Korneliub ge Petruba ra ǂgai
1 Kaesareas ǃnâb ge Italiab toroǃkhamaogu di danakhoeb Korneliub ti ge ǀon hâ iba ge ǁan hâ i. 2 ǁÎba ge kaise ge eloǃaoǃgâxa i tsî ǁîb di omaris ǀkha Israeli di Eloba gere ǃoaba. Kaiseb ge ǁkhāti ge māǂgaoxa i tsî khoena ǃgâidī tsî ǁkhāti hoaǁae Elob ǃoa gere ǀgore. 3 Xaweb ge ǀguitsēkam karab ai ǁaubexa ǃnona ir ǁaeb ai ai-i ǁî-i ǃnâ-i Elob di ǀhomǃgā-e ǁîb tawa ra sī-e ge hō, “Korneliutse” ti ra mî-e. 4 Ob ge Korneliuba ǃao rase ǀhomǃgāba kō tsî “Tare-e, ǃKhūtse?” ti ge dî.
Ob ge ǀhomǃgāba ǁîba ge ǃeream: “Sats ǀgâsana ra dība ǃgâin tsî sa ǀgoredi tsîn ge Elob tawa mûhe tamase ǃkharu tama hâ. 5 Xuige khoega Jopas ǁga sî re, î gu Simonni, Petrub ti ra ǀonǂgaiheba sī ôa. 6 ǁÎb ge hurib amǃgâ ǁan hâ khōǀnoro-aob, Simon tis tsîna ǀon hâb di oms tawa hâ.”
7 Tsî ǀhomǃgāb ra ǁîba xu bē hîab ge Korneliuba ǀgam ǃgākha kaiseb ge ǂgomǃgâ hâ i kha tsî ǁîb di ǁhōga ra mûǂam toroǃkhamaogu di ǀguib, kaise ge eloǃaoǃgâxa ib tsîga ge ǂgai. 8 Tsîb ge ǁîga tare-i go ī ǃkhaisa mîba tsî ǁnās khaoǃgâ Jopas ǁga ge sî.
9 Sao ra tsē, ǁaubexa disiǀgamǀa ir, tsēǃgâǁaeb ai, ǃāsa gu Korneliub xa sîhe hâga ra ǀgū hîab ge Petruba oms ǂamǃnâ ǀgore nîse ge ǂoa. 10 Ob ge kaise ge ǃâ tsî ge ǂû ǂgao. Xaweb ge ǂû-eb ra aiǂhomibahe hîa ǃgam ǂoms ǃnâ ǁnā tsî ǁhapos ǃnâ ai-e ge mû. 11 ǀHommi ra ǁkhowa-amsen tsî-i kai ǃkhai-i khami ī xū-i, haka ǁhôadi ai ǃgaesa-e ǃhūb ai ra ǁgôaxa kaihese. 12 Tsîn ge nē ǃkhaib ǃnâ ǂgui ǃkharagaǃnâgu ǀgurun, ǂhanaben tsî ǀhomaniǃnôana tsîna ge hâ i. …ǃkharagaǃnâgu ǀgurun, ǂhanaben tsî ǀhommi di aniǃnôana ge hâ i. 13 O i ge dom-e ǁîb ǃoa ge mî: “Petrutse, khâimâ îts ǂā tsî ǂû.”
14 Ob ge Petruba “Tātsē ǃKhūtse, tita ge tātsēs tsîna ǃanuoǃnâ xū-e ge ǂû tama hâ i” ti ge ǃeream.
15 Ob ge domma ǁkhawa ǀgamǁî ǃnāsa ǁîb ǃoa ge mî: “Tā Elob ga ǃanu a ti mî xū-e satsa ǃanuoǃnâ a ti mî.” 16 Nē ai-i ge ǃnona ǃnādi kōse ge hā tsîb ge ǁnās khaoǃgâ nē ǃkhaiba ǀhomma ǃoa ge ǂgaekhâihe.
