ǃKhūb di gôab
1 ǃKhūb di mîs ge tita ǃoa ge hā: 2 “Khoenôa ǀgôatse, sa aisa Jerusalems ai ǃammâi, îdi sa mîde ǃanusigu ǃoa dâuǂoa, îts Israeli ǃhūb ǃoagu kēbo 3 tsî ǁîba mîba: Nētib ge ǃKhūba ra mî: Tita ge sats ǃoagu hâ tsî ta ge ti gôaba ǁhōb âba xu ǂgaeǂui tsî ǂhanu-ain tsî eloxoresan tsîn hoana ǃhūba xu nî ǃgamǂui. 4 ǂHanu-ain tsî eloxoresan tsîn hoana ta ǃhūba xu nî ǃgamǂui, amagab ge ti gôaba ǁhōb âba xu ǁgans hoas ǃoagu nî ǂoaxa, ǃkhawagasa xu ǀapas kōse. 5 On ge hoana nî ǂan, tita ǃKhūta ge ti gôaba ǁhōb âba xu ǂgaeǂui tsîb ǁkhawa ǂgā-oahe tide ǃkhaisa.
6 “ǀHâimâinǀom re satsa khoenôa ǀgôatse, ǀhâimâinǀom re tsûaǂgaob tsî ǃgaes ǀkha ǁîn mûǁae. 7 Tsî sats ǃoan ga, ‘Tarexats ra ǀhâimâinǀom’ ti a mî, ots ge nî mî: ‘ǂHôas ra hā xui-ao. ǁÎs ga hā, ob ge mâ ǂgaob hoaba nî ǂkhabu, tsî ǃomgu hoagu ge nî ǃopo tsîs ge mâ gagas hoasa nî ǂkhabuǂâi tsîs ge mâ ǁgoas hoasa ǁgam-i khami nî ǂkhabu. Mû ǁîs ge ra hā tsîs ge nî ī,’ ”
tib ge ǃKhūb Eloba ra mî.8 ǃKhūb di mîs ge tita ǃoa ge hā: 9 “Khoenôa ǀgôatse kēbo, îts mî: Nētib ge ǃKhūba ra mî:
“Gôab, gôab ge ǀāǀāhe tsî ǂkhanuǂkhanuhe hâ.
10 ǁÎb ge ǀāǀāhe hâ ǂāb nîga,
ǁîb ge ǂkhanuǂkhanuhe hâ napab khamib nî ǂkhaiga.
ǃGâiaǂgao da kha nî, ti ôab di haib,
mâ hais hoasa ra ǃharaxūb ǂama?
11 Gôab ge māhe hâ ǂkhanuǂkhanuǀkhāhe
tsîb nî sîsenūhese.
ǁÎb ge ǀāǀāhe tsî ǂkhanuǂkhanuǀkhāhe hâ,
ǃgamaob ǃomǁaeb nî māhese.
12 Ā îts ǃgae, khoenôa ǀgôatse,
nē gôab ge ti ǁaes ǃoagu nî hā,
ǁîb ge Israeli gaoǀgôagu ǃoagu nî hā.
ǁÎgu ge gôaba māǁnâhe hâ,
ti ǁaes din ǀkha ǀhûpe.
ǁNā-amaga tîb âts ai ǂnau re!
13 Ti ǁaesa ta ge ra ǃâitsâ,
tsî dī-unusen ǂgao taman ga i,
on ge nē xūn hoana ǁîn ǀkha nî ī,”
tib ge ǃKhūb Eloba ra mî.14 “ǁNā-amaga khoenôa ǀgôatse kēbo, îts ǁapunǃom, ob ge gôaba ǀgam tsî ǃnona ǃnāde nî ǁgôaxa ǁînab nî ǃgamse. Nēb ge gôab kai ǃgams ǁîn hoana ǃkhōǂgā hâs diba. 15 ǁÎn ǂgaogu ge ǃaob xa ge ǂkhabu tsîn ge ǂguina dao-amdi hoadi tawa ge ǁnā. Gôab ge napab khami ra ǂkhai, ǁîb ge ǂhomisase hâ ǃgamsa ǃoa. 16 Sats ǀā gôatse, amǀkhāb tsî ǁareǀkhābǀî ǁhā, ǀāǀkhāb ra unusen ǀkhāb hoab ai. 17 Tita tsîn ge ǁapunǃom tsî ti ǁaiba nî ǁgôa kai. Tita ǃKhūta ge ǁîsa go mî.”
