Khobon di ǁgui-aidi
1 Khobo-i ge ǁî-i ǀhonkhoe-e kai ǃgôasib ǀkha nî ǃgapaǀî, î-i khoe-i xare-e tā Elob ǀons tsî ǁîb di ǁkhāǁkhāsa ǃkhāǃkhā. 2 Xawe ǁnān hîa ǂgomsabe ǀhonkhoena ūhân ge ǁîna khoeǃgâgun a ǃkhais ǃaroma ǀoro ǃgôasiba mā tide. ǁNās ǃās ǃnân ge ǁîna ǃnāsase nî ǃoaba, ǁnān hîa ǁîn ǃoabasa ra ǀaman a ǂgomsabe tsî kaise a ǀnamhe xui-ao. ǁÎna nē xūn xa ǁkhāǁkhā tsî ǁnama.
ǂHumi ǁkhāǁkhādi tsî ama ǃkhūsib
Mâ khoe-i hoa-e nē aman hoana ǁkhāǁkhā tsî ǀgaiǀgaiǃnâ, ǁîna ǁnâuǀnamsa. 3 Khoe-i ga hâ a amaba xu ǀkhara ǀgaub ai ǁkhāǁkhā tsî ǂuru ǁkhāǁkhās ǃKhūb Jesub Xristub* dis tsî ǁkhāǁkhās sada ǂgoms disa mâǃoa, 4 o-i ge ǁî-e ǂnīsasib xa khū hâ tsî xū-i xare-e a ǀū. ǁNāti ī khoe-i ge ǂâibasenoǃnâ ǂnoagu-ain ǀguina ra ǃaroma tsî ǃaruǀî harebeoǃnâ ǃhuigub, ǃkhams, mîǁgaiǁgaigub tsî ǂkhaba ǂâisā-aigub tsîna ra ǃaroma. 5 Nē khoeǃnôan ge ǂkhabasib ǀguiba ra ǃaroma. ǂGaogu ân ge a ǂhanuoǃnâ tsîn ge amaba ūhâ tama hâ. ǁÎn ge eloǃoabasa ǁî-aitsama ǃkhūǃkhūsens ǃaroma ra sîsenū.
6 Xawe ūts hâ xū-i ǀkhats ga ǂkhîǂâixa, os ge ama eloǃoabasa kai ǃgâiǃgâb ase nî ība tsi. 7 Hoan ǃgâ-ai da nî ǂans ge, xū-i xare-i ose da ge nē ǃhūbaib ai hā khami da ǁōtsēs ai xū-i ose nî ǁarusa. 8 ǁNā-amaga a da ǂkhîǂâixa, ǂûn tsî saran hîa da ūhân ǀkha. 9 Xawe ǃkhūsiba ra tura khoen ge ǂguiǃnâgu ǂgaeǂhapu-ain tsî gâre ǂkhôaǂkhôasa turagu xa ra ǃkhōhe, hîkākās kōse ǁîna ra sī-ūna. 10 Mariǃgunuxasib ge a ǂkhaban hoan di ǃnoma, xui-aon ge ǀnî khoen ǁnāti īna ǂgoms âna xu ǁnāǁgôa tsî kai tsûba ge ǃaromabasen.
ǂGoms ǃaroma hâ ǃgâi ǃkhams
11 Xawe Timoteu, Elob khoetse, nē ǂkhaba xūn hoana ǂhāxū, îts ǂhanu tsî ǃgâin ǀguina dī. Eloǃaoǃgâxa ǀgaub ai ǂgoms, ǀnammi, mâǀgais tsî ǃnomsasib tsîn ǃnâ ûisa ǁgūba. 12 ǃGâi ǃkhams ǂgoms disa ǃkham, î ǀgaisase Elob ra mā ǀamo ûib ai ǃkhōbasen. Nē ǀamo ûib ǃaroma ge is ge ǂgui ǀhûǀguitimî-aon aiǃâts ge ǁguiǁnâsa. 13 Mîmā tsi ta ra, Elob hîa hoana ûiba ra māb tsî Xristub Jesub, ǃgâi ǁguiǁnâsa ge Pontiub Pilatub aiǃâ a dīb tsîn aiǃâ, 14 ǁîb di mîmāde ǂnao-o tsî ūose ǃKhūb Jesub Xristub di ǁkhawa hās di tsēs kōse ǃkhōǀgarasa. 15 ǂHanu ǁaeb aib ge Xristuba nî ǂhaiǂhaihe, ǁîb ǀguib a hoaǀgaixa tsî ǀkhaehesa Elob, gao-aogu di Gao-aob tsî ǃkhūgu di ǃKhūb xa. 16 ǁÎb ǀguib ge a ǁō ǁoa, khoe-i xare-i a sīǃnâ ǁoa ǃnâb ǃnâb ge ûi hâ. Tātsēs tsîna khoe-i xa mûhe tamab tsî mûhe tideba. ǁÎb ra hoa ǃgôasib tsî ǀgaib tsîna ǀamosib kōse māhe xui-ao! Amen.*
17 Nē ǃhūbaib di ǃkhū hâna mîmā re, în tā ǂnīsa tsî ǁîn di ǃâubasensa ǃhaese ra ǃgû-ī xū-i mari-i ai ūhâ. Xawe an ǁîn di ǂgomǃgâba ûitsama Elob ǃnâ ūhâ, ǃkhū hâse sada hoaraga ǂhâgu ǃnâ ǃgâiǃgâisens ǃoa ra mā dab ai. 18 ǁÎna mîmā, în ǃgâina dī, ǃgâi sîsengu ǃnâ ǃkhū tsî ǃgâiǂgaoxase ǂhâsib ǃnâ hân ǀkha ǀgoragu. 19 Nē ǀgaus ain ge ǃgoaxaǁaeb ǃaroma ǁaposa ǃkhūsiba ǃgâi ǃgaoǃgaob ase nî ǁguiribasen, în ama ûib nî ī ǀgausa hōǃâ ǁkhā.
20 Timoteutse, ǃkhōǀgara ǂgomǃgâhets gen hoana. ǂGōxū ǁau tsî gâre ǃhoa-ain sa mâǃoa-aon ǂhanu tamase “ǂans” ti ra ǂgaina. 21 ǀNîn ge ǁnā ǀgaub ai gā-aidīsen tsî ǂgomsa xu ge kāǁō.
Ab Elob di ǀkhomma sadu hoadu ǀkha hâ.
© Khoekhoegowab Elobmîs © Bible Society in Namibia, 2020.