17 Petrub ge kaise nē ai-i di ǂâibasens xa ge ǀūa-ai. Xawe ǁnā ǁaeb ǂûb ais ge Korneliub di sîsabegu ge Simonni omsa hā dîǃgâ tsî hō tsî oms di dao-ams tawa mâ isa. 18 Tsî gu ge Simon Petrub ra ǁnāpa hâ ǃkhaisa gere dî. 19 Tsî noxopab Petruba nē ai-i xa ra ǂâiǂâisen hîab ge ǃAnu Gagaba ge mîba bi: “ǃNona khoegu xats ge ra ôahe. 20 Tā îganǀgē, îts khâi tsî ǀhabe tamase tita xa gu sîhe hâ xuige ǁîga sao re.”
21 Ob ge Petruba ǁgôaxa tsî ǁîgu ǃoa “Tita ge ǁî ta hîa go ra ôa ta. Tare-i ǃaroma go kha ǁnâi go ǀkhī?” ti ge mî.
22 O gu ge ǁîba ge ǃeream: “Danakhoeb, Korneliub kaise ǂhanu-ai tsî eloǃaoǃgâxa tsî ǁkhāti Jodeǁîn xa kaise ǃgôahe hâb xa ge ge sîhe hâ. Elob di ǃanu ǀhomǃgā-i ge ǁîba go mîba, satsa ǁîb oms ǁga ǁkhausa, îb sats tare-e ra mî ǃkhaisa ǁnâu.” 23 Ob ge Petruba ǁîga ǀgui tsuxuba oms ǃnâ ǁîb di ǃhaokhoegu ase ge ūǂgā. Tsîb ge nautsēkamǁgoaga, ǀnî ǂgomsaben ǀkha ǀhû hâse ǁîga Jopasa xu ge sao.
24 Sao ra ǁgoaga gu ge Kaesareas tawa sī, ob ge Korneliuba ǁîb di khoexakhoen tsî ǀgūǀhōsan tsîn ǀkha ǁîga ge ǃâu hâ i. 25 Petrub ge oms âb ǃnâ ǂgâxa ob ge Korneliuba ǁîb di ǂai-am ǀgoreǀî bi nîse ge ǁnāǁgoe. 26 Ob ge Petruba ǁîba ǂgaekhâi tsî “Khâimâ, tita tsîn sats ǁkhāts khami khoes ǀguisa ī xuige!” ti ge mîǀî bi. 27 Tsî Korneliuba ge khâi tsî kha ge ǁîkha ǃhoaǁaretoas khaoǃgâ kha ge nau khoen ǀhao hâpa ge ǂgâ.
28 Ob ge Petruba ǁîna “Jodeǁî ǂhanugu ǃoagu i ge ǂhanu tama hâ Jodeǁî-i nî Jodeǁî tama khoen ǀkha ǁaeǁaesen tamas ka io ǁîn omdi tawa sari ǃkhaisa. Xaweb ge Eloba tātsē ta khoe-i a ǃanuoǃnâ ti mî tide ǃkhaisa go ǁgau te. 29 Tsî ta ge ǁnā-amaga sats go sî teo ǂkhā tama i tsî ǃhaese go ǀkhī, xuige tare-i ǃaromats go ǂgai kai te ǃkhaisa mîba te re” ti ge mîba. 30 Ob ge Korneliuba ge ǃeream: “Haka tsēdi ǃkharu hâse ta ge karab di ǃnonaǁî ir oms âtas ǃnâ goro ǀgore. Ob ge ǃnapetamase ǂkhai ra saraba ge ǂgaeǂgā hâ i khoeba ti aiǃâ ge ǂhai. 31 Tsîb ge ‘Korneliutse, Elob ge sa ǀgoresa ǁnâu-am tsî sa māǂgaoxasiba go mû! 32 Xuige khoega Jopas ǁga sî re, î gu Simon Petrub ti ǀon hâ khoeba sī ôa. ǁÎb ge Simonni, khōkuru-aob hîa hurib amǃgâ ǁan hâb di oms tawa ra hâ.’ 33 O ta ge ǁnātimîsi satsa ge sî tsî i ge a ǃgâi ti ǁkhauǂuis ai oe-am tsîts go ǀkhī ǃkhaisa. O da ge hoatsama Elob aiǃâ go ǀhû ǃKhūb go mîmā tsi ǂhôasa da nî ǁnâuse.”
