ǁŌb
1 ǁŌtse, tarexas kha ǃgâiǃō khoe-i, ǂkhîb ǃnâ ǁî-i di ūhâxūn ǀkha ûi hâ i, ǂâiǂhansende xu ǃnorasa tsî ǁî-i di ǂû-e ǃgâise ra ǂû-i ǃaroma sats xa ǂâisa au.
2 ǁŌtse, sa ǀgoraǃgâs ge ǀgâsib ǃnâ ûi hâ khoe-i, ǂurusiba khao-oa, kaise kaira, ǂâiǂhansendi ǀkha ǃnao-aisa, ǂgī tsî ǃâubasenoǃnâ-i ǃaroma ǁkhoreǁharesa.
3 ǃKhūb, Elob Hoan xa ǀGapib ge ûitsama kurusabe-i hoa-i nî ǁō ǃkhaisa ge mîmā. Sada ge ǁîb di ǁkhoreb ǀkha da nî ǂnoagu soas ǃnâ hâ tama hâ 4 ǃKhūb ge ǁnāsa mâ ûitsama kurusabe-i hoa-i ǃaroma ge mîmā. Satsa tari, ots Hoan xa ǀGapib ra ǁkhore-e ra mâǃoa? ǁŌhân Hâǃkhaib ǃnâ i ge ǀgui-i tsîna nēsits ga disikaidisi tamas ka io ǀoadisi kuriga ûi xawes tsîna ǁnās xa dî tide.
Eloxoresan di ûiǃgomsib
5 ǁOre-aon di ôan ge eloxoresa omdi ǃnân ge kaikaihe xui-ao a ui-uisa. 6 ǀUmin ge xūn hoanan ge nî ǂoaǃnâ tsî ǁîn di ôananôagub ge hâhâ ra ǃharaxūb ǃnâ nî ûi. 7 ǁGûn ga ǃKhūba ǃharaxū, on ge ǁîn ôana nî tao tsî ǁîn îna nî ǀhapimā.
8 Hoan xa ǀGapi Elob ge sadu hîa ǁîba ǃgôaǃgâ tamado nî ǁkhara, sadu hîa ǁîb di ǂhanuba ǁnâuǀnamsa ra ǂkhādo. 9 ǀGôana du ga ūhâ, on ge ǁîna tsūǃgân ǃnâ nî ǁō tsî du ge ǁîn ǁōb ǂama nî ǃoa. Sadu ǂûdu tsîn ge ǀnî dīsān hîa nî ǃgam duna nî dī. Tsî du ga ǁîna dī, on ge khoena kaise nî ǃgâiaǂgao. Sadu ga ǁōs khaoǃgân ge khoena ǁîn ra ǂâi ǁae-i hoa-e tsū xūna sadu xa nî ǃhoa. 10 ǃHūba xu ra hā xū-i hoa-i ge ǃhūba ǃoa nî oa. Ûitsaman a hîan ge ǀâxarehe, on ge eloxoresa khoena nî hîkākāhe.
11 Khoe-i ga ǁō, on ra ǃoa, xawen ge khoena ǂkhaba khoe-i di ǀons tsî ǂanǂansasib tsîna ǁî-i di ǁōb khaoǃgâ hoaragase nî ǀuru. 12 Sa ǂanǂansasib ge sa ǀkha ǁō tama hâ tsî hoaraga ǃhuniǀurib ǃhūbaib ǃnâ hâb xa gaxuse ra hâ. 13 ǃGâi ûib ge ǃnubu ǁaeb kōse ǀgui ra hâ, xawe ǃgâi ǂanǂansasib ge ǀamos kōse ra hâ.
ǃGâiǂūxasib di hōǃâs
14 Ti ôado, tita ra ǁgauǃnâ du khami dī, î ǂkhîb ǃnâ ûi. Gā-aisib hîa ûiǂuihe tamab ge sâusa ǁuib khami ī; hoakha ge harebeoǃnâ. 15 Gâ khoe-i hîa ǁî-i di gâsiba ǂhaisa kai tama i ge gā-ai khoe-i ǁî-i di gā-aisiba ǁî-i ǃaroma ǀgui ra ūhâ i ǃgâ-ai a ǃgâi.
16 ǁÎn xats nî taose ī tama xūǃnôan ge hâ, mâ khoe-i hoa-i, nēn a tare ǃkhaisa ǃkhō-am tama xawe. Ti ǀapemāsa ǁkhōǁkhōsase ū.
17 Nēn ge xūn ǁîn xats nî taona:
ǁGoe-ūgus ǁorebats ga dī, tsîn ga sa îna ǁnāsa ǂanǂuio.
ǂHumits ka tsî i ga ǂanǂansa khoe-e, ǂhumits go ǃkhaisa ǂanǂuio.
18 ǀGoraǃgâ-aob aiǃâts ga mâ, o dīts ge ǁoreb ǂama tao.
Gagasi ǀhaos aiǃâts ga mâ, o ǂkhabadīb xa tao.
ǂHaruguhoresan tamas ka io ǀhōsanats ga gāxaǃnâ, o tao.
19 ǀGūkhoen di xū-ets ga ǃnari, o tao.
Mîmāsats ga ǃûǂam, o tao,
ǃunikha ǀkhats ga ǂûtāb ai ǃgâbasen,
tsî xū-ets ga ǂganheo ǀgîxa,
20 tsî tawede-oa tamats ka i,
ǀai-aos ǁgats ga kō,
21 sa ǀgūkhoe-i di ǂgansats ga ǂhara,
khoe-ets ga amase a ǁî-i di-e ǀhana,
ǀnî khoeb taras ǁgats ga kō,
22 sa khobos ǀkhats ga ǀnûirogu,
sa ǀhōsanats ga ǃkhāǃkhā,
ǀgoraǃgâ rasets ga ǀkhaexūna mā,
23 ǂganǃgâsigats ga ǀhoeba.
Nēgu ge ǁaega taots nîse īga, on ge khoena nēs ǃaroma ǃgôasiba nî mā tsi.
© Khoekhoegowab Elobmîs © Bible Society in Namibia, 2020.
