Josuab ge Moseba ra saoǃgon
(Numeri 27:12-23)1 Moseb ge ǃaruǀî sao ra mîde hoaraga Israelǁîn ǀkha 2 ge ǃhoa: “Tita ge nēsi ǀguikaidisi tsî ǀgamdisi kurixa. Tita ge ǃaruǀî sado ǂgaeǂguis di ǁkhāsib ǃnâ hâ tama hâ, ǁnās xōǀkhāb ge ǃKhūba ge mîba te Jordanǃāba ta ǃgâu tide ǃkhaisa. 3 ǃKhūb sadu Elob ge sadu aiǃâ Jordanǃāba ǃgâu tsî ǁnāpa hâ ǃhaodi hoade nî hîkākā, î du sado ǁîn di ǃhūba ǀhana. Josuab tsîn ge ǃKhūb ge mîmâi khami sado Jordanǃāba nî ǂgaeǂguiǃgâu. 4 ǃKhūb ge Amorǁîn di gao-aokha Sihonni tsî Ogi tsîkhab ge hîkākā khami ǁnā ǃhaodi tsî ǁîn ǃhūb tsîna nî hîkākā. 5 ǃKhūb ge ǁîna sadu ǃomǁae nî māǁnâ tsî du ge sado tita mîmā du hâ ǀgaub ai ǁîna nî sîsenū. 6 ǀGaiba ūhâ î ǁkhoaǂgaoxa! Tā ǁîn xa ǃao tsî ǃhuri, ǃKhūb sadu Elob ǂûb sadu ǀkha nî hâ xuige. ǁÎb ge ǁnāxūǃgâ du tide.”
7 ǁNās khaoǃgâb ge Moseba Josuaba ǂgaiǀkhī tsî hoaraga Israelǁîn aiǃâ ǁîb ǃoa ge mî: “ǀGaiba ūhâ î ǁkhoaǂgaoxa! Sats ge nē khoena ǃKhūb ge ǁîn di aboxaga mîmâiba ǃhūb, ǁîgab nî māseb ǁga nî ǂgaeǂgui tsî ǁîna ǁîb di ǀumi-aose nî dī. 8 ǃKhūb ge sa aiǃâ ǃgû tsî sats ǀkha nî hâ. ǁÎb ge ǁnāxūǃgâ tsî ǁnāxū tsi tide, ǁnā-amaga tā ǃao tsî ǃhuri.”
ǂHanub ge mâ hûǁî kurib hoaba nî khomaihe
9 Moseb ge nē ǂhanuba xoamâi tsî Leviǁî pristergu, ǃGaeǀhaos ǂGaes ǃKhūb disa gere tanigu tsî Israelǁîn ǂgaeǂgui-aogu tsîga ge mā. 10 Moseb ge ǁîga ge mîmā: “Hûǁî kurib, surudegu ra xoaǁnâǃnâheb di ǀams hoas ai, ǁHaodi ǁÂudīb ǁaeb ai nē mîde ǃgarise khomai. 11 Israelǁîn hoan ga ǃKhūb sadu Elob xan ǁhûiǂuibahe hâ ǃkhais tawa ǁîba nî ǀgoreǀîse ǀhao, ots ge nē ǂhanuba ǁîn hoan ra ǁnâuse nî khomai. 12 Khoen hoana ǀhaoǀhao; aorekhoegu, tarekhoedi, tsî ǀgôan tsî ǁkhāti ǃhaokhoen sadu ǃādi ǃnâ ǁan hân tsîna, în ǁîn hoana ǃgâ tsî ǃKhūb sadu Eloba ǁnâuǀnam tsî hoaraga mîdi ǂhanub dide ǃkhōǀgaipe. 13 Nē ǀgaub aib ge sadu surib hîa tātsēs tsîna nē ǂhanub ǃKhūb sadu Elob diba ge ǁnâu tama hâ ina nî ǁnâu. ǁÎn ge nē ǂhanuba ǁnā ǃhūb Jordanǃāba ǃgâu tsî du nî sī ūbasenni tawa du ǁan hâs kōse nî ǁkhāǁkhāsen.”
ǃKhūb ra Moseba ǀuni ǁgui-aisa mā
14 ǃKhūb ge Moseb ǃoa ge mî: “ǃAruǀîts ge gaxu ûiǁaeba ūhâ tama hâ. Josuaba sī ǂgai, î Tentommi ǃnâ ǀkhī-ū bi, î ta ǁîba ǁgui-aide mā.” Moseb tsî Josuab tsîkha ge Tentommi tawa ge sī. 15 ǃKhūb ge ǁîkha kai ǃâus, Tentommi ǂgâ-ams tawa ge hā mâs ǃnâ ge ǂhai.
