ǁNâuǀnamxasib ǀkhaegu
(Deuteronomium 7:12-24Deuteronomium 28:1-14)1 ǃKhūb ge ge mîmā: “Tā ǀkhara elogu tamas ka io īgu tamas ka io ǀuiǂgurihaigu, tamas ka io ǀui-īga ǀgoreǀîs ǃaroma kuru. Tita ge ǃKhūta sadu Elota. 2 Sâtsēsa khai, î tita ra ǃoabaǃnâhe ǃkhaiba ǃgôasib ǃnâ sîsenū. Tita ge ǃKhūta.
3 “Ti ǂhanugu ǃoa ûi tsî du ga ti mîmāde ǁnâuǀnamo, 4 o ta ge ǀnanuba ǂhanu ǁaeb ai nî sîba du, î gu ǃhanaga ǂûtani tsî ǂûhaide ǂûna tani. 5 Sadu ǃhanagu ge kaise nî ǂûtani, î du draibena ǃoras ǁaeb ai noxopa ǃhoroba ǃgao, tsî ǃhoroba tsoros ǁaeb ai noxopa draibena ǃora. ǂÛ ǂgao du ra xūn hoana du nî hō tsî ǂkhîb ǃnâ sadu ǃhūb ǃnâ hâse.
6 “ǃAo-i ose du sâsase nî ǁomga ta ge ǂkhîba ǃhūb ǃnâ nî mā. ǁAixa ǀguruna ta ge ǃhūba xu nî dībē tsî ǃaruǀî-i ge toro-i xare-e hâ tide. 7 Sadu khākhoen ǂamai du ge nî danao kai; 8 koro khoen ge ǀguikaidisi khoen ǂama nî danao kai tsî ǀguikaidisi khoena disiǀoadisi khoen ǂama. 9 ǀKhae du tsî ta ge ǂgui ǀgôana nî mā du; ti ǀkhāb ǃgaeǀhaos dib sadu ǀkha ta ge dība ta ge nî ǃkhōǀgara. 10 Sadu di ǃgaos ge kurib hoaragabas nî hâse nî ǃnāǂam, tsî ǁnās ǃgâ-ai du ge ǀoro ǃgaos di ǂûna nî aoxū, ǀasana ǃkhai-e dības ǃaroma. 11 Tita ge sadu ǁaegu, ti ǃanu Tentommi ǃnâ nî hâ, tsî sado xu tātsēs tsîna dabasen tide. 12 Tita ge sadu ǀkha nî hâ; tita ge nî sadu Elo tsî sadu ge nî ti ǁae. 13 Tita ǃKhūta sadu Elota ge sado Egipteba xu ge ǂgaeǂguiǂui ǃaruǀî du khobosis ǃnâ ûi tidese. ǁNā ǀgaib sado gere ǁgâiǁnâba ta ge ge khôa tsî ta ge sadu danadi ǀgapise kuihe hâse ge ǃgû kai du.”
ǁNâuǀnamoǃnâsib ǁkharab
(Deuteronomium 28:15-68)14 ǃKhūb ge ge mîmā: “Ti mîmāde du ga ǁnâuǀnam tama i, o du ge nî ǁkharahe. 15 Ti ǂhanugu tsî mîmāde ǁnâuǀnamsa du ga ǂkhā tsî tita ge sadu ǀkha dī ǃgaeǀhaosa khôa, 16 o ta ge nî ǁkhara du. Tita ge tsūǃgâb, ǂuruhe ǁoa ǀaegu tsî ǁkhais, ǂgī kai tsî sadu ûiba ra kā kais tsîna nî hā kai. Sadu ǃkhomna du nî tsoro, xawe hui tide, sadu khākhoen nî dan du tsî ǃhana du hân hoana hapu xui-ao. 17 Sadu ǃoagu ta nî khâi tsî du nî danhe, tsî ǁnān sado ǁkhan hân ge sado nî ǂgaeǂgui; ǁnāti du ǃaob xa nî ǃkhōhe, î du sauruhe tama du hâ hîa ǃkhoeni.
18 “Nēn hoan khaoǃgâs tsîna du ga ǁnâuǀnam te tama i, o ta ge sadu ǁkharaba hû ǃnāde nî ǀaro-ai. 19 Sadu karosa ǂnīsasiba ta ge nî khôa; ǀnanu-i ǀapi tide, tsî sadu ǃhūb ge ǂnâ tsî ǀurib khami nî ǃgari. 20 Sadu ǀgaisa sîsenni ge xū-i xare-e harebe tide, sadu ǃhanagu ǂûtani tide tsî di haide ǂû-i xare-e tani tide xui-ao.
21 “Tita du ga mâǃoa tsî ǁnâuǀnam tama is ǀkha aiǃgû, o ta ge ǁkhawa sadu ǁkharaba hû ǃāde nî ǀaro-ai. 22 Tita ge ǁaixa ǀguruna sadu ǃnâ nî sîǂgā, sadu ôan tsî sadu ǂgarib tsîn nî hîkākāhese. Kaise ǀoro khoen ǀguin ge nî ûiǃgau tsî gu ge sadu daoga ǃū-aisase nî ǁgoe.
