Elob tsî ǁîb di khoen
Asafi ǀgaipetsanas
1 ǁNâu re ti ǁaese, ti ǁkhāǁkhāsa
sadu ǂgaesa di ams di mîdi ǃoa ǂō re.
2 ǂKhōdi ǃnâ ta ge nî ǃhoa;
ǃgôa-ī ge ǁaeb di ǂganǃgâsigu ǃnâ ta ge nî ǃhoa.
3 Xūn ǁnâu ta gen tsî ǂan da an,
sada aboxagu ge ǁgamba dan,
4 ǁîna da ge sida ôana xu gaugau tide;
ǃGoaxa suriba da ge ǃKhūb di ǂkhaisa dīgu
tsî ǁîb di buruxa sîsengu xa nî ǃhoaba.
5 ǁÎb ge Jakob ǃnâ mîmā-e ge ǃgaoǃgao
tsî ǂhanuba Israeli ǃnâ ge ǁgaumâi,
sada aboxanab ge ǁîn ôanan nî ǂanǂanse mîmā khami.
6 În ǃgoaxa a surib dina ǂan
ǀgôan noxopa nî ǃnaese ina.
ǁÎn ge kaikhâin kao ǁîn ôana nî ǁgamba.
7 ǁÎn ge Elob ai nî ǂgomaiǂnûi,
tsîn ge Elob di dīga ǀuru tide
tsîn ge ǁîb mîmāde nî ǃkhōǀgaipe.
8 În tā ǁîn di aboxan khami ī;
ǃnâudanaxa tsî khâikhâisenxa ǁaes
ǂgaogu ân ǁaposa tama
tsîs gagas âna Elob ǃoagu ǂgomǂgomsa tama ge hâ ina.
9 Efraimǁîn toroǃkhamaogu khādi tsî ǂāgu ǀkha ǁâtanisen hâgu
ge torob tsēs ai ge ǃkhoeni.
10 ǁÎn ge Elob di ǃgaeǀhaosa ge ǃkhōǀgaipe tama hâ i
tsîn ge ǁîb ǂhanub ǃnâ ǃgûsa ge ǂkhā.
11 ǁÎn ge ǁîb di dīga ge ǀuru,
buruxa sîsengu, ǁînab ge ǁgauga.
12 ǁÎn di aboxan aiǃâb ge ǁîba buruxa dīna gere dī
Egipteb ǃnâ, Soans di ǀkharib ǃnâ.
13 ǁÎb ge huriba ǀgora tsî ǁîna ge ǃkharu-ū
ǁîb ge ǁgamga ǂgōse ǂnubiǂgoab khami ge mâ kai.
14 Tsēab ge ǁîna ǃâus ǀkha gere ǂgaeǂgui,
tsî hoaraga tsuxuba ǀaes di ǃnâb ǀkha.
15 ǃGaroǃhūb ǃnâb ge ǁîba ǃgareǀuiga ge ǂari kai
tsî ǁîna ǃgamma xu ǁgam-e ge mā.
16 ǁÎb ge ǀuisa xu ǃāroga ge dâu kai
tsîb ge ǁgamga ǃāgu khami ge dâuǁgôa kai.
17 Xawen ge ǁîna ǁkhawa ǁîb ǃoagu gere ǁore,
ǃgaroǃhūb ǃnân ge Hoan xa ǀGapib ǃoagu ge khâikhâisen.
18 ǁÎn ge Eloba ǂgaob ân ǃnâ gere ǃâitsâ
ǁîn ra tura ǂûna ǂgaoǀkhā bis ǀkha.
19 Elob ǃoagu ǃhoa tsîn ge gere mî:
“Eloba ǃgaroǃhūb ǃnâ tāba ǂhomi ǁkhāb a?
20 ǀUisab ge ǂnau o gu ge ǁgamga ge ǂoaxa,
ǃārogu ge ge dâuǂam;
xawe ǂû-e tāb ai ǂhomi ǁkhāb nî xare?
ǁGan-eb xare ǁîb khoena nî ǂhomiba ǁkhā?”
21 Nēnab ge ǁnâu ob ge ǃKhūba kaise ge ǁaixa;
tsîs ge ǀaesa Jakob ǃoagu ge ǂhubi
tsîb ge ǁaib âba ǁkhāti Israeli tawa ge sī.
22 ǁÎn ge Elob ǃnâ ǂgom tama hâ i
tsî ǁîb ores ǀgaiba ǂgomǃgâ tama hâ i amaga.
