Jakob di ǀuni mîdi
1 Jakob ge ôasaga ǁîb tawa ǂgaihā tsî ge mî: “ǀHao go re, î ta taren sago ǀkha ǃgoaxaǁaeb ǃnâ nî ī ǃkhaisa mîba go:
2 “ǀHao re î ǃgâ re sago, Jakob ôago.
ǃGâ go re sago îb, Israela.
3 “Rubentse, sats ge ti ǂguroǃnaesats, ti ǀgaits,
ti aorekhoesi ǀgaib di ǂgurots,
ti ôagu hoagu xa ǃgôasib tsî ǁkhāsib ǃnâ ǃnā hâtsa.
4 Sats ge dâuǃkhū ra ǁgammi khami ī
xawets ge naugu xa ǃnāsa tide,
sa îb kharob ǃnâts ge ǁgoe
tsî ǁnās ǀkha ǁîb kharoba ǀuriǀuri xui-ao.
5 “Simeonni tsî Levib tsîkha ge a khoeǃgâgu.
ǂKhabadīb ǁâtanin ge a ǁîkha ǂû.
6 Tita ge ǁîkha di ǂganǃgâsa ǀapedi ǃnâ ǁhao tide
tsî ǁkhāti ǁîkha ǂnûdi ǃnâ ǃâ tide,
ǁîkha ge khoena ǁaib âkha ǃnâ ǃgam
tsî ǁgōgu ǃnôaǁapaga ǂanapega gere ǃkhaiǃgao xui-ao.
7 ǁÎkha ǁaixasiba ta ge ǀaexasib ao ra ǀâxare,
tsî ǁîkha ǁgôasiba, ǁkhōǁkhōsab a amaga.
Tita ge ǁîkha Jakob ǃnâ ǀgora
tsî Israeli ǃnâ nî ǀgaruǀgaru.
8 “Judatse, sa ǃgâsagu ge satsa nî koa.
Sa ǃommi ge sa khākhoen di ǃaos ai nî hâ.
Sa ǃgâsagu ge sa aiǃâ nîra ǃhon.
9 Judatse, sats ge ǂkham xammi,
amǀnēn âba ǃgam tsî oms âb ǁga ra oab,
ǃāǂuisen tsî ra ǁgoeb khami ī.
Tari-e ǁnâi ǁîba ǂkhaiǂkhaisa nî dītsâ?
10 Gaohais ge Judaba xu bē tide,
ǀkharub âb ge ǁîb ǂaira ǁaeguba xu bē tide.
ǁAedi ge ǁîba koa
tsî ǁîb aiǃâ ǁnâuǀnamxasib ǃnâ nî ǃhon.
11 ǁÎb ge ǂkham dâuki-i âba draibehais,
ǁîs hoadi xa ǂoaǂamsas tawa nî ǃgaemâi.
ǁÎb ge saran âba ǂauxûib ǃnâ ǁā
tsî anaǂamsarab âba draibeǂûs di ǀaob ǀkha ra ǁā.
12 ǁÎb mûra ge ǂauxûib xa nî ǀapa ;
tsî ǁgûgu âb ge dai-e ās xa nî ǃuri.
13 “Sebulonni ge hurib xōǀkhā nî ǁan.
ǁÎb ǀnomammi ge doe-omde ǁhaiǁhâǃkhaise nî ība
tsî ǁîb ǃhūǀkharib ge Sidons kōse nî sī.
14 “Isaskari ge ǀgaisa dâuki-i
ǁî-i di ǃgaeǃgâǁgarura ǁaegu ǁgoe i khami ī.
15 ǁÎb ga sâǃkhais
tsî ǃhūb a ǃgâi ǃkhaisa mû,
ob ge ǃgomma nî tanise ǃgamǃgâ
tsî khobosis sîsenna nî dī.
16 “Danni ge Israeli ǁaedi di ǀguis ase
ǁaes âba nî ǀgoraǃgâ.
