Elob ge Moaba nî hîkākā
1 Nēs ge Moab xa hâ ǂhôasa.
Tsuxub ǃnâs ge Arsa khôaǂkhūhe tsî Moabǃhūba ge hîkākāhe; tsuxub ǃnâs ge Kirsa khôaǂkhūhe tsî Moabǃhūba ge hîkākāhe. 2 ǁÎn ge Tempeli ǁga ge ǃgûǃapa, Dibons khoen ge ǃnâugu ai ān nîse ge ǂoa; Nebos tsî Medebas tsîra ǃaroman ge Moab khoena gere ǃau-ā. Mâ danas hoas tsî mâ ǀhō-ams hoas tsîn ge ǃgorase a ǂkhomsa. 3 ǁÎn ge ǃgangu ǃnâ ǀhaosarana gere ǂgaeǂgā; ǁîn omdi ǂamǃnâgu tsî ǀhûhâsib ǀhaoǃkhaigu ai i ge mâ-i hoa-e gere ǃau-ā, ǁîn ge ārase gere ǁnāǁgoe. 4 Hesbons tsî Eleales khoen ge ra ǃau-ā, ǁîn ǃau-āb ge kaise ǃnūse ǁgoe Jahas kōse ra ǁnâuhe. ǁNā-amaga gu ge Moab toroǃkhamaoga hui-osiba xu gere ǃau-ā, ǁîgu ǀgaiba gu ge ge ǂoaǃnâ. 5 Ti ǂgaob ge Moab ǃaroma ra ā; ǁîb ǃhū-aon ge Soars tsî Eglat-Selisias tsîra kōse ra ǃhū. ǁÎn ge ā rase Luhits ǃoa ra ǃgûǃapa; Horonaims ǁga garusen ge ǁîn hîkākāhes xa ra ǃgae. 6 Nimrims ǁgamgu ge ge ǂnâ; ǀgân ge ge ǂnâ, ǀasa ǁhaob ge ge ǂnâtoa tsî i ge ǃam hai-i xare-e ge ǀkhai i. 7 ǁNā-amagan ge ǀhaoǀhaon gen tsî ǁguirin gen tsîn hoana Poplarhaidi ǃĀrob tawa ge sī-ū. 8 Amase, Moabǃhūb hoab ǃnâts ge ǁîn āba gere ǁnâu; ǁîn ǃau-āb ge Eglaimsa xu Berelims kōse gere ǁnâuhe. 9 Dimons ǁgamgu ge ǀaob xa ǀoa hâ; xawe ta ge Dimons ǂama ǃnāsa ǃgomsib ǀguiba nî hā-ū. Xam-i ge Moab ǃhū-aon tsî ǃhūb ǃnâ ge ûiǃgau khoen tsîna nî ǁnāǂam.
© Khoekhoegowab Elobmîs © Bible Society in Namibia, 2020.