23 “Nē ǁkharagu tsîn khaoǃgâ du ga noxopa sadu ǁnâuǀnamoǃnâsib ǀkha aiǃgû, 24 o ta ge sadu ǃoagu khâi tsî hû ǃnāde aiǃâkam ǁkharagu xa ǀgaisase nî ǁkhara du. 25 Toroba ta ge sada ǃgaeǀhaosa du ge khôa xui-ao sadu ai nî hā kai, tsî du ga ǃādi ǃnâ gauǃgûǂgâ, o ta ge ǂuruǂuruhe ǁoa ǀaega sadu ai nî sî, î du ǁgarihe tsî sadu khākhoen ai ǁkhaeǁnâsen. 26 ǂÛn di ǂgâxasa ta ge nî ǁkhae, î di disi tarade ǀgui ǁganoms ǀguisa perena ams ǃaroma sîsenū. ǁÎdi nî ǀgora du pereǃân ge ǀoro tsî ǁâ kai du tide.
27 “Nē xūn hoan khaoǃgâ du ga tita mâǃoas ǀkha aiǃgû tsî ǁnâuǀnam te tama i, 28 o ta ge ti ǁaib ǃnâ sadu ǃoagu khâi tsî sadu ǁkharaba hû ǃnāde ǂguros xa ǃnāsase ǁkhawa nî ǀgaiǀgai. 29 Sadu ge ǁnātikōse ǃâ tsî sadu ǂhunuma ǀgôana nî ǂû. 30 Sadu ǀgoreǀîǃkhaigu, sadu ǃgâihamxūn di altardi tsîn hoana hîkākā tsî ta ge sadu ǁō hâ sorode sadu ǁō hâ īgu ai nî aoǁgui. Kaise ui-uisa ǃgôaǁnâs 31 ǀkha ta ge sadu ǃādi tsî ǀgoreǀîǃkhaigu tsîna hîkākā tsî sadu ǁguibade ǃkhōǃoa tide. 32 Sadu ǃhūba ta ge hoaragase nî hîkākā, în sadu khākhoen sadu ǃhūb ǃnâ nî ǁanna ǁnās xa burugâ kaihe. 33 Toroba ta ge sadu ǂama nî hā-ū tsî sado ǃhao ǃhūgu ǃnâ nî ǀgaruǀgaru. Sadu ǃhūb ge nî ǃū-aisa tsî sadu ǃāde hîkākāhe hâse hâ. 34-35 Ob ge ǃhūba sadu ge mā bi tama hâ i sâba nî hō-oa; ǁîb ge nî ǃū-aisa tsî sadu ǃkhōsis ǃnâ sadu khākhoen ǃhūb ǃnâ hâ hîab ge ǁîba nî sâ.
36 “ǁNān ǃkhōsis ǃnâ hâna ta ge ǁnāti nî ǃao kai, în haiǂnareb, ǂoab xa ra ǃgomheb di ǀōb tsîna ǃkhoeni. Torob ǃnâ sauruhe hâ khami du nî ǃkhoe tsî du nî sadu khākhoeb ǀkhaipa ǁnāǃansen. 37 Khoe-i xa du sauruhe tama hîa du ge ǁîǃnāpe nî ǃkhoeǃgaugu, tsî khākhoe-i xare-e mâǃoa ǁkhā tide. 38 Sadu khākhoen di ǃkhōsis ǃnâ ǁō tsî du ge sadu khākhoen di ǃhūb xa nî hapuhe. 39 ǁNā ǁîn di khākhoen di ǃhūgu ǃnâ ra ûiǃgau ǀoron ge ǁîn ǁoren tsî ǁîn aboxan di ǁoren ǃaroma nî kā.
40 “Xawe sadu surib ge ǁîn ǂûn tsî ǁîn aboxan hîa tita mâǃoa tsî ge ti ǃoagu khâikhâisenn di ǁorena nî ǁguiǁnâ. 41 ǁÎn ge ge ǃaroma tita ge ǁîn ǃoagu khâi tsî ǁîna ǃkhōsis ǃnâ ǁîn khākhoen di ǃhūgu ǃnâ sîǂgāsa. ǁNās khaoǃgâb ga sadu suriba ǃgamǃgamsen tsî ǁîn ǁoren tsî khâikhâisens di ǁkharaba matare, 42 o ta ge ti ǃgaeǀhaos Jakob, Abrahammi tsî Isaki hâgu ǀkha ta ge dīs xa ǂâi tsî ti mîmâis, ti khoena ta nî ǃhūba mās disa nî ǀasaǀasa. 43 ǃHūb ge aibe ǃū-aisase ǁgoe tsî sâb ga hâ ǁaeba nî hō-oa, tsîn ge ǁîna ǀoasa ǁkharab ti ǂhanugu tsî mîmāde ǂharas diba nî matare. 44 Xawe, nēsin ga ǃkhōsis ǃnâ ǁîn khākhoen ǃhūb ǃnâ hâ, xawe ta ge hoaragase ǁîna ǀûǀkhā tsî hîkākā tide. Nēs ge ǁîn ǀkha ta ūhâ ǃgaeǀhaosa nî khôa, tsî tita ge ǃKhūta ǁîn di Elota. 45 Tita ge ǁîn aboxagu ǀkha ta ge dī ǃgaeǀhaosa nî ǀasaǀasa, ti khākhoen hoana ta ti ǀgaib, ti ǁaesa ta ge Egipteba xu ǂgaeǂguiǂui-ūba nî ǁgause, tita ǃKhūta nî ǁîn di Elo kai ǁkhāse.”
46 Nēn hoan ge ǂhanugu tsî mîmādi ǃKhūbge Moseba Sinaiǃhommi ai Israelǁîn ǃaroma a māna.
© Khoekhoegowab Elobmîs © Bible Society in Namibia, 2020.