16 ǃKhūb ge Moseb ǃoa ge mî: “Sats nî ǁō tsî sa aboxagu tawa sâ ǁaeb ge go mâtoa. ǁNās khaoǃgân ge nē khoena ǁîn nî sī ǁanǃnâ ǃhūb ǃnâ, ǁîn ǁaegu nî hâ ǃhao-eloga nî ǀgoreǀîtsoatsoa tsî ǁîn ǀkha ta ge dī ǃgaeǀhaosa khôa tsî tita nî ǂhara. 17 O ta ge tita ti ǁaiba ǁîn ai ǁhōǂui, ǁîna ǂhara tsî ǁîna nî bēxū tsîn ge ǁîna nî hîkākāhe. ǂGuiǃnâgu ǂōǂōsigu ge ǁîna nî hāǂam, tsîn ge ǁnā tsēs ai nî dîsen: ‘Nē ǂōǂōsiga kha Elob sada ǀkha hâ tama xui-ao sada ǀkha ī tama hâ?’ 18 ǁNā tsēs ai ta ge tita ǁîn ge ǃhao-eloga ǀgoreǀî ǃkhais ǃaroma ti aisa ǁîna xu nî gaugau.
19 “ǁNā-amaga nē ǁnaetsanasa xoa, Israelǁîna ǁkhāǁkhā, îs ǁîsa ti ǀhûǀguitimîs ase ǁîn ǃoagu ī. 20 Israelǁîna ta ga ǁîn di aboxaga ta ge nūs ǃnā-u mîmâiba ǂûtanixa ǃhūb ǃnâ sī-ū tsî ǃkhū hâ tsî ǃgâi ûiba ūhâ, on ge ǁîna ǀkhara eloga ǀgoreǀî tsî tita ǂhara tsî ti ǃgaeǀhaosa nî khôa. 21 ǂGuiǃnâgu ǂōǂōsigu ga ǁîna hāǂam, os ge nē ǁnaetsanasa ǀhûǀguitimîs ase ǁîn ǃoagu nî mâ, ǁîn surib nî ǁîsa hoaǁae ǁnae xui-ao. ǁÎna ta ge mîmâiba ǃhūb ǁga ta nî ǁîna sī-ūs aiǃâ ta ge ǀnai tarenan ǁîna ra ǂâi ǃkhaisa a ǂan.”
22 ǁNā tsēs ǁkhās aib ge Moseba nē ǁnaetsanasa xoa tsî Israelǁîna ge ǁkhāǁkhā.
23 ǁNās khaoǃgâb ge ǃKhūba Nunni ôab, Josuaba ǂgai tsî ge mî: “ǀGaiba ūhâ î ǁkhoaǂgaoxa! Sats ge Israelǁîna ǁîna ta ge mîmâiba ǃhūb ǁga nî ūǃgû tsî ta ge tita sats ǀkha nî hâ.”
24 Moseb ge xū-i xare-i ǁnāxūǂui tamase Elob di ǂhanuba ǂkhanis ǃnâ ge xoa. 25 ǁÎb ge xoatoab ge, o Leviǁî pristergu ǃKhūb di ǃGaeǀhaos ǂGaes ǃereamsa ge ūhâ i gu ǃoa ge mî: 26 “Nē ǂHanub ǂKhanis Elob disa ū, î ǃGaeǀhaos ǂGaes ǃKhūb sadu Elob dis xōǀkhā sī ǁgui, îs ǁîsa ǀhûǀguitimî ase ǁnāpa sadu ǃoagu hâ. 27 Tita ge mâti du a khâikhâiǃnâxa tsî ǃnâudanaxa ǃkhaisa a ǂan. Nēpa ta ganupe sadu ǁaegu ûib ǃnâ hâ, hîa xawe du kom sadu ǃKhūb ǃoagu khâikhâiǃnâxa tsî a karosaǂgaoxa, o mâtikō ǃnāsase tita ga ǁō-o! 28 Hoaraga ǃhaodi ǂgaeǂgui-aogu tsî ǂammâisagu tsîga ǀhaoǀhaoba te, î ta nē mîdi hoade ǁîgu ra ǁnâuse gowaǂui tsî ǀhommi tsî ǃhūbaib tsîkha ti ǀhûǀguitimî-aokha ase sadu ǃoagu dī. 29 Tita ga ǁōs khaoǃgâ du nî tita ge mîmā du xūn hoana ǂhara tsî ǁgauoǃnâse tanisen ǃkhaisa ta ge a ǂan. ǃGoaxaǁaeb ǃnâ du ga ǂkhabase ǃKhūb di mûǁae ûi tsî ǁîb di ǁaiba ǁnās ǀkha ǁgoaǂui, ob ge ǂōǂōsiba nî hāǂam du.”
Moseb ǁnaetsanas
30 Moseb ge sao ra ǁnaetsanas di mîde tsoatsoasa xu ǀunis kōse hoaraga Israelǁîn ra ǁnâuse ge ǂgaiǁnâ:
© Khoekhoegowab Elobmîs © Bible Society in Namibia, 2020.
