ǂKhîb Gaosib
1 Hairo-i ge Isaib ǃgaosa xu nî ǂoaxa tsî ǁnâu-i ge ǃnomagu âba xu nî ǁhai.
2 ǃKhūb Gagab ge ǁî-i ai nî hâ,
gā-aisib tsî ǁnâuǃāb tsîkha Gagaba.
ǀApemās tsî ǁkhāsib Gagab,
ǂans tsî ǃKhūba ǃaoǃgâs di Gagaba.
3 ǁÎb ge ǃKhūba ǁnâuǀnams ǃnâ nî ǃgâiaǂgao.
ǁÎb ge mûs ǀkha mûs ai ǀgui ǀgoraǃgâ tide,
tamas ka io ǁnâuǂhôa-i ai mîǁguisa ū tide;
4 xawe ǂhanu-aisib ǀkha ǀgâsana ǀgoraǃgâ
tsî ǃhūbaib di ǁgâiǀāhe hâna ǀguitikōsib ǀkha nî sîsenū.
ǁÎb ge ǃhūbaiba ǁîb ams di ǂnauhaib ǀkha ǂnau
tsî ǁîb amǁgaukha di ǀommi ǀkha eloxoresana nî ǃgam.
5 ǂHanu-aisib ge ǁîb kamanaǃgae-ūda
tsî ǂgomǂgomsasiba ǁîb ǂhobera kamanaǃgaesen.
6 ǂHiran ge gūn ǀkha nî hâǀhao
tsî ǂhûisen ge ǂkham pirin ǀkha ǀguipa nî ǁgoe.
Tsâun tsî xamron ge ǀguiba nî ǂû
tsî ǂkhari ǀgôaron ge ǁîna nî ǃûi.
7 Gomadi tsî bērdi ge ǀguiba nî ǃû
tsî ǁîdi ǂkhamron ge ǀguiba nî hâ.
Xamn ge ǀgâna goman khami nî ǂû.
8 Dai ra ǀgôaro-i ge ǀaob ās tawa nî ǀhuru,
tsî ǂhana ra ǀgôaro-i ge ǃgāxa ǀao-i ās ǃnâ nî ǂgâ.
9 Ti ǃanu ǃhommi hoaragab ain ge
tsûtsû tamas ka io hîkākā tide.
ǃHūbaib ge ǃKhūb ǂans xa nî ǀoa,
hurib ǁgammi xa ǀoa hâs ǁkhās khami.
ǃKhōsis ǃnâ hân ge nî oahā
10 ǁNā tsēs aib ge ǃnomaba Isaiba xu ǁgauǁgau-i ase khoena nî ība. ǁAedi ge ǁîba nî dî-ôa tsî ǁîb hâǃkhaigu ge ǂkhaisib xa nî ǀoa. 11 ǁNā tsēs aib ge ǃKhūba ǁkhawa ǁîb ǃomma ǀhōǂui tsî ûiǃgau ge khoena Asiriab, Egipteb, Patros, Etiopiab , Elammi, Babiloniab, Hamats tsî hurib ǃnâ ǂnôa ǃnāǃnuidi tsîna xu nî ǀhaoǀhao. 12 ǁÎb ge ǁaedi nî mûse ǃkhauba ge ūkhâi, hoa haka ǁhôadi ǃhūbaib didi ǃnâ doeǁgabēhe hâ Israelǁîn tsî doeǁgabēhe hâ Judab khoen tsîn hoanab nî ǀhaoǀhaose. 13 Efraimmi tauxasib ge nî toa tsî Judab di khākhoesib ge nî ǁaraǁnâhe. Efraimmi ge ǃaruǀî Judaba ǃhuisa tide tsî Judab ge Efraimma ǃaruǀî khākhoeba tide. 14 Xawen ge ǁîna huriǂoasǀkhāb ai Filisteǁîna nî ǁnāǂam tsîn ge ǀguipa aiǂoasǀkhāb khoen xūna nî ǀhana. ǁÎn ge Edommi tsî Moab tsîna ūbasen tsî Amonǁîna ǁîn ǃgāse nî dī. 15 ǃKhūb ge Egipteb huriba ǀgora tsî Eufratǃāb ǂamai ǁôab âba ǀhōǂui tsî ǀgaisa ǂoab ǀkha ǁîba hû ǂnâsa ǃārogu ǃnâ nî ǀgora, khoe-i hoa-i ǁîga nî ǃgâu ǁkhāse. 16 ǁÎb khoen ûiǃgau gen ǃaromab ge kai daoba Asiriab ǃnâ nî hâ, Israelǁîn ǀkha i ge ī khami Egipteba xun gere ǂoao.
© Khoekhoegowab Elobmîs © Bible Society in Namibia, 2020.