23 Tsîb ge ǁîba ǃâudi ǀgapise hâde mîmā
tsî ǀhommi di dao-amde ge ǁkhowa-am.
24 Tsîb ge ǁîn ai manaba ge ǀapi kai;
ǀhommi di ǃhorobab ge ǁîna ǂûn nîse ge mā.
25 Hoan ge ǀhomǃgān di pere-i xa ge ǂû
ǁîb ge ǁîna ǃnāǂamsasib ǃnâ sîba-e.
26 ǁÎb ge ǀhomga xu aiǂoas ǂoaba ge ǃgom kai
ǁîb ǀgaib ǀkhab ge ǃkhawagas ǂoaba ge ǂgaeǂgui.
27 Tsîb ge ǁîn ai tsarab khami ǁgan-e ge ǀapi kai
hurib amǃgâ ǁgoe ǃhūb khami ǁgaboxa anina.
28 ǁÎn di hâǃkhaib tawab ge ǁîna ge ǁnā kai
ǁîn tentomdi di ǂnamipe.
29 Tsîn ge ǂû tsî kaise ge ǁâ;
Elob ge ǁnā ǀgaus ai turan ge xūna ǁîna ge mā.
30 Noxopan turab ân xa ǂâu tama hâ
tsîn noxopa ǂû-e amǃnâ ūhâ
31 hîab ge Elob di ǁaiba ge khâi
tsîb ge ǁîn di ǀgaisa khoegu
ǂkham khoegu Israeli diga ge ǃgam.
32 Nēn hoan ǃnân ge ǁîna ǁkhawa ge ǁore
tsîn ge ǁîb di buruxa sîsenga ǂgom tama ge i.
33 Tsîb ge ǁîba tsēdi âna ǁausib khami ge ǀamǀam
tsî kurigu âna ǃaob ǃnâ.
34 ǁÎb ga ǁîna ǃgam, on ge ǁîba gere ôa
on ge oa tsî Eloba gere ôa.
35 ǁÎn ge Elob a ǁîn di ǃgareǀui ǃkhaisa ge ǂâihō,
Elob, Hoan xa ǀGapib a ǁîn ore-ao ǃkhaisa.
36 ǁÎn ge ams ân ǀkha ǁîba gāxaǃnâ
tsî nams ân ǀkha ǁîba gere ǂhumiba.
37 ǂGaob ân ge ǁîb ǃoagu ge ǁaposa tama hâ i
tsîn ge ǁîb ǃgaeǀhaos ǃnâ ge ǂgomǂgomsa tama hâ i.
38 Xaweb ge Eloba ge ǀkhomxaǃnâ i
tsî ǁorena ǀûba tsî ǁîna hîkākā tama ge i.
ǂGui ǃnādeb ge ǁaib âba ge ǂgae-oa
tsî ǁaixasib âba ge ūdawa.
39 ǁÎb ge khoes ǀguisan i ǃkhaisa ge ǂâihō
ǃgomǃkharu ra ǂoab, ǁkhawa oaǀkhī tamab khami.
40 Mâtikō ǃnāden ge ǃgaroǃhūb ǃnâ ǁîb ǃoagu khâikhâisen;
ǁîba ǃgarob ǃnâ ge tsûtsû.
41 Tsîn ge ǁkhawa tsî ǁkhawa Eloba gere ǃâitsâ
tsî Israeli di ǃAnuba ge tsûtsû.
42 Tsîn ge ǂâihō tama ge i ǃommi âb
ǁîna khākhoen âna xu ge ǃnoraǃnora ǃkhaisa.
43 Egipteb ǃnâb ge ǁîb saode ge dī,
tsî buruxa sîsengu âba, Soans ǃnâ.
44 ǃĀgu ânab ge ǀaob ǃnâ ge ǀkharaǀkhara
tsîn ge ǃārogu âna xu ge ā ǁoa i.
45 ǂHoms ǀgînanab ge ǁîn ǁaegu ge sîǂgā ǁîna gere nâna,
tsî ǁgūtsiǁgūben ge ǁîna gere hîkākāna.
46 ǁÎn di ūǀkhīnab ge ǂhomna ge mā;
ǁîn ǀhupub di ǂûtaniba ǂhomna.
47 ǁÎn draibehaideb ge ǃnareb ǀkha ge ǃgam
tsî ǁîn di ǀnomade ǃnareb ǀkha.
48 ǁÎn gomanab ge ǃnareb ǀkha ge ǃgam
tsî ǀgoan âna napab ǀkha.
