Israeli ǀams ge go ǀgūtoa
1 ǃKhūb di mîs ge tita ǃoa ge hā: 2 Nētib ge ǃKhūb Eloba Israelǃhūb ǃoa ge mî: “Satsa khoenôa ǀgôatse. ǀAms! ǀAms ge hoa haka ǁhôadi ǃhūb didi tawa go hā!
3 “Nēsis ge ǀamsa sats ai go hā, tita ge ti ǁaiba sats ai nî ǁhōǂui; sa daogu ǃoa ta ge nî ǀgoraǃgâ tsi, sa ui-uisasigu hoagu ǃaroma ta ge nî ǁkhara tsi. 4 Ti mûs ge ǀkhom tsi tide, tita ge tātsē ǀkhomxa tsi tide. Sa daogu ǃaroma ta nî ǁkhara tsi, sa ui-uisasigu sadu ǁaegu hâ hîa. Ots ge tita a ǃKhū ǃkhaisa nî ǂan.”
5 Nētib ge ǃKhūb Eloba ra mî: “Mû, ǂōǂōsiba xu ǂōǂōsib ge nî hāǂam du. 6 ǀAms ge go hā, ǀams ge go hā. ǁÎs ge go ǃnoaǂkhaiǂam tsi; mû, ǁîs ge ǃgoaxa. 7 ǃHūb di ǁanǂgāsabedo, sadu ǀgoraǃgâs ge go hāǂam du. ǁAeb ge go hā, tsēs ge go ǀgū! ǂŌǂōsib ǂkhupiba, ǃgâiaǂgaob di ǂkhubib ǃhomgu ai hâb ose.
8 “Nēsi ta ge kaise ǃhaese ti ǁgôasiba sadu ai nî ǁhōǂui; ti ǁaiba ta ge sadu ǃoagu nî ǀkhī-ū. Sadu daogu ǃoa ta ge nî ǀgoraǃgâ du, tsî sadu ui-uisa dīgu hoagu ǃaroma nî ǁkhara du. 9 Ti mûs ge ǀkhom tide; tita ge ǀkhomxaǂgao tide. Sadu daogu ǃoa ta ge nî ǁkhara du, sadu ui-uisa dīgu sadu ǃnâ hâse. O du ge tita ǃKhūta go ǁkhara du ǃkhaisa nî ǂan.”
10 Mû, tsēsa! Mû, ǁîs ge ra hā! Sadu ǂōǂōsib ge go ǂoaxa. ǂKhawasib ge go ǃkhā, ǀgapiǂâixasib ge go ǁhao. 11 ǂKhabasib ge eloxoresasib haib ǃnâ go ǁhai. ǀGui xū-i ân tsîn ge ǃgau tide, ǁîn di ǃnāǂamsasib kas, ǁîn ǃkhūsib kas, ǁîn di ǂkhaisib kas hoasa.
12 ǁAeb ge go hā, tsēs ge go ǀgū; a i ǁama-ao-e tā ǃgâiaǂgao tamas ka io ǁamaxū-ao-e tā ǃoa, ǃKhūb di ǁaib ǁîn hoaraga ǂnubis ǃoagu ra hā xuige. 13 ǁAma-ao-i ge ǃaruǀî ǁamaxū-ao-e matare ǁkhā tide, hoan ganupe ûi hâ hîa. 14 ǁÎn ge xâiǁnâsa ge xâi tsîn ge hoana ge ǂhomisen. Xawe i ge khoe-i xare-e ǃkhams ǁga ǃgûǂoa tama ge i, ti ǁaib di ǀkhaob ge ǁîn di ǂnubis hoaragas ai hâ i xui-ao.
