1 Nē-i ge sîǂkhanis di ǁgoeǃgau-i, Jeremiab xa ge Jerusalems di Jodeǁîn ǃoa, Babiloniaǁî gao-aob xan nî ǃkhōsis ǃnâ ūhe tsî Babilons ǃoa ūǃgûhes aiǃâ ge sîhe-e. ǁÎ-i ge Elob ge Jeremiaba ǁînab nî māse mîmā haisi-amsa ǃkhōǂgā hâ.
Khoen ge gaxuse ǃkhōsis ǃnâ ge hâ
2 Elob ǃoagu du ge ǁore, amaga du ge Babilons gao-aob, Nebukadnesari xa ǃkhōsabese Babilons ǃoa nî ǃgû-ūhe. 3 Babilons ǃnâ du ge ǂgui kurina, hûǁî ôananôagub kōse ǁnāpa ǃkhōsis ǃnâ nî hâ. ǁNās khaoǃgâb ge Eloba Babilonsa xu ǂkhîb ǃnâ sadu ǁanǃkhaide ǃoa nî ǂgaeǂgui-oa du.
4 ǁNāpa Babilons ǃnâ du ge hain, ǀhaiǀurin tsî ǃhuniǀurin ǀkha kuruhe hâ elona nî mû. Nē elon ge khoen xa kuruhe hâ tsî ǃhōdi ân ai ra tanihe tsî ǁîn xa ra ǃaohe. 5 ǂAn, î du ǁnā Jodeǁî tamana tā ǁgaeǁgae, tamas ka iob nē elona du ūba hâ ǃaoba tā sado gaoǂam, ǂgui khoena du ga ǁîna tanima tsîn ra ǀgoreǀîse mû ǁaeb ai. 6 ǁNās ǃās ǃnâ sadu ǃnâ aitsama “ǃKhūtse, sats ǀguitsa da ge nî ǀgoreǀî” ti mî re. 7 Elob ǀhomǃgāb ge sadu ǀkha hâ tsî nî ǃûi du.
Huioǃnâsib ǁgôa-elon dib
8 ǁÎn di ǁgôa-elon ge ǀhaiǀurib tsî ǃhuniǀurib ǀkha ǃkhûǀkhāhe hâ, tsîn ge ǃnaokuru-aogu xan ǃgaoǂuibahe hâ namga ūhâ. Xawen ge ama elo tama tsî a ǃhoa ǁoa. 9 Khoen ge ǃhuniǀuri kronde kuru tsî ǁîn di ǁgôa-elona ra ǀgapa, anu-anusenxūna ǀnam ǀgôaden ga dība khami. 10 ǀNî ǁaeb ai gu ge pristerga ǀhaiǀurin tsî ǃhuniǀurin tsîna elona xu ǃnaribasen tsî ǁîgu di ǃgâiba ǃoa sîsenū 11 tsî ǀnîna ǁkhāti tempeli di ǀai-aode ra mā. Khoen ge nē elon hain, ǀhaiǀurin tsî ǃhuniǀurin ǀkha kuruhe hâna, khoe-i khami sarana ra ana. 12 ǁGôa-elon ga gao-aogu khami ǂhoaǀapa saraga ana xawes tsînan ge ǁî-aitsama ǀuriǀgūb tamas ka io koms ǃoagu a ǁkhaubasen ǁoa. 13 Tempeli di tsarab ga ǁîn di aidi ai ǁgoe, o i ge khoe-e ǁîna nî ǀomǁnâba. 14 ǀGoraǃgâ-aon khamin ǁîn di ǃomgu ǃnâ gaohaiga ra tani, xawen ge ǁîn ǃoagu ra tsūdī khoe-e ǁkharas di ǁkhāsi-i xare-e ūhâ tama hâ. 15 ǀNî ǃnādi ain ge ǃnubu hoaǀkhāǀāgôagu tsî ǃōdi tsîna amǀkhāb ǃomgu ǃnâ ra ūhâ, xawe torob ǃnân ga hîkākāhe tamas ka io ǃnari-aogu xa tanibēheo, ǁî-aitsama a ǁkhaubasen ǁoa. 16 Nēn hoan ge elo taman hâ ǃkhaisa ra ǁgauǂui, xuige tā ǁîna ǀgoreǀî.
