǀgaiǃnâs di mîsa ǂōrisase ǃgâ re, nēs a ǃnubu sîǂkhani sadu ǃoa ta ra xoasa xuige. 23 Timoteub, sada di ǃgâsab ǃkhō-omsa xu ǁnāxūhe hâsa du nî ǂan ǃkhaisa ta ge ra ǂhâba. ǁAeb aib ga hā, o ta ge ǁîb ǀkha sado sī nî sari.
24 Sadu ǂgaeǂgui-aon hoan tsî hoaraga khoen Elob dina tawedeba te re. Italiab di ǂgomsaben tsîn ge ra tawede du.
25 Ab Elob ǀkhomma sadu hoadu ǀkha hâ!
© Khoekhoegowab Elobmîs © Bible Society in Namibia, 2020.
