Jakob ra Efraimmi tsî Manaseb hâkha ǀkhae
1 Nēn khaoǃgâb ge Josefa ǁîb îb ǀaesen hâ ǃkhaisab ge mîbaheo, ôasakha Manaseb tsî Efraimmi tsîkha ūsao tsî ǁîb îb, Jakob ǁga ge ǃgû. 2 Ôasab, Josefi go ǁîb ǁga hā ǃkhaisab ge mîbahe ob ge Jakoba ǀgaiǀgaisen tsî ǂgōse kharob ǃnâ ge ǂnû. 3 Tsîb ge Jakoba Josefa ge mîba: “Hoaǀgaixa Elob ge tita Lus tawa, Kanaanǃhūb ǃnâ ǂhai tsî ge ǀkhae. 4 ǁÎb ge ‘Tita ge satsa ǂûǂûxa kai tsî ǂgui ǀgôana nî mā, surib âts ge nî ǂgui ǁae kai tsî ta ge nē ǃhūba ǁîna ǁîn di ūhâxūse nî mā’ ti ge mî.
5 “Sa ôakha, nēpa Egipteb ǃnâ, tita nî hās aiǃâ ge ǃnaekha ge a ti. Rubenni tsî Simeon hâkha ǁkhākha khami kha ge ǁîkha a ti. 6 ǁÎkha khaoǃgâts ga ǁorabahegu ge nî sa; ǁîgu ge Manaseb tsî Efraimmi tsîkha ǃnâ-u ǁîgu di ǀumi-amǃnâsa nî hō. 7 Nēsa ta ge sa îs, Raxels ǃaroma ra dī. Kaise Efratasa xu ǃnū tamases ge ǁîsa Kanaanǃhūb ǃnâ, Mesopotamiaba xu ta garu daob ǃnâ ge ǁō tsî ta ge ǁîsa Efratas daob xōǀkhā ge ǁkhō.” (Efratas ge nēsisa Betlehem ti a ǂansa.)
8 Israeli ge Josefi ôakhab ge mûo “Tarikha nēkha?” ti ge dî.
9 Ob ge Josefa “Ti ôakha, Elob ge tita Egipteb ǃnâ mākha ge” ti ge ǃeream.
Ob ge Israela ge mî: “ǁÎkha tita tawa ǀkhī-ū, î ta ǁîkha ǀkhae re.” 10 Kairasib âb xa ǃaromahe hâseb ge Jakoba ǃaruǀî ǃgâise ge mû tama hâ i. Josefi ge ǀgôakha ǁîb ǀgūse sī-ū ob ge ǁîkha ǁnam tsî ge ǁoa. 11 Tsîb ge Josefi ǃoa ge mî: “Tita ge ǁkhawa ta satsa nî mû ti ge ǂâi tama hâ i, xaweb ge Eloba sa ôan tsîna go mû kai te.” 12 Tsîb ge Josefa ǀgôakha Jakob tîǂamsa xu ū tsî ais âb ra ǃhūba tsâǀkhāse ǁîb aiǃâ ge ǃhon.
13 Josefi ge ôasakha Israeli aiǃâ ge mâ kai. Efraimmab ge ǁîb amǀkhāb, Jakob di ǁareǀkhāb ai mâi tsî Manaseba ǁîb ǁareǀkhāb, Jakob di amǀkhāb ai ge mâi. 14 Amǀkhāb ǃommi âba ǀhōǂui tsîb ge Jakoba Efraimmi danas ai ge ǁgui, ǁîb ge ǂkham i xawe, tsîb ge ǁareǀkhāb ǃommi âba Manaseb, ǁîkha xa kaib di danas ai ge ǁgui. 15 ǁNās khaoǃgâb ge Josefa ge ǀkhae.
“Ab ǁnā Elob, ti îkha, Abrahammi tsî Isaki gere ǃoababa nē ǀgôakha ǀkhae.
Ab Elob nētsēs kōse tita go ǃûiba ǁîkha ǀkhae!
16 Ab ǁnā ǀhomǃgāb hoa ǂkhôana xu tita ge sâuba ǁîkha ǀkhae!
As ti ǀons tsî ti îkha, Abrahammi tsî Isaki tsîkha di ǀonra tsîna nē ǀgôakha ǃnâ-u ûi!
A kha ǂgui ǀgôana ūhâ, kai suriba!”
17 Josefi ge kaise ǁgûb ge Efraimmi danas ai amǀkhāb ǃommi âba ǁgui ǃkhaisab ge mû, o ge ǂkhîoǃnâ. ǁÎb ge ǁgûb ǃomma ge ǃkhō, Efraimmi danasa xu ūǁnâ tsîb Manaseb danas ai nî ǁguise. 18 Tsîb ge ǁgûb ǃoa ge mî: “ǁNāti tamas ge ti îtse, nēb ge ǁîkha xa a kai, xuige amǀkhāb ǃommi âtsa ǁîb danas ai ǁgui re.”
19 Ob ge ǁgûba ǂkhā tsî ge mî: “ǂAn ta ge a ti ôatse. Manaseb surib tsîn ge nî kai ǁae kai. Xawe ǃgâsab din ge ǁîb din xa nî kai tsî surib âb ge nî kai ǁae kai.”
20 Tsîb ge ǁnā tsēs ai ǁîkha ǀkhae tsî ge mî: “ǀKhaeban ga gowaǂui on ge Israelǁîna sakho ǀonra nî sîsenū. ǁÎn ge ‘Ab Eloba sado Efraimmi tsî Manaseb khami dī’ ti nî mî.” Nē ǀgaus aib ge Jakoba Efraimma Manaseb aiǃâ ge mâi.
21 ǁNās khaoǃgâb ge Jakoba Josefi ǃoa ge mî: “Mûts rase ta ge tita ǁō nîse ī, xaweb ge Eloba sadu ǀkha hâ tsî sado sadu aboxagu di ǃhūb ǁga nî oa-ū. 22 Tita ge satsa sa ǃgâsagu xa ǃnāsase ra mā, Sexems, ǁnā ǂûtanixa ǃhūǃâs, Amorǁîna xu ta ge gôab tsî khās tsîra ǀkha ūsa.”
© Khoekhoegowab Elobmîs © Bible Society in Namibia, 2020.