17 ǁNā elon, ǁîn di tempelgu ǃnâ ǂnôan ge khôa hâ ǂgoasū-i khami, ǀgui xū-i tsîna harebe tama hâ. ǁÎn di mûdi ge tempelgu ǃnâ ra ǂgâ khoen ǂaidi di tsarab xa ǀoa hâ. 18 Pristergu ge ǃnari-aogu khôaǂgâ tidega, Tempelga dao-amdi, ǃnau-amdi tsî ǀuri ǃnâu-ūdagu tsîn ǀkha ra ǀgaiǀgai. ǁGôa-elon ge ǀgoraǃgâhe nîse ī ǃkhōsabe-i, gao-aob ǃoagu tsūdī hâ-i khami ra ǂganamǂgāhe. 19 Pristergu ge ǁîgu ǂhunugu ǂhâba hâs ǃgâ-ai ǃnāsa ǃamǀaede ra ǁîn di elona ǃamba, xawen ge ǁgôa-elona ǀguis xawes tsîna mû tama hâ. 20 ǁÎn ge tempeli di ǃnaogu ǁkhāgu khami koms xa ra haputoahe tsî ǁîn di sarana ra hîkākāhe, xawen ge ǀgui xū-i tsîna ǁnās xa a ǀū. 21 Aidi ân ge tempeli ǃnâ hâ ǀanni xa ǂnūǂnūhe hâ. 22 Surutsiǃgūbedi, swabelanin, ǀnî aniǃnôan tsî ǁkhāti ǀhôan tsîn ge ǁîn ai ra ǂnû. 23 Nēn hoan ge elo taman hâ ǃkhaisa ra ǁgauǂui, xuige tā ǁîga ǀgoreǀî.
24 Nē ǁgôa-elon ge îxasen nî mûsen ga ǃhuniǀurib ǀkha ra ǃkhûǀkhāhe, xawen ge khoe-i xan ga ǂkhaiǂkhaihe tama io napa tama hâ. Tsunitsunihe tsîn gere ǂnâhe, xawes tsînan ge ǁîna, xū-e ge hōǃâ tama hâ i. 25 Mâtikō ǂgui marinan ga khoena ǁîn ai māǂui, xawen ge nē elona a ǀomoǃnâ xū. 26 Kō mâtin xū tama ǃkhaisa! ǁÎn di ǂhunuma ǂaidi ǀkhan a ǃgû ǁoa, xui-aon ge khoen xa ra tanihe. 27 ǁNān ǁîna ra ǃkhōǂhomin ge nē elon di ǀgui-i ga ǃhūb ai ǁnā tsî khoen xa nî ūkhâihese ī, ǃkhais xa ra tao. ǁÎn di ǀgui-i ga ǃkhai-i ai mâihe, o i ge ǁnāpa xu ǃgû ǁoa tsî ǁarese i ga mâ, o i ge tātsē aitsama ǂgōse a mâ ǁoa. ǁÎna ǀkhaexūna mās ge ǁō hâ sorosa ǀkhaexūna mās ǀkha ǀgui. 28 Pristergu ge ǁîn di elon ra ǁguibahe xūna ǁamaxū tsî mari-e aitsama ra sîsenū. Tsî pristergu di taradi ge ǁguibahe ra xūna, huio tsî ǀgâsa khoen ǀkha ǀgoragus ǃās ǃnâ, ǃgoaxaǁaeb ǃnâ sîsenūs ǃaroma ǂōǂgā tsî ra sâu. 29 ǁKhāti di ge tarekhoedi, hîa ǁkhâǀaesenna ūhâdi tamas ka io ǀase ge ǁorade, ǁîn di ǁguibade tsâǀkhāsa a mā-amsa. Nēn hoan ge elo taman hâ ǃkhaisa ra ǁgauǂui, xuige tā ǁîna ǀgoreǀî.
