1 ǂNomdomta xu:
ǃKhōǂuisa tarekhoes tsî ǁîs ôan hîa ta tita amab ǃnâ a ǀnamn tsî ǁkhāti tita ǀguita tama, xawe hoan hîa amaba a ǂann xa a ǀnamhena ǃoa. 2 Amab sida ǃnâ hâ tsî ǀamos kōse sida ǀkha nî hâhâ xui-ao.
3 Ab ǀkhommi, ǀkhomxasib tsî ǂkhîb hîa Elob ǁGûb tsî Jesub Xristub,* ǁîb Ôaba xu ǀnammi tsî amab ǃnâ hâba sada ǀkha hâ.
Amab tsî ǀnammi
4 Tita ge kaise ǃnāǂamsase ge ǃgâiaǂgao, ǀnî ǀgôan âsa ta ge amab daob ǃnân ra ǃgûse hō-o, ǁGûb xa da ge mîmāhe khami. 5 O ta ge ra ǂgan si, tarekhoese, ǀasa mîmā-e sasa ra xoabases ose, xawe ǁnās hîa da ge tsoatsoasa xu ūhâ is, sada nî ǀnamgu ǃkhais disa. 6 Tsî nēb ge a ǀnam, ǁîb mîmādi ǃoa da nî ûi ǃkhaisa. Nēs ge mîmās ǁîs ǃnâ du nî ǃgûsa, tsoatsoasa xu du ge ǁnâu khami.
7 ǂGui ǂgaeǂhapu-aon, Jesub Xristub ge khoeb ase hā ǃkhaisa ǁguiǁnâ taman ge ǃhūbaib ai hā xui-ao. ǁNāti ī-i ge ǂgaeǂhapu-ao tsî a Xristub di khākhoe. 8 ǂAnbasen, î du tā sada ge sîsenba-e ǂoaǃnâ, xawe du sadu di ǀoasa hōdawasa nî ǃkhōǃoasa.
9 Mâ-i hoa-i hîa ra ǃûǂam-i tsî Xristub di ǁkhāǁkhādi ǃnâ hâhâ tama-i ge Eloba ūhâ tama hâ. ǁNā-i hîa ǁkhāǁkhādi ǃnâ ra hâhâ-i ge ǁGûb tsî ǀGôab hâkha hoakha ūhâ. 10 Khoe-i ga sats tawa hā tsî nē ǁkhāǁkhāsa hā-ū tama io, ǁî-e tā sadu di omdi ǃnâ ǁkhoreǁhare tamas ka io tawede. 11 ǁNā-i hîa ǁî-e ra tawede-i ra ǁî-i di ǂkhaba sîsengu ǃnâ amǃnâxa xuige.
ǀUni mîdi
12 ǂGui xūn sado ta nî xoabana ta ge ūhâ. Tita ge nēsa ǂhape-i tsî ink-i ǀkha dī ǂgao tama hâ, xawe ta ge ra ǃâubasen, sī tsî ta aisa xu ais ǃoa sadu ǀkha ǀhao tsî nî ǃhoa ǃkhaisa, sada di ǃgâiaǂgaob nî ǀoase.
13 Sadu di ǃkhōǂuisa ǃgâsas di ôan ge ra tawede du.
© Khoekhoegowab Elobmîs © Bible Society in Namibia, 2020.