Babilons gao-aob di gôab
18 ǃKhūb di mîs ge ǁkhawa tita ǃoa ge hā: 19 “Khoenôa ǀgôatse, ǀgam daokha Babilons gao-aob di gôaba ǂhomiba ǁnāpa-ub nî ǀkhīse. ǁÎkha hoakha ge ǀgui ǃhūb ǀguiba xu nî ǂoaxa, îts sao-e dībasen tsî ǁî-e ǃās ǃoa garu daob di tsoatsoas tawa mâi. 20 Daoba ǁgaumâi, ǁîba-ub gôaba Rabas Amonǁîn dis tsî omǂnamisa ǃās Jerusalems ǃoa nî sība. 21 Babilons gao-aob ge daokha di ǀgoras di tsoatsoas tawa mâ, aimûǀgarub nîga. ǁÎb ge ǂāga ra gongon, ǁîb ge ǁîb di ǁgôa-elo-īgu ai ra ǀape-ôa, ǁîb ge xamari-i âisa ra kō. 22 Amǀkhāb ǁôab âb ǃnâ hâ saos ge a Jerusalem. ǁÎs ge ra mîba bi, îb ǁnāǂamūxūna omkhâi, torob mîmāsa ǃauǂui, ǁâtanina ǃās dao-amdi ǃoa-ai mâi tsî ǃās ǂnubiǂgoab xōǀkha torob ǂnubiǂgoaba omkhâi. 23 Jerusalems khoen mûǁaes ge nē aimûǀgarusa ǁau xūse nî i, ǁîn ge nūs ǀkha mîmâide dī amaga. Xawes ge nēsa ǁîna ǁîn di ǃûǂamdi xa ǂâiǂâiǃnâ tsî nî ǃkhâikhom, ǃkhōsis ǃnân nî ūhesa. 24 ǁNā-amagab ge ǃKhūb Eloba nēti ra mî: Sadu ǂhanuoǃnâsib ge ǂhai amagas ge sadu ǃûǂamdi ge ǂansa, tsî gu ge sadu dīgu hoagu tsî ǁoren tsîna mûhesa. ǂÂiǂâisenhe du ra amagas ge ǃommi ǀkha du nî ǃkhōhesa.
25 “Tsî sats ǃanuoǃnâ, eloxoresa ǂgaeǂgui-aots Israeli dits, tsēs âts go hātse, ǁaeb sa ǀuniga ǁkharab diba. 26 Nētib ge ǃKhūb Eloba ra mî: Sa ǀgapas tsî sa krons tsîra ūǁnâ, ǀgui xū-i tsîn ge ǀnai i go ī ise hâ tide. ǃGamǃgamsensa-e ǀgapiǀgapi, î ǀgapiǀgapisenxa-e ǃgamǃgam. 27 Khôaǂkhū, khôaǂkhū, tita ge ǁîsa nî khôaǂkhū. Xawes ge nēsa ī tide, ǃāsa hā nî ǁkharab nî ǀkhīs kōse, o ta ge ǁîba ǁîsa nî mā.
Amonǁîn di gôab
28 “Satsa khoenôa ǀgôatse, kēbo îts mî: Nētib ge ǃKhūb Eloba ra mî, Amonǁîn tsî ǁîn di ǃharaxūb ǂama:
“Gôab ge ǂgaeǂuihe hâ ǂāb nîga,
ǁîb ge ǂkhanuǂkhanuǀkhāhe hâ ǃgammi nîga,
napab khamib nî ǂkhaiga.
29 “ǁÎn ge harebeoǃnâ aide sado ra mûba tsî ǂhumiba ra aimûǀgaruba du. ǁNā ǃanuoǃnâ, eloxoresan di ǃaogu ai du nî ǁgoese, ǁnān ǀuniga ǁkharab di ǁaeb go hān ai.
30 “Gôaba ǁkhawa ǁhōb âb ǃnâ ǂgā-oa. Tita ge ǁîs tawats ge kuruhe ǃkhais ǃnâ, sa ǂhunuma ǃhūb ǃnâ nî ǀgoraǃgâ tsi. 31 Ti ǁaiba ta ge sats ai nî ǁhōǂui. Ti ǀkhaob di ǀaesa ta ge sats ai nî ǃnâi, tsî ta ge kaise ǁkhō khoen, hîkākās ǂansa ūhân ǃomǁae nî māǁnâ tsi. 32 Sats ge ǀaes xa nî hapuhe tsîb ge sa ǀaoba ǃhūb ai nî ǂnâxūhe, tsîts ge ǃaruǀî ǂâihes tsîna hî tide. Tita ǃKhūta ge ǁîsa go mî.”
© Khoekhoegowab Elobmîs © Bible Society in Namibia, 2020.
