Nineves di ǁnās
1 ǁNāǂamaob ge sas ǃoagu ra hā.
Sa ǁkhui-omma ǃûiǃgâ, daob âsa ǃkhē;
kamanab âsa ǃgae, î hoaragase ǀgaiǀgaisen.
2 ǃKhūb ge Jakob ǂkhaisiba ǁkhawa ra ǀasaǀasa; Israeli di ǂkhaisiba ǂguros ǁkhās khami, hîkākā-aon ge ǁîna hîkākā tsî ǁîn di draibehaide ǂkhôa xui-ao.
3 ǁÎb khākhoegu di ǁkhaukhōgu ge a ǀapa,
ǁîb di toroǃkhamaogu ge ǀapa saraga ana hâ.
ǁÎgu ǃkhammi ǃoa ra ǂhomisen tsēs ai
di ge ǁîn torokunide ǀaes khami ra ǂkhai,
ǁîgu ge ǁhâigôagu âga ra sabu.
4 Torokunidi ge ǃgangu ǃnâ ra ǃnarihe,
ǁîdi ge ǃās ǁaegub ǃnâ ra ǃnarimahe.
ǁÎdi ge ǃamǀaedi khami ra ǃnâ,
ǁîdi ge napagu khami ra ǂkhai.
5 ǁÎb ge ǂamkhoegu âba ra ǂgaiǀhao;
ǁîgu ge ǃkhoeǂnôa gu ra hîa ra ǁnā.
ǁÎgu ge ǃās di ǂnubiǂgoab ǃoa ra ǃnoe
tsî ǁkhau-ūdasa ǁnāpa ra mâi.
6 ǃĀgu di ǁkhaegu ge ra ǁkhowa-amhe,
gao-ommi ge ra ǃkhom.
7 Gao-aos ge ǃkhōsabese ra ūhe,
ǁîs ge ra ǂgaeǂguibēhe.
ǁÎs ǃgādi ge ǂnabun khami ǃgae
tsî ǃoab xa ra ǂnaunǁkhai.
8 ǁGam-i âs ra dâuǂoatoa ǀaus,
khamin ge Nineves khoena ra ǃkhoeǂoa.
“Mâ, mâ” tin ra ǃauǂgai,
xawe i ge khoe-i xare-e dabasen tama hâ.
9 ǀHaiǀuriba ǃnari.
ǃHuniǀuriba ǃnari.
ǃĀs ge toa ǁoa ǃkhūsib xa ǀoa hâ.
10 ǃĀs ge ǃnariǂuiǃnâhe, ǀkhaiǃnâ tsî a hîkākāsa.
ǁAnǂgāsaben âs ge ǂkhabuǂâi hâ,
ǁgoadi ge ra ǀkhū, ǃnāb ân ge ra tsû;
aidi hoadi ge ǀhai hâ.
11 Mâpas nēsi hâ xamn di hâǃkhaisa,
ǂkham xamn ge ǁîs ǃnâ gere ǂûmāhesa;
xamn ge ǁîs ǃnâ ǁîn ôan ǀkha gere hâsa,
xū-i xare-i xa ǃao tamase?
12 Xammi ge xamron âba ǂâu hâse gere ǀkhauǃāba
tsî xamdi âba amǀnēna ra ǃgamba.
ǁÎb ge hâǃkhaigu âba ǀkhauǃāb hâ ǁgan-i,
ǃgammi hâ xūn di-i ǀkha gere ǀoaǀoa.
13 “Mû, tita ge sas ǃoagu hâ” tib ge ǃKhūb Hoaǀgaixaba ra mî: “Tita ge sa torokunide nî khauǃkhū, gôab ge sa ǂkham xamga nî ǃgamtoa. Tita ge sas ge ǀhaoǀhao xūn hoana ǃhūbaiba xu nî ūbē; sa sîsabegu ge ǃaruǀî ǁnâuhe tide.”
© Khoekhoegowab Elobmîs © Bible Society in Namibia, 2020.
