1 Teofilutse, ti ǂguro ǂkhanis satsa ta ge xoabas ǃnâ ta ge Jesub gere ǁîna tsoatsoasa xu dī tsî ǁkhāǁkhā xūn, ǁîb sîsennab ge tsoatsoa ǁaeba xu, 2 ǁnā tsēs hîab ge ǀhommi ǃnâ ūǃapahes kōsen xa ge xoaba tsi. ǁKhātib ge ūǃapaheb nîs aiǃâ ǁîb di ǃkhōǂuisa apostelga* ǃAnu Gagaba xu hâ ǁguiǂamde gere mā. 3 Tsî hakadisi tsēde ǁîb ǁōb khaoǃgâb ge ǁîgu tawa ǁaeba xu ǁaeb ǁga îganǀgēǁoasaseb ûi hâ ǃkhaisa gere ǁgausen. Tsî nē ǁaegu ǃnâb ge ǁîba ǁîgu ǀkha Elob Gaosib xa gere ǃhoa. 4 Tsî ǁîgu ǀkhab ǂnôa ra ǂûseb ge ǁîga ge mîmā:
“Tā Jerusalemsa xu ǃgû, ǁGûb ge sagob mîmâiba ǃAnu Gagab ǀnai ta ge mîba goba go noxopa ǃkhōǃoa tama hâ hîa. 5 Johaneb ge ǁgam-i ǀkha gere ǁāǁnâ, xawe ǀgū ǁaeb ǃnâ du ge ǃAnu Gagab ǀkha nî ǁāǁnâhe.”
Jesub di ǀhomǃapas
(Markub 16:19-20Lukab 24:50-53)6 Tsî Jesub ǀkha gu ge ǀhao, o gu ge apostelga “ǃKhūtse, ǁkhawats kha satsa Israelǁîna gaosiba nî dī-unuba?” ti ge dî bi.
7 Tsîb ge Jesuba ǁîga ge mîba: “Ti Îb ge aitsama ǁîb di ǁkhāsib ǀkha ǁaegu tamas ka io kamaga ra ǂnûiǂgā tsî sago di tamas ge ǁîna ǂansa. 8 Tsî go ge ǃAnu Gagab ga hāo ǀgaiba ǃkhōǃoa tsî hoaraga khoen Jerusalems, Judeab, Samariab* tsî hoaraga ǃhūbaib ǃnâ hâna tita xa nî ǀhûǀguiba.” 9 Tsî nē xūnab ge mîtoas khaoǃgâb ge ǁîgu ra kō hîa ǀhommi ǃoa ǃâus ǃnâ-u ge ūǃapahe tsî gu ge ǁîba ǃaruǀî mû tama ge i. 10 Tsî ǁnāti gu ǀhommi ǁga mâ ra kō, hîa kha ge ǃnapetamase ǀgam khoekha hîa ǃuri sarana ǂgaeǂgā hâkha ǁîgu xōǀkhā ge hā mâkha ge mûmâ. 11 Tsî kha ge ǁîga nēti ge dî: “Galileaǁî aogo, tare-i ǃaroma go kha ǁnāti ǀhomma mâ ra kō. Jesub ge ǀhommi ǃoa go ūǃapahe, xaweb ge ǀhommi ǃoab gu ūǃawahe ǀgaub ǁkhāb ai ǁkhawa nî oahā.”
Judab di ǃkhōǃkhuni-aob
(Mateub 27:3-10)12 Tsî gu ge Jerusalems hîa ǁaubexa ǀgui kilometera ǀKheraǃhomma xu ǁgoes ǁga ge ǁaru. 13 ǃĀs ǃnâ gu ge sīo gu ge ǀgapiseb di ǃnā-oms, ǁîs tawa gu gere hâs ǃnâ ge ǀhao. ǁNāpa ge hâ i apostelgu ge Petrub, Johaneb, Jakobub, Andreab, Filipub, Tomab, Bartolomeub, Mateub, Alfeub ôab Jakobub tsî Simonni, ǀkhara ǃhūb khoe-i nî ǁîb ǃhūba ǂgaeǂgui ǃkhaisa gere mâǃoab tsî Judab, Jakobub ôab hâga.
