ǃKhūb ge Jerusalemsa ra ǁkhara
1 Mâtib ǃKhūba ǁîb di ǁaixasib ǃnâ Sions ôasa ǃâudi ǀkha ge gabuǂgā!
ǁÎb ge ǀhomma xu ǃhūbaib kōse Israeli ǂkhaisiba ge aoǁnâ.
ǁAixasib âb di tsēs aib ge ǂaiǃnaos âb tsîna ǂâihō tama ge i.
2 ǃKhūb ge ǀkhomoǃnâse hoaraga ǁanǃkhaidi Jakob dide ge hîkākā.
ǁÎb ge ǁaixasib âb ǃnâ omǂnamisa ǃādi Judab ôas dide ge khôaǁnâ.
Gaosib tsî gaosagab ge ge taotao.
3 ǁÎb ǁaixasib di ǀgammi ǃnâb ge ǁîba mâ ǁnâb Israeli dib hoaba ge ǁhāǁnâ;
Khākhoeb ge hā ob ge ǃKhūba amǀkhāb ǃommi âba ge ū-oa.
Tsîb ge Jakob ǃnâ ǁhabu ra ǀaes, ǂnamipe hân ǂhubiǂuis khami ge khau.
4 Khākhoe-i khamib ge khās âba ge ǂgaeǃnâ tsî amǀkhāb ǃommi âb ǀkha ge mâ i, mâǃoasabeb xase;
Tsîb ge sada mûǁae ge îsa ina ge ǃgam.
Sions ôasa xub ge ǁaixasib âba ǀaes khami ge ǂnâǂui.
5 ǃKhūb ge khākhoe-i ase ī tsî Israela ge haraǂgā
ǁÎb ge gao-omgu Israeli diga ge haraǂgā tsî ǁkhui-omga ge hîkākā.
ǁÎb ge Judab ǂama ǃoab tsî ǃgaeb tsîkha ge ǂguiǂgui.
6 ǁÎb ge ǁhaos âba ǃhanab khami ge khôaǁnâ, tabernakeli âbab ge ge hîkākā;
ǃKhūb ge Sions ǃnâb nî mîǁguisa ǁâudīgu tsî Sabbattsēsa ǀuruhe ǃkhaisa ge ǃaroma.
Tsîb ge ǀaexasib ǁîb ǁaixasib diba pristeri tsî gao-aob tsîga ge ǂhara.
7 ǃKhūb ge altars âba ǂhara tsî ǃanu Tempeli âba ǁnāxū.
ǁÎb gao-omgu di ǂnubiǂgoagab ge khākhoen ǃomǁae ge māǁnâ.
ǁÎn ge mîmāsa ǁâudītsē-i ǃnâs khami ǃKhūb ommi ǃnâ gere ǂkhupi.
8 ǃKhūb ge Sions ôas di ǂnubiǂgoaba hîkākāsa ge ǂâibasen hâ i.
ǁÎb ge ǀnō-ūtsuriba ge ǁguiǂui tsîb ge ǃommi âba hîkākāsa xu ǂgaedawa tama ge i.
ǁÎb ge ǂgō-omgu tsî ǂnubiǂgoaga ra ǃoa kai; ǀguipa gu ge ra ǁkhobo kai.
9 Dao-amdi âs ge ǃhūb ǃnâ ǁgoe, ǃnau-amǀurigu ge ǃâdi ǃnâ ǁgoe.
Gao-aob tsî gaoǀgôan âs ge ǃhao ǃhūgu ǃnâ a ǃkhōsabe.
Pristergu âs ge ǁkhāǁkhā tama hâ tsî kēbo-aogu on ge ǃaruǀî ǂhaiǂhaide ǃKhūba xu hō tama hâ.
10 Sions ôas di kaigu ge ǃnōsase ǃhūb ai ǂnôa
tsarab ǀkha tsorosen tsî gu ge ǃoab sarana ǂgaeǂgā hâ
ǂKhamkhoedi danadi ge ǃhūb kōse ǃgamǃgâ hâ.
11 Mûra âtara ge ǁgamrogu xa ǂkhabu hâ; ǃnākhoesib âtab ge ra ǃkhurisen.
Ti ǃnāxūn ge ǃhūb ai ra ǂnâǂuihe, ti khoen di hîkākās ǃaroma.
ǀGôaron tsî dai ran ge ǃās di ǃgangu ǃnâ ra ǂkhabu.