30 Mâtin kha elon ti ǂgaihe ǁkhā, tarekhoedi ga nē xūn, hain, ǀhaiǀurib tsî ǃhuniǀurib ǀkha kuruhe hâna ǁguibade dībasa mā-amheo? 31 ǁKhāti gu ge pristerga doa hâ saran ǀkha tsî ǂkhomhe hâse tsî ǀōdanase, tempelgu ǃnâ ra ǂnû. 32 ǁÎgu ge ǃgari dommi ǀkha ǁkhōs ǃnâ ra ǁhao khami, ǁîgu di elon aiǃâ ra ā. 33 Tsî gu ge elona ǀnî sarana ǂgaeǂuiǀkhā tsî ǁîgu taradi tsî ǀgôan tsîna ra mā. 34 Nēsits ga nē elona hui tamas ka io ǂkhôa, xawen ge ǁîna a ǀkhaobasen ǁoa. ǁÎn ge khoe-e gao-aose mâi tamas ka io tronsa xu ūǁnâs 35 tsî khoe-e ǃkhū kai tamas ka io mari-e mās di ǁkhāsi-e ūhâ tama hâ. Khoe-i ga ǁîna xū-e nūba tsî xawe ǁnāsa dīǀoaǀoa tama i, os tsînan ge ǁgôa-elona tātsē mataresa ǂgaoǀkhā tide. 36 ǁÎn ge tātsēs tsîna khoe-e ǁōba xu huiǂui ǁoa tsî ǁkhāti ǀgaisa-i nî ǂkhabusa-e tsûtsû ǃkhaisa a ǁkhae ǁoa. 37 ǁÎn ge ǂgī khoe-e ǁkhawa a mû kai ǁoa tsî ǀhūsasib ǃnâ hâ-e a hui ǁoa. 38 ǁÎn ge khoe-i xare-e ǀkhom tamas ka io ǃoataradi tsî ǃoaǀgôana a hui ǁoa. 39 Nē xūn, hain ǀkha kuruhe tsî ǀhaiǀurib tsî ǃhuniǀurib ǀkha ǃkhûǀkhāhe hân ge ǃhomga xu ūhe hâ ǀui-i khami a ǀgaioǃnâ, tsîn ge ǁîna ra ǀgoreǀî khoena ge nî taotaohe. 40 Mâti i khoe-e elon ti ǁîna ǂâi ǁkhā, tamas ka io ǁîna elon ti ǂgai ǁkhā.
ǁGôa-elona ǀgoreǀîs di gâsib
Babiloniaǁîn ǂûn ge ǁîn di elona ǃgôasi-e ūhâba tama hâ. 41 Khoe-i ga ǃhoa ǁoa, on ge tempeli ǃoa nē khoe-e hā-ū tsî Beli, ǁîn di elob ǃoa ra ǀgore, îb ǁîba nē khoe-e ǃhoa ǁkhāsi kai, iseb Bela xū-e ra ǁnâuǃā xū-i khami. 42 Khoen ge ǁîn di elon a hui ǁoa ǃkhaisan ra mûǂan, xawes tsîna ǁnātikōse gâre tsî noxopa ǁîna ra ǀgoreǀî. 43 ǁNās ǀgui tamas, tarekhoedi tsîn ge aitsama ǀai-aose, tsurigu ǀkha ǃgaesen hâse tempeli ǃauga, daob amǃgâ ǂnû tsî ǁnāpa-u ra ǃkharu khoega ra nana. Khoeb ga ǀguis ǁîdi disa ǁgoe-ūgus ǃaroma ū tsîb ga tsurib âsa ǃgâu, os ge oahās rao, naus ǁîs xōǀkhā ǂnôas hîa îsa tamas hâ xui-ao go ǁhûihe tama hâ isa ra ǃhō. 44 Mâ xū-i hoa-i nē ǁgôa-elon xa hâ-i ge a harebeoǃnâ. Mâti i khoe-e elon ti ǁîna ǂâi ǁkhā tamas ka io ǁîna elon ti ǂgai ǁkhā.