14 ǁÎgu ge ǁnaetisase ǀguiǂâixase ǀgore gu nîse gere ǀhao. ǁKhāti di ge Marias, Jesub di îs, ǀnî taradi tsî Jesub di ǃgâsagu tsîn ona ǁnāpa ge ǀhao hâ i. 15 Ob ge Petruba ǁnā tsēdi ǃnâ ǁaubexa ǀguikaidisi tsî ǀgamdisi ǃgâsa ǂgomsaben hîa ge ǁnāpa ǀhû hâ in ǁaegu ge khâi, ǁîn ǀkha nî ǃhoase.
16 Tsîb ge ge mî: “ǃGâsado, Davidi ge ǃAnu Gagab xa ǂgaeǂguihe hâse Judab xa mî xūn ge Xoas nî dīǀoaǀoahese ge ī. ǁÎb ge ǁnāgu hîa Jesuba nî ǃkhōga ge sī-ū. 17 ǁÎb ge ge sige di ǀgui i tsîb ge nē ǃoabas di ǃâ i.” 18 Ob ge Judaba ǁnā ǂkhabadīb ǃaromab ge matarehe mari-i ǀkha ǃhanaba ge ǁama. Nē ǃhanab ǃnâb ge danas ǂama ǁnā tsî soros âba ge ǂariǃā tsîn ge ǃnāxūn âba ge ǁnāǂoa. 19 Tsî Jerusalems di khoen hoan ge nēsa ǂan, on ge ǁîna nē ǃhanaba Akeldama ti ge ǂgai, nēs ge ǂnûiǃkhunihes kao “ǀAoǃhanab” ti ra ǂâibasen.
20 “Psalmdi di ǂkhanis ǃnâ i ge nēti xoahe hâ:
“ ‘As ǁanǃkhais âba ǀkhaiǃnâ;
a i tā khoe-e omdi ân ǃnâ ǁan.’
ǁKhāti
‘A i ǀnî khoe-e
ǁîb di ǃharosa ū.’
21 “O i ge nēsisa ǂhâbasa Judaba nî ǃkhōǃkhuni khoeba da nî ǁhûi ǃkhaisa. ǁKhātib ge ǁîba sige ge ǃKhūb Jesub ǀkha hâ i ǁaeba xu sige ǀkha nî hâ hâ i, 22 Johaneb xab ge ǁîba ǁāǁnâhe ǁaeba xu ǀhommiǀîb ge sada ǁaeguba xu ūǃapahes kōse. Tsî ǁhûiǂuihe ka khoeb ge ǁkhāti Jesub di khâis xa sige ǀkha nî ǃkhō-am.”
23 Tsîn ge ǁîna ǀgam khoekha ge ǁhûi, Josefi hîa Barsabab ti gere ǂgaiheb, Justub tis tsîna ge ǂansa ib tsî Matiab tsîkha. 24 On ge ǁîna ǀhû hâse ge ǀgoretsoatsoa: “ǃKhūtse, sats hîa ǂgaoga a ǂantsa, sats go ǁhûiǂuibasenna ǁgau da re, 25 ǁnāb hîa satsa apostelse nî ǃoabab, Judab hîa sige ǁnāǃgâ tsî ǁîb nî hâse i ǃkhaib ǃoa ge ǃgûba nî ǃkhōǃkhuniba.” 26 ǁNās khaoǃgân ge ǂnōgus ǃnâ-u Matiaba ge ǁhûi tsîb ge apostel kai tsî nau disiǀguiǀa apostelgu ǀkha gere ǃoaba.
© Khoekhoegowab Elobmîs © Bible Society in Namibia, 2020.