Israeli ǂama hâ ǁkharab
15 ǃAugab aib ge gôaba hâ, ǂhīǁōb tsî ǃâtsūǀkhāb tsîkha ǂganagab ai. ǃAuga hân hoan ge gôab xa nî ǃgamhe tsî ǃās ǃnâ hân ge ǂhīǁōb tsî ǃâtsūǀkhāb tsîkha xa nî hîkākāhe. 16 ǁÎna xu nî ûiǃgaun ge ǃhomgu ǃoa nî ǁhâ ǃgoaǃnāb ǂnabudi khami, hoan ge ǁîn di tsūdīgu ǃaroma nî ǃgae. 17 ǃOmgu ân ge nî ǂkhabu tsî ǁgoadi ân ge ǀūb xa nî ǀâ. 18 ǁÎn ge ǀhaosarana nî ana tsî ǂōǂōsib ge ǁîna nî ǃgū-ai. Taob ge hoan di aidi ai nî hâ tsî danadi ân ge ǃgorase nî ǂkhomǁnâhe. 19 ǁÎn ge ǀhaiǀurib âna ǃgangu ai ǀapob khami nî aoxū tsîb ge ǃhuniǀurib âna ǃanuoǃnâse nî ī. ǁÎn di ǀhaiǀurib tsî ǃhuniǀurib tsîkha ge ǃKhūb ǁaib di tsēs ai ǁîna hui ǁkhā tide. ǁÎkha ge ǃâs âna hui tamas ka io ǁkhomdi âna ǀoaǀoa ǁkhā tide. ǁÎkha ǁîn dīsādi ǃaroma ǁîn di ǃnôa-aiǃnaose nî ī xui-ao. 20 ǁÎn ge ǁîn ain ǂnīsa îsa anixūn ǀkha ui-uisa īga gere kuru, ǁîn ǁgôa-eloga. ǁNā-amaga ta ge tita ǁîga ge ǁauxūdī.
21 “ǁÎga ta ge ǁkhauǁnâxūse ǃhaokhoen ai nî ǁkhaeǁnâ, ǃhūbaib di ǂkhabadī-aon ai ǀâǀhanaxūse; ǁîn ge ǁîga nî ǃanuoǃnâ kai. 22 Tita ge ti aisa ǁîna xu nî ūbē, în ti hâǃkhaiba ǃanuoǃnâ kai. ǁKhâuǁnâ-aon ge ǁîba nî ǁnāǂam tsî ǁîba nî ǃanuoǃnâ kai.
23 “Tsuriba dībasen, ǃhūb ǀaoǂnâxūdi xa ǀoa hâ tsî ǃāsa ǂkhabadīb xa xuige. 24 Tita ge ǁaedi hoadi ǃnâ a ǂkhaba ǁaede nî hā kai tsî di ge ǁîde ǁîna omdi âna hā nî ūǀhana. Tita ge ǀgaisan di ǀgapiǂâixasiba toa kai tsî ǁîn ǃanu ǃkhaiga nî ǃanuoǃnâ kai. 25 ǂŌǂōsib ga hā, on ge ǁîna ǂkhîba nî ôa, xawen ge ǁîba hō tide. 26 Nē tsūǀkhāba xu nau tsūǀkhāb, nē ǁgaoǁgaosasiba xu nau ǁgaoǁgaosasib ge ǁîna nî hāǂam. On ge kēbo-aob di ai-e nî ôa, xawes ge pristeri ǁkhāǁkhāsa ǃaruǀî sîsen tide tsî kaigu di ǀapemās tsîna. 27 Gao-aob ge nî ǃoa, gaoǀgôab ge ǃâubasenoǃnâsiba nî ana tsî ǃomgu ǃhūb khoen digu ge ǂkhabu tsî nî ǀkhū. ǁÎn di dīxūn ǃoa ta ge ǁîna nî sîsenū, ǁîn di ǀgoraǃgâdi ǃoa ta ge tita ǁîna nî ǀgoraǃgâ tsîn ge tita a ǃKhū ǃkhaisa nî ǂan.”
© Khoekhoegowab Elobmîs © Bible Society in Namibia, 2020.
