Elob ǀgoraǃgâs tsî ǀkhommi
ǁNaeǃnans ǂgaeǂgui-aob ǃoa. Davidi di Maskils, Doegi, Edomǁîb ge hā tsî Saula “Davidi ge Ahimelexi oms tawa go hā” ti mîba ǁaeb dis.
1 Tare-i ǃaromats ǂkhabab xa ra koasen, ǀgaisa khoetse?
Elob di hâhâ ra ǀnammi ge hoa tsēsa ra hâ.
2 Sa nams ge hîkākāsa ra ǀape
ǀāǀāhe hâ gôa-i xase,
gāxaǃnâb di sîsenaotse.
3 Sats ge ǂkhababa ǃgâib ǃgâ-ai ǀnam;
ǂhumiba, ǂhanu-aisiba ǃhoas ǃgâ-ai.
4 Sats ge hîkākā ra mîde ǀnam namts, gāxaǃnâsib ditsa.
5 Elob ge ǀamosib kōse nî hîkākā tsi;
ǁîb ge satsa tsububē tsî sa tentomsa xu nî ūbē;
ǁîb ge ûitsaman di ǃhūba xu nî ǃhomǂui tsi.
6 Tsîn ge ǂhanu-ai khoena nēsa mû tsî nî ǃao;
tsîn ge satsa âiǂui tsî nî mî:
7 “ǁNāb ge khoeb, Eloba ǁîb di ǁhaiǁhâǃkhaise dī tamaba
tsîb ge ǁîb di ǃkhūsib di ǃnāǂamsasib ai ra ǂgomaiǂnûi
tsîb ge nauna ra hîkākā.”
8 Tita ge ǀkherahai-i, Elob ommi ǃnâ ra ǁhao-i khami ī;
tita ge Elob di hâhâ ra ǀnammi ai ǀamose ra ǂgomǃgâ.
9 ǀAmose ta ge nî gangan tsi dīts gen ǃaroma
tsî ta ge sa ǀons ai nî ǃâu,
sa ǃanun di ǀgūhâsib ǃnâ hâs a ǃgâi xui-ao.
© Khoekhoegowab Elobmîs © Bible Society in Namibia, 2020.