Petrub di gowaǀîs
34 Ob ge Petruba ge mî: “Amase i ge go ǃgāsaba te, Elob khoen ǁaegu ǀgora-e ūhâ tama ǃkhaisa. 35 Mâ ǁaes ǀguis ka xaweb ge ǁkhāti ǁnān hîa ǁîba ǃaoǃgâ tsî ǂhanuse ra ûina ra ǃkhōǃoa. 36 Sadu ge mîs, ǁîb ge Israelǁîn, Jesub Xristub* hoan di ǃKhūb ǃnâ-u ra ǂkhîb di ǃGâiǂhôasa aoǁnân ǃoa sîsa a ǂan. 37 Sadu kom a ǂano hoan hîa Israeli ǃnâ ge īna, Galileab ǃnâ tsoatsoa tsî Johaneb ǁĀǁnâ-aob ge ǁāǁnâs di ǂhôasa aoǁnâs khaoǃgâ. 38 Tsî i ge a ǃgāsa Elob ge Jesub, Nasaretǁîba ǃAnu Gagab tsî ǀgaib ǀkha ǀnau* ǃkhaisa du sado ǂan ǃkhaisa. Tsîb kom Jesuba ǁnās khaoǃgâ ǁgâuab* xa ǁgâiǀāhe hân di ǂuruǂurus tsî ǃgâi sîsenga gere dīo, Elob ge hâǀkhā bi i xui-ao.
39 “Tsî ǁîb gere Jerusalems tsî hoaraga Judeab ǃnâ dī sîsenni di ǃkhō-amaoge ge sige, apostelge.* ǁÎn ge ǁîba ǁōb ǃoa ǀgoraǃgâ tsî ge ǃgâu bi, 40 xaweb ge Eloba ǁîba ûib ǃoa ǃnonaǁî tsēs ai ge ǂkhaiǂkhai. Tsîb kom Eloba ǁkhāti ǁîba ge ǂhai kaio, 41 hoaraga khoen tawa tama, xawe sida hîa Elob di ǃkhōǂuisabeda, ǁîb xa ǁîb di ǃkhō-amao nîse ge ǁhûiǂuiheda tawa. Sida ge ǁîda hîa ǁîb ǀkha ǂû tsî gere ā da, ǁîb ge ǁōba xu khâis khaoǃgâ. 42 ǁÎb ge sada ge mîmā î da khoena ǃGâiǂhôasa aoǁnâba tsî ǃkhō-am ǁîb a ǁnā, ûitsaman tsî ǁō hân di ǀgoraǃgâ-aose Elob xa ge ǁgaumâiheba ǃkhaisa. 43 Hoaraga kēbo-aogu ge ǁîb xa ǃkhō-am tsî ra mî, hoan hîa ǁîb ǃnâ ra ǂgomn di ǁoren nî ǁîb ǀons di ǀgaib ǃnâ ǀûbahe ǃkhaisa.”
Jodeǁî taman* ge ǃAnu Gagaba ra ǃkhōǃoa
44 Tsî noxopab Petruba ǁîn ǀkha ra ǃhoa hîab ge ǃAnu Gagaba nēna go ǁnâun hoana ge tsâǀkhā. 45 On ge Petrub ǀkha ge sī Jodeǁî ǂgomsabena kaise ǃAnu Gagab di ǀkhaeban go Jodeǁî tama khoen tsîna ǃkhōǃoa ǃkhais xa ge buru. 46 On ge ǁîna ge ǁnâu, ǃhao gowagu ǃnâ ǃhoa tsîn Elob di kaisiba ra koase.
Ob ge Petruba ge dî: 47 “ǁÎgu go ǁāǁnâhe ǃkhaisa i kha khoe-e nî ǂnoaǃoa, ǁîn go ǃAnu Gagaba ǃkhōǃoas khaoǃgâ, sada ǁkhāda khami?” 48 Tsîb ge ǁîn nî Jesub Xristub ǀons ǃnâ ǁāǁnâhe ǃkhaisa ge mîmā. Nēn hoan khaoǃgân ge noxopab ǀnîkhamakō tsēde nî hâse ge ǁkhau bi.
© Khoekhoegowab Elobmîs © Bible Society in Namibia, 2020.