12 ǁÎn ge ǁgûde “Mâpab ǃhorob tsî ǂauxûiba hâ?” ti ra dî
ǃās ǃgangu ǃnân tsuihe hâ khami ra ǂkhabuo,
ûigu ân ǁgûdi tîǂam ra ǁhōǂuiseno.
13 Mâ ǃkhō-amsa ta mā ǁkhā? Tare-i ǀkha ta kha sasa ǀgopeǀnō ǁkhā Jerusalems ôase?
Tare-i ǀkha ta kha sasa nî ǂkhō, ǁî-i ǀkha ta nî ǁkhaeǂgao si-e, Sions ôas oaxaese?
Hurib khamib ge sa ǂkhôaba ī, tari-e ǂuruǂuru si ǁkhā?
14 Sa kēbo-aogu ge ǂkhaba tsî ǀhôagao xūn ǀguina ge mûba si
tsî gu ge sa ǂhanuoǃnâsigu ai ǂhaiǂhaiǃgâ si tama ge i, sa ǃkhōsisa nî ǁkhaedabase.
ǁÎgu ge ǂhumi tsî ǂgaeǂhapu ra xūna gere mûba si.
15 ǁNāpa-u gere ǃkharun ge ra ǁapunǃom, sas ai ra kōǁnâse.
ǁÎn ge ǀhubi tsî ra ǃnabindana, Jerusalems ôas ai.
“Nēsa kha ǁnā ǃās ‘Îsasib di dīǀoasasib, ǃhūbaib hoaragab di ǃgâiaǂgaos’ ti gere ǂgaihesa?”
16 Hoaraga khākhoen san ge amǃnâdi âna
sa ǃoagu ra ǁkhowa-am.
ǁÎn ge ǀhubi tsî ra ǁaninǁgû
tsîn ge ra mî: “Sida ge ǁîsa go hîkākā.
Nēs ge ǁîsa da ge ǃâu hâ i tsēsa,
ǁîsa nî mûse da ge ûi hâ isa.”
17 ǃKhūb ge ǁîb ge ǂâibasen hâ i xū-e ge dī; ǁîb ge mîs âb hîa hugasa xu hâsa ge dīǀoaǀoa.
ǁÎb ge ǀkhomoǃnâse ge hîkākā.
Khākhoebab ge sa ǂama ge dâ kai tsîb ge sa mâǃoasaben di ǁnâba ge ūkhâi.
18 ǂGaob ân ge ǃKhūb ǃoa ra ǂgai, Sions ôas ǂnubiǂgoatse!
Agu ǁgamroga ǃāgu khami tsēa tsî tsuxuba dâuǁgôaxa.
Tā sâ kaisen, mûra âtsa a ra tā ǃnō.
19 Tsuxuba khâi î ǃau, tsuxuǃûidi tsoatsoas ǃnâ!
Sa ǂgaoba ǃKhūb ais aiǃâ ǁhōǂui.
Sa ôan, mâ ǃganni hoab di ǁhôas ai ra ǃâs xa ǁōn di ûigu ǃaroma ǃomgu âtsa ǁîbǀî ǀhōǂui.
20 Kō re ǃKhūtse, î mû tari-i ǀkhats ge ǁnāti ǁkhōse dīsa.
Tarade kha ǁîdi surib, ǁhās âdi di ǂûtaniba nî ǂû?
Pristergu tsî kēbo-aoga ǃKhūb Tempeli ǃnâ nî ǃgamhe?
21 ǂKhamn tsî kain ge ǃhūb ai ǃgangu ǃnâ ǁgoe,
ti ǂkham khoedi tsî ǂkham khoegu ge gôaba xu ge ǁnā.
Sats ge ǁaixasib âts di tsēs ai ǁîna ge ǃgam, ǁîna ge ǂā ǀkhomoǃnâse.
22 ǁÂudīb tsēs, ǂnûiǂuihe hâs ais khamits ge ti mâ ǀkhāb hoaba xu tita ǃoagu ǃhuriǃhuridi, ǃaoba ge mîmā;
ǃKhūb ǁaixasib di tsēs ai i ge khoe-i xare-e ǁhaiǃnora tamas ka io ûiǂoa tama ge i;
ǁNān tita ge ǁora tsî kaikainab ge ti khākhoeba ge ǃgam.
© Khoekhoegowab Elobmîs © Bible Society in Namibia, 2020.