17 ǁÎb ge ǀao-i xase nî ī;
daob xōǀkhā hâ ǃgāxa ǀao-i,
hāba ǃnôadi ai ra nâ-e,
îb ǃgapi-aoba khaosǀkhābǀî ǃgauhe.
18 “ǃKhūtse, sa oresa ta ge ǃâu hâ.
19 “Gadi ge ǂkhôa ra khoen xa nî ǁnāǂamhe
xaweb ge dabasen tsî ǁîna nî ǁnāǂamǃoa.
20 “Aseri ǃhanab ge ǃgâi ǂûna nî ūǀkhī
tsîb ge ǁîba gaosi ǂûna nî ūhā.
21 “Naftalib ge ǁkhama-i khami ǃnorasase ǃkhoe
tsî îsa mîde nî ǃhoa-i.
22 “Josefi ge ǂûtanixa ǂgonab
ǁnâugu âb ra ǂnubiǂgoab tawa ǃkharub khami ī.
23 Khākhoen âb ge ǁîb ǃoagu au
tsî ǁîba ǂāb tsî khās ǀkha nî ǁkhâu.
24 Xawes ge ǁîb di khāsa ǀkhamasase nî hâ;
ǁôagu âb ge nî ǀgaiǀgaihe,
Jakob ǀGaisab di ǁôakha ǀkha,
ǃÛi-aob, Sâu-aob Israels dib ǀkha.
25 Sa îb di Elob ge satsa nî hui
Hoaǀgaixa Elob ge ǀgapiseba xu nî hā;
ǀnanub tsî ǃhūb ǃnakaba xu hâ ǁgamgu
tsî ǂgui ǀgoan tsî ǀgôan ǀkha nî ǀkhae tsise.
26 Sa îb di ǀkhaegu ge
ǀamo ǃhomgu ǃgâ-ai a ǀgaisa.
ǃHomgu di ǃgâi ǀkhaega
a gu Josefi danas ai,
tsî ǁnāb ǃgâsaga xu ge ǀgorahe hâ ib di ǀgâugu ai hâ.
27 “Benjaminni ge ǁaixa ǂhirab
amǀnēn âba ǁgoaga ǀkhauǃā
tsî ǃuia ǃgaurona ra ǀgorab khami ī.”
28 Nēdi ge Israels di disiǀgamǀa ǃhaode, tsî nēdi ge mîdi hîab ǁgûba mâ ǀgôab hoab ǃoa, ǃgâi-i a khami gere gowaǂuide.
Jakob di ǁō tsî ǁkhōhes
29 ǁNās khaoǃgâb ge Jakoba ôasaga ge mîmā: “Nēsisa ta ge ti khoen ǀkha ǁōb ǃnâ nî ǀhaoǀhaohe, o ta ge ra ǂgan go î go ti îgu ǀkha Efronni Hetǁîb di ǃhanab ǃnâ hâ ǁhoaǃnās, 30 Maxpelas, Mamres di aiǂoasǀkhāb ai, Kanaanǃhūb ǃnâ hâs ǃnâ ǁkhō te. Abrahammi ge nē ǃhanab tsî ǁhoaǃnās tsîna Efronna xu ǁîb di ǂhunuma ǁkhōǃkhaise ge ǁama. 31 ǁNāpas ge Abrahammi tsî ǁîb taras Saras tsîra ge ǁkhōhesa; ǁkhāti Isaki tsî ǁîb taras Rebekas hâra; tsî ǁnāpas ge Leasa ta ge ǁkhōsa. 32 Nē ǃhanab tsî ǁhoaǃnās ge Hetǁîna xu ge ǁamahe, xuige ǁnāpa ǁkhō te re.” 33 Nē ǁguiǂamdeb ge mātoas khaoǃgâb ge Jakoba ǁgoe-oasen tsî ge ǁō.
© Khoekhoegowab Elobmîs © Bible Society in Namibia, 2020.
