ǂHumi kēbo-aogu ǃoagu hâ kēbos
1 ǃKhūb di mîs ge tita ǃoa ge hā: 2 “Khoenôa ǀgôatse, Israeli kēbo-aogu hîa ra kēbogu ǃoagu kēbo, î ǁîgu hîa ǁîgu ǂhunuma mûnanaiba xu ra kēboga mîba: ‘ǃKhūb di mîsa ǁnâu re!’ ”
3 Nētib ge ǃKhūb Eloba ra mî: “Tsūba gu ǁnâ gâre kēbo-aogu ǁîgu gagaba ra sao, xawe xū-i xare-e mû tama ga! 4 Israeltse, sa kēbo-aogu ge ǀgirigu khami ǃū-aisa ǃkhaidi ǃnâ gere hâma. 5 Sago ge ǁhūdi ǃnâ ǂharo tamas ka io Israeli ommi di ǂnubiǂgoaba kuru tama ge hâ i, ǃKhūb di tsēs aib ǃkhams ǃnâ ǁaposase nî mâse. 6 ǁÎgu ge ǂhumiba aimûǀgaru tsî ǂhumiba ra ǀhae. ǁÎgu ra mî: ‘ǃKhūb ra mîsa: ǃKhūb xa gu sîhe tama, xawe gu ge ǁîgu mîs di dīǀoaǀoasa ra ǃâu!’ 7 ǂHumi ai-e go mû tama hâ tamas ka io ǂhumi ǀhae xū-e, nēti gu ra mî ǃnūbai: ‘ǃKhūb ra mî, mî tama ta ga i xawe?’ ”
8 ǁNā-amagab ge ǃKhūba Eloba ra mî: “ǂHumiba go ge ǃhoa tsî ǂhumi ai-e mû xui-ao, ta ge sago ǃoagu hâ,”
tib ge ǃKhūb Eloba ra mî.9 Ti ǃommi ge ǂhumi aina ra mû tsî ǂhumiba ra ǀhae kēbo-aogu ǃoagu nî hâ. ǁÎgu ge ti khoen di ǀapemās ǃnâ hâ tide tamas ka io Israeli ommi din ǃnâ xoamâihe tide, tamas ka ion ge Israeli ǃhūb ǃnâ ǂgâ tide. Tsî go ge tita a ǃKhū ǃkhaisa nî ǂan.
10 “ǁNā-amaga, amase gu ra ti khoena ǂgaeǂhapu tsî: ‘ǂKhîb,’ ti mî, ǂKhî-i xare-i ǀkhai hîa. Tsî khoen ga ǂnubiǂgoaba ǂnubi, o gu ge nē kēbo-aoga ǁîba ǃgū-ais ǃaroma ǀgui nî ǂkhau-ai. 11 Kēbo-aogu nē ǂnubiǂgoaba ǃgū-ais ǃaroma ra ǂkhau-ai ga mîba ǁnā ǂnubiǂgoab nî ǁnā ǃkhaisa! Kai ǀnanub ǃnaredi ǀkha hâb ge ǁîb ai nî ǁnā tsî ǀgaisa ǂoas ge nî khâimâ. 12 Tsî ǁîb ga ǁnā, on kha khoena xare mî tide: ‘ǃGū-ais di ǂkhau-aiba kha mâpa go ī?’ ”
13 ǁNā-amagab ge ǃKhūb Eloba ra mî: “Ti ǁaib ǃnâ ta ge ǀgaisa ǂoasa khâimâ kai tsî ti ǁaib ǃnâ ta ge kai ǀnanub ǃnareb ǀkha hâba nî hā kai ǁnā ǂnubiǂgoaba hîkākās ǃaroma. 14 Tita ge ǃgū-ais ǃaroma ǀgui go ge ǂkhau-ai ǂnubiǂgoaba ǃhūb kōse nî khôaǁnâ, ǁîb ǃgaoǃgaob nî ǀkhaikhās kōse. ǁÎb ga ǁnā, o go ge sago tsîna ǁîb ǃnâ nî ǁō, tsî go ge tita a ǃKhū ǃkhaisa nî ǂan.
15 “Nēti ta ge ti ǁaiba ǂnubiǂgoab ai tsî ǁnāgu ǃgū-ais ǃaroma ǀgui ǁîba ge ǂkhau-ai gu on ai. Tita ge nî mî: ‘ǂNubiǂgoab tamas ka io ǁîba ǃgū-ais ǃaroma ǀgui ge ǂkhau-ai gu tsîn ge ǃaruǀî a ǀkhai, 16 ǁnā kēbo-aogu Israeli digu ge Jerusalems xa kēbo tsî ǂkhîb aide ǁîs ǃaroma gere mû, ǂkhî-i xare-i ǀkhai hîa,’
tib ge ǃKhūb Eloba ra mî.”ǂHumi kēbo-aodi ǃoagu hâ kēbos
17 “Sats, khoenôa ǀgôatse, sa aisa Israeli di ǀgôadi ǁîdi ǂhunuma ǂgaoǂansa xu ra kēbodi ǃoagu ǃammâi. ǁÎdi ǃoagu kēbo, 18 î mî: Nētib ge ǃKhūb Eloba ra mî:
“ ‘Tsūba di ǁnā tarekhoedi ǃganude mâ ǃomǃaros hoas ǃaroma ra ǂomdi tsî tsaura ǃkhaiba gaxusib mâ khoe-i dib ǃoa ra dīde, khoen di ûiba nî sâuse. Ti khoen ûiga ǃau tsî du sadu ǂhunuma ûiga ra sâu ǂgao? 19 Ti khoen ǁaegu so ge tita ge ǀuriǀuri, ǃomsǀoa gerstǃhororo-i tsî pere ǃâron ǃaroma. ǁŌ tama ka hâ khoena ǃgam tsî ûi tama ka hâ khoena ge ûi kai. Ti khoena so ge ge ǂhumiba tsîn ge ǁîna saso ǂhumiba ge ǃgâ.’ ”
20 ǁNā-amagab ge ǃKhūb Eloba ra mî: “Mû, tita ge saso ǃomǃaro ǃganudi ǁîdi ǀkha so khoen ûiga ra ǂgaeǂhapudi ǃoagu hâ. Tita ge ǁîde saso ǃomga xu nî khôaǁnâ, tsî ǀui-anin khami so ra ǃkhō khoena ûin nîse nî ǃnoraǃnora. 21 Saso ǃkhaiga ta ge ǀkhauǃā tsî ti khoena saso ǃomǁaeba xu nî ǃnoraǃnora. ǃAruǀîn ge ǁîna saso amǀnē kai tide, tsî so ge tita a ǃKhū ǃkhaisa nî ǂan.
22 “Saso ge ǂhanu-ai khoen di ǂgaoga ǂhumib ǀkha ge ǂkhabaǂkhaba, tita ǁîna ǂkhabaǂkhaba tama xawe; saso ge ǂkhaba khoena ǁîn ǂkhabadīb ǃnâ ǃaruǀî ǀgui ǂkhabaǂkhaba, ûib ǃoa ǁîna huis ǃās ǃnâ. 23 ǁNā-amaga so ge ǃaruǀî ǂhumi ai-i xare-e mû tide tamas ka io aimûǀgaru-i xare-e sîsenū tide. Ti khoena ta ge saso ǃomǁaeba xu nî ore. O so ge tita a ǃKhū ǃkhaisa nî ǂan.”
© Khoekhoegowab Elobmîs © Bible Society in Namibia, 2020.