45 Nē elon ge ǃnaokuru-aogu tsî ǃhuniǀuriǂnau-aogu xa ra kuruhe tsîn ge ǁîna kuru-aogu ǂhâba hâ khami ǀgui ra ī. 46 ǁÎn di kuru-aogu tsîn ge gaxuse ûi tama hâ, mâti gu ǁnâi elona nî kuru ǁkhā? 47 Nē khoegu ge ǀnî xū-e tama, xawe gāxaǃnâsib tsî ǂhumib tsîkha ǀguikha ǀumis ase ǃgoaxaǁaeb di suriba ra ǁnāxūba. 48 Torogu tsî tsūǀkhāgu ga hā, o gu ge pristerga mâpa gu nî ǁîgu di elon ǀkha gau ǃkhaisa ra ǀapeǀape. 49 Nē ǁgôa-elon ge torogu tsî tsūǀkhāgu di ǁaeb ǃnâ huioǃnâ. Tare-i ǃaroman khoena nē ǁgôa-elon, elo tama ǃkhaisa mûǂan tama hâ?
50 Nē ǁgôa-elon ge hain, hîa ǀhaiǀurib tsî ǃhuniǀurib ǀkha ǀgui ǃkhûǀkhāhe hâna. Amasen elo tama ǃkhais ge ǀguitsē nî ǃgāsa. 51 Hoa ǁaedi tsî gao-aogu ge ǁgôa-elon khoesi ǃomgu ǀkha ǀgui kuruhe hâ xū ǃkhaisa nî mûǂan. ǁÎn ge elo-i di ǁkhāsi-e ūhâ tama hâ, 52 tsî i ge mâ khoe-i hoa-e, ǁîn ama elo tama ǃkhaisa nî ǂan.
53 Nē elon ge gao-ao-e mâi ǁoa tsî ǁkhāti ǀapiba a hā-ū ǁoa. 54 ǁÎn ge ǁîgu di ǂhunuma dīxūn ai mîǁguiga ū tamas ka io tsūdīhe ge khoe-e a ǃhoaǃnoraǃnora ǁoa; ǁîn ǀgui xū-i tsîna a dī ǁoa. ǁÎn ge goran hîa ǀhommi tsî ǃhūbaib tsîkha ǁaegu ra ǁkhanaman ǁkhan khami, xū-e hareba tama hâ. 55 Tempeli ga ǂhubi, o gu ge pristerga, ǁîgu di ûiga gu nî sâu ga ra ǃkhoeni, xawe ǁgôa-elon hîa haina xu kuruhe tsî ǀhaiǀurib tsî ǃhuniǀurib ǀkha ǃkhûǀkhāhe hân ge ǁnāxūhe tsî ǃnaogu khami ra ǂhubiǂui. 56 ǁÎn ge gao-aogu ǃoagu ǃkham ǁoa tamas ka io khākhoen ǃoagu, torob ǃnâ ǃgûǂoa ǁoa. Mâti i kha khoe-e, elon a ǃkhaisa a ǂgom ǁkhā.
