Ti Elotse, ti Elotse, tare-i ǃaromats kha go ǁnāxū te?
ǁNaeǃnans ǂgaeǂgui-aob ǃoa: ǁGoaǀapab ai ge xoahe ǁnaetsanas
Davidi Psalms
1 Ti Elotse, ti Elotse, tare-i ǃaromats kha go ǁnāxū te?
Tare-i ǃaromats nētikōse tita ǃnora kaisa xu a ǃnū?
2 Tsēa ta ge satsa ra ǂgaiǀî, ti Elotse
xawets ge ǃeream te tama hâ;
Hoaraga tsuxuba ta ra ǂgai
xawe ta ge sâ-e ūhâ tama.
3 Tsîts kom satsa ǃAnuts,
Israeli xa ra koahets ase ra ǃgapaǀîheo.
4 Sida aboxan ge satsa ge ǂgomǃgâ;
ǁîn ge satsa ge ǂgomǃgâ tsîts ge ǁîna ge huiǂui.
5 Satsa ǂgaiǀî tsîn ge ǃaorosasiga xu ge ûiǂoa;
satsa ǂgomǃgâ tsîn ge ǃan kaihe tama ge i.
6 Tita ge a ǂuni tsî ta khoe tama;
khoesib di ǃharaxū tsî ta khoen xa ra ǃharaxūhe.
7 Mû te ran hoan ge ra ǃhō te,
tsoranam tsî âiǂui te tsî ra ǃnabindana.
8 Tsîn ge “Sats kom ǃKhūb ai ra ǂgomaiǂnûio
tare-i ǃaromab sâu tsi tama hâ?
ǀNam tsib kao,
tare-i ǃaromab hui tsi tama hâ?” ti ra mî.
9 Sats kom ǃnaes ǃnâ-u ge ǃnorasase hā-ū tetsao,
tsîts kom ǂkhari ǀgôarota ase ǃnorasase ge sâu teo.
10 ǃNae ta ge tsēsa xu ta ge sats ai ǂgomaiǂnûi hâ
ti îs ǃnâ ta hâsa xuts ge a ti Elo.
11 Tā tita xu ǃnū re
ǂōǂōsib a ǀgū
tsî i hui nî khoe-e a ǀkhai xuige.
12 ǂGui khākhoen ge ǁgōgu khami xāǂgā te
tsî mâǂnami te hâ.
ǁAixa ǁgōgu, Basanni digu khamin ge xāǂgā te hâ.
13 Xamgu, tita nî ǀkhauǃā gu
khami gu ge amǃnâgu âga ge ǁkhowa-am.
14 Ti ǀgaib ge ǀkhai,
ǃhūb ai ǁhōxūhe hâ ǁgam-i khami ta ge ī;
hoaraga ǂkhōn âtan ge uniǁaede xu ǀgora hâ,
ǂgaob âtab ge tsunitsunihe hâ ǂnuruǁnui-i khami ī.
15 Ti dommi ge tsarab kōse a ǂnâsa
tsîb ge nammi âtaba ǂkharub ai ra ǂae.
ǁŌb di tsarab ǃnâts ge ra ǁnāxūǁgui te.
16 ǂKhaba khoen
ge arin khami tita xāǂgā hâ;
tsîn ge xam-i khami ti ǂaira tsî ǃomra tsîna ra ǀkhauǃā.
17 Hoaraga ǂkhōn tina ta ge a ǃgôa ǁkhā;
ti khākhoen ge ǁnās ǂama tita ra mû
ǁî ge ǃharaxūb ǀkha ra kō te.
18 Ti saranan ge ǁîn ǃnâ ge ǀgoragu
tsîn ge ti anaǂamsarab ǂama ǂnōgusa ra ao.
19 ǃKhūtse, tā tita xu ǃnū hâ re!
ǃHaese tita nî huise ǃnâǃkhoe te re!
20 Gôaba xu ti ûiba sâu re;
ti ûiba nē arina xu sâu re.
21 Xammi di amǃnâba xu
tsî ǃgarogoman di ǁnâga xu ore te re.
22 Tita ge sa ǀonsa ti ǃgâsana nî khoraǂuiba,
ǀhaohâb ǁaegu ta koatsana-e nî ǁnaeba tsi.
23 Koa bi re, sadu ǃKhūb di ǃgādo!
ǃGôa bi re, sadu Jakob di surido!
ǀGoreǀî bi re, sadu Israeli dido!
24 ǁÎb ge ǀgâsana ǃharaxū
tamas ka io ǁîn di tsâba mû tama i tama hâ.
Ais âbab ge gaugau tama hâ
huib ǃaromab ga ǂgai ǃnubai
tsî ra ǁnâu-am bi.
25 Satsa xus ge ti koas, kai ǀhaos ǃnâ hâsa ra hā
tsî ta ge tita ǁnān satsa ra ǃaoǃgân aiǃâ ti mîmâide nî dīǀoaǀoa.
26 ǃGamǃgamsensan ge ǂû tsî nî ǁâ;
ǁnān ǃKhūba ra ôan ge ǁîba nî koa,
a gu sadu ǂgaoga ǀamose ûi re.
27 Hoaraga ǀkhâuǀamdi ǃhūbaib didi
ge ǂâihō tsî ǃKhūb ǃoa nî dabasen.
Hoaraga ǃhaodi ge ǁîb aiǃâ ǃhon
tsî ǁîba nî ǀgoreǀî.
28 Gaosis ge a ǃKhūb di
tsîb ge ǁîba hoaraga ǁaedi ǂama ra gaosîsen.
29 Hoaraga ǃkhūǁîn ǃhūbaib din ge ǂû tsî ǁîba ra ǀgoreǀî,
hoan hîa tsarab ǃoa ra ǁgôan ge ǁîb aiǃâ nî ǃhon;
ǁnān hîa aitsama ûib ǃnâ ūhâsen ǁoana.
30 Hā nî surib ge ǁîba nî ǃoaba;
ǃgoaxaǁaeb di surib ge ǃKhūb xa nî ǁgambahe.
31 ǁÎb di ǂhanu-aisiban ge nî ǂhôa
ganupe ǃnae taman ǃoa,
ǁîb ǁnāsa dī hâ amaga.
© Khoekhoegowab Elobmîs © Bible Society in Namibia, 2020.