49 ǁÎb ge ǁîn ai ǁîb di ǀaexa ǁaixasiba ge sîǁnâ
ǁgôasib tsî ǀkhomoǃnâsib tsî ǂōǂōsib
tsî ǂguiǃnâgu tsû-ain di sîsabegu tsîna.
50 ǁÎb ge ǁaib âba daoba ge dība
ǁîn ûibab ge ǁōba xu ūbē tama ge i
xaweb ge ǁîn ûiba ǂhīǁōba ge māǁnâ.
51 ǁÎb ge Egipteb di ǂguroǃnaesaga ge ǃgam
ǂguroǃnaesagu Xammi tentomdi diga.
52 ǁÎb ge ǁaes âba gūn khami ge ǂgaeǂguiǂui
tsî ǁîna ǃgaroǃhūb ǃnâ gere ǂgaeǂgui.
53 Tsîb ge ǁîna ǃnorasase ge ǂgaeǂgui tsîn ge ǃao tama ge i
xawen ge khākhoen âna hurib xa ge ǃgū-aihe.
54 Tsîb ge ǁîna ǁîb ǃanusib di hâǃkhais tawa ge sī-ū,
ǁîb di amǀkhāb ǁôab ge danbasen ǃhommi tawa.
55 ǁÎb ge ǁîn aiǃâ ǃhaode doeǁgaǂui
tsî ǁîdi di ǃhūba ǁîna ǀumixūse ge mā
tsîb ge Israeli ǃhaode ǁîn tentomdi ǃnâ ge ǁan kai.
56 Xawen ge ǁîna Elob, Hoan xa ǀGapiba ǃâitsâ tsî ge ǁaiǁai
tsîn ge ǁîb mîmāde ǃkhōǀgaipe tama ge i.
57 Xawen ge ǁîn aboxan ǁkhān khami îǂhôaoǃnâ i;
ǁîn ge gāxaǃnâ khā-i khami ge ī.
58 ǁÎn ǀgapi ǃkhaidi ǀkhan ge ǁîba ǁaixab nîse gere ǂoeǂoe;
ǁîn di ǁgôa-elogu ǀkhan ge ǁîba ge ǁgonǁgonǂgao.
59 Elob ge ǁnâub geo kaise ge ǁaixa,
tsîb ge Israelǁaesa hoaragase ge ǂhara.
60 Tsîb ge ǁîba Silos di tabernakela ge ǁnāxū
khoen ǁaegub ge mâi hâ i tentomma.
61 Tsîb ge ǀgaib âba ǃkhōsis ǃoa ge māǁnâ
tsî ǁîb ǂkhaiba, mâǃoasabeb ǃomǁae.
62 ǁÎb khoenab ge gôab ǃnâ ge māǁnâ
tsîb ge ǁîb ǀumixūn ǀkha ge ǁaixa hâ i.
63 ǂKham khoegu ge ǀaes xa ge hapuhe
tsî di ge ǂkhamkhoede ǃgamehe tama ge hâ i.
64 ǁÎb di pristergu ge gôab ǃnâ ge ǁō
tsî di ge ǁîgu ǃoatarade ge ā tama hâ i.
65 Ob ge ǃKhūba ǂomsa xus khami ge ǂkhai;
ǁē-aob ra ǂauxûib xa ǃgâiaǂgao kaihe khami.
66 ǁÎb mâǃoasabenab ge ge ǃhae-oa;
ǀamo ǃharaxūbab ge ǁîna ge mā.
67 Josefi tentomsab ge ge ǂhara;
Efraimmi ǃhaosa xub ge ǁhûi tama ge i.
68 Xaweb ge Judab ǃhaosa ge ǁhûi;
Sionǃhommi kaiseb a ǀnamma.
69 ǁNāpab ge ǀgapi ǃkhain khami ǁîb ǃAnu ǃkhaiba ge ǂnubi
ǃhūbaib ǀamoseb ge ǃgaoǃgaob khami.
70 ǁÎb ge Davidi ǁîb ǃgāba ge ǁhûi
tsî ǁîba gūǃharade xu ge ūbē.
71 Daisi ra gūde xūb ge ge ūhā bi
Jakob, ǁîb ǃhaosa nî ǃûise,
Israelǁaes ǁîb disa.
72 Tsîb ge Davida ǁîna ǂhauǃnâ ǂgaob ǀkha ge ǃûi
ǁîb ǃomgu di ǁkhāsib ǀkhab ge ǁîna ge ǂgaeǂgui.
© Khoekhoegowab Elobmîs © Bible Society in Namibia, 2020.