57 Nē elon, haina xu kuruhe tsî ǀhaiǀurib tsî ǃhuniǀurib ǀkha ǃkhûǀkhāhe hân ge ǃnari-aon tsî ǁgūǀhana-aon 58 hîa ǁîn di ǀhaiǀurib, ǃhuniǀurib tsî sarana ra ūn ǃoagu a ǁkhaubasen ǁoa. 59 Mâ xū-i hoa-i ge ǂhumi-elo-i ǃgâ-ai a ǃgâi, ǁkhoaǂgaoxa gao-aoba xu tsoatsoa tsî sîsenūhe ǁkhā sūs kōse. Oms di dao-ams tsîn ge ǁîs ra oms ǃnâ hâ xūna sâu xui-ao, ǂhumi elo-i ǃgâ-ai a ǃgâi. ǃNaoǂkhâǃnâb gao-ommi dib tsîn ge ǂhumi elo-i ǃgâ-ai a ǃgâi. 60 Elob ge sores, ǁkhâb tsî ǀgamirodi tsîna ǃnâban nî māse ge kuru tsîn ge ǁîna ǁîba ra ǁnâuǀnam. 61 ǁNās ǁkhās ge napab tsî ǂoab tsîn ǃaroma a ama. Napab ge napab ka, o ǃnūse a mûhe ǁkhā tsî ǂoab ge mâ ǃkhai-i hoa-i ai ra ǃgom. 62 Elob ga ǃâude hoaraga ǃhūbaib ai di nî khoraǂuisensa mîmā, o di ge ra ǁnâuǀnam. 63 Tsîb ga Eloba ǀaesa ǀhomma xu ǃhomgu tsî haiǀgomde nî ǂhubiǂuise sîǁnâ, os ge mîbahes go khami ra dī. ǁGôa-elon ge nē xūna a dī ǁoa. Sadu ge ǁgôa-elona nē hoaraga xūn di ǁkhāsigu ǀkha a ǀgopeǀnō ǁoa. 64 ǁNā-amaga i ge ǀgui khoe-i tsîna ǁgôa-elon a elo ǃkhaisa ǂgom tsî ǁîna elon ti ǂgai tide. ǁÎn ge khoe-e ǀgoraǃgâs tamas ka io ǁî-e ǃgâi-e dībasa a ǁoa. 65 Sadu ge ǁîn elo tama ǃkhaisa a ǂan, xuige tā ǁîna ǀgoreǀî.
66 Nē elon ge ǀgai-e gao-aogu ǂama ūhâ tama hâ. ǁÎn ge ǀâxareb tamas ka io ǀkhaeba gao-aogu ai gowaǂui ǁoa. 67 ǁÎn ge ǀhommi ai saode, ǁaede nî ǂgaeǂguise a mā ǁoa; ǁîn ge sores tamas ka io ǁkhâb khami a ǃnâ ǁoa. 68 ǀGurun tsî xamarin tsîn ge nē ǁgôa-elon ǃgâ-ai a ǃgâi, ǁîn ra ǁî-aitsaman nî ǁkhaubasenga ǃaorosasiga xu ǃkhoenibasen amaga. 69 Sadu ge ǁîn elo tama ǃkhaisa a ǂan, xuige tā ǁîna ǀgoreǀî.
70 Nē elon, hîa haina xu kuruhe tsî ǀhaiǀurib tsî ǃhuniǀurib ǀkha ǃkhûǀkhāhe hân ge ǀhomanina ǃhuriǃhuris ǃaroma tôaǃhanab ǃnâ mâihe ǃaoǃaoxūn ǁkhān khami i, ǁîn ge xū-e ǁkhauba tama hâ. 71 ǁÎn ge ǁkhūhais ǃhanab ǃnâ mâs xase ī. ǀHomanina ūbēs ǃās ǃnân ge ǁîna ǂnûǃkhaise ǁîna iba. Nē elon ge ǁō hâ soro-i hîa tsuxuba ra aoǂuihe-i khami a ui-uisa. 72 ǂHoaǀapa lapigu ǀkha kuruhe hâ saran ǁîn ana hân ge ra ǀoro, ǁnāpa xu da ge ǁîn elo tama ǃkhaisa a ǂan. ǀAms ai gu koms xa hapuhe tsî ǀgoreǀî-aona xū-i xare-e ǃaruǀî harebeba tide.
73 ǂHanu-ai khoen, ǁgôa-elona ūhâ taman ge naun xa ama-ai, ǁîn tātsē taotaohe tide amaga.
© Khoekhoegowab Elobmîs © Bible Society in Namibia, 2020.
