Aguri di mîdi
1 Nēdi ge Jakeb ôab Aguri di mîde:
“Ti Elotse, tsau ta hâ, tani ǁoa ta a;
ti Elotse, tsau ta hâ, ǃaruǀî ta a tani ǁoa.
2 Amase, tita ge nau khoen hoan xa a gâre
tsî khoesi ǁnâuǃāba ūhâ tama hâ.
3 Gā-aisib xa ta ǁkhāǁkhāsen tama,
tamas ka io ta ǃAnu Elob xa ǂan-e ūhâ tama.
4 Tari-e ǀhommi ǃoa ǃapa tsî ge ǁnāpa xu ǁgôaxa-e?
Tari-e ǂoaba ge ǃoms â-i ǀkha ǃkhōtsâ-e?
Tari-e ǁgam-e ge saraǃâ-i ǃnâ tanitsâ-e?
Tari-e ǃhūbaib di ǀamdi hoade ge ǃgaoǃgao-e?
ǁÎ-e mâti ǀon hâ tsî ǁî-i ôaba mâti ǀon hâ?
5 “Mâ mîs Elob dis hoas ge a ǃanu; ǁîb ge ǁîb ǃoa ra ǁhaiǁhâ-i hoa-e ǁkhaukhōse ība. 6 Tā ǁîb ge mî xūn ai xū-e ǀaro, tamas ka iob ge ǁîba nî ǂgōǀau tsi tsîts ge ǂhumi-aose nî hōhe.”
ǃAruǀî hâ ǂkhoamîdi
7 ǀGam xūna ta ge ge ǂgan tsi; tā ǁîna ǁō ta nîs aiǃâ ǂkhā te: 8 ǂHumib tsî ǂhumiǃhoab tsîkha tita xu ūbē; tā ta ǀgâsa tamas ka io ǃkhū. Xawe tita ǂâu hâ ǂû-i ǀgui-e mā te. 9 ǃNāsase ta ga ūhâ o ta ge ǃharaxū tsi tsî nî mî: “Tariba ǃKhūba?” Tamas ka io ta ga ǀgâsa, o ta ge nî ǃnari tsî Elob ǀonsa nî ǀuriǀuri.
10 Tā ǃgā-e ǁî-i ǀhonkhoe-i ai mîǁgaiǁgai, ǁnā tamas ka io i ge ǃgā-e nî ǀâxare tsi, tsîts ge ǀhapixase nî ūhâhe.
11 Khoen ge hâ ǁîn îga ǀâxare tsî ǁîn îde ǀkhae tamana.
12 Khoen ge hâ ǁîn mûǁae a ǃanuna, xawen ǁoreb xa ǂae-aihe hâ hîa.
13 Khoen ge hâ ǁîn ǂûn xa ǀgapise ra ǂâi tsî ǁî-aitsama ra ǀgapiǃgôasenna.
14 Khoen ge hâ ǁgûgu ân gôagu khami ǀāna, ǀgâsa khoen tsî ǂhâsib ǃnâ hânan ǃhūbaiba xu nî ōtoase.
15 ǀAoǀgomao-i ge ǀgam ǀgôara ūhâ: “Mā! Mā!” ti ra ǂgaiǂuira.
ǃNona xūn, ā hakan ge hâ tātsē ǁâ taman “ǂÂu go,” ti mî tamana:
16 ǁŌhân Hâǃkhaib,
ǀgôao ǁhās,
ǂnâsa ǃhūǃâs
tsî ǀariheǁoasase ra ǂhubi ǀaeb tsîna.
17 ǁNā mûs ǁîs îba ra ǃhōs tsî ǁîs îsa ǁnâuǀnamsa ga ǃharaxūs ge goragu xa ǁhopeǂuihe tsî ǂkham kai-anidi xa nî hapuhe.
18 ǃNona xūn ge hâ buruxaba tena; hakan ǁnâuǃā tama ta hâna:
19 ǃAriǃkhās ra ǀgapise ǀhomaib ai ǁkhana ǀgaus,
ǀaob ra ǃgareǀuib ai ǂhana ǀgaus,
doe-oms ra hurib ai ǃnari ǀgaus
tsî aorekhoeb tsî ǂkham khoes tsîra di ǀnamgub tsîna.
20 ǃGamekhôaxa taras ge nēti ra dī: ǁÎs ge ǂû tsî ǀomanam tsî “Tsū xū-e ta dī tama” ti ra mî.
21 ǃNona xūn ge hâ ǃhūbaiba ra ǂgubi kaina; hakan hîab a tani ǁoana:
22 ǃGā-i gao-ao kai ra-i,
gâre khoe-i kaise ǂûǁâ hâ-i,
23 ǀnamhe tama ǃgametaras,
tsî ǃgās hîa ge ǁîs ǀhonkhoes soasa ra ūǃkhunis tsîna.
24 Haka xūn kaise a ǂkhariron ge ǃhūbaib ai hâ, xawe kaise a gā-aina:
25 ǂGoberun ge ǀgaio, xawen ge ǁîna soreb ǃnâ ǂûna ra ǀhaoǀhaobasen;
26 ǃâun ge ǂkhabusa, xawe ǁîn omde ǃgareǀuigu ǃnâ ra kuru;
27 ǂhomn ge gao-ao-e ūhâ tama, xawen ge ǁîna ǃamkuse ra saogu;
28 ǂnobos ge ǃoms ǀkha ǃkhōhe ǁkhā, xawe gao-aogu gao-omgu ǃnâs tsîna ra hōhe.
29 ǃNona xūn ge hâ ǀō-aisa ǀgaub ai ra ǃgûna; hakan ge anuse ra dāna:
30 Xammi, hoa ǀgurun xa a ǀgaisab, tātsē xū-e mâ-oaba tamab;
31 ǂnīsa anib,
pirib
tsî gao-aob ǁîb toroǂnubis xa hâǂnamihe hâb tsîna.
32 Aitsama ǀgapiǀgapisens ǀkhats ga gâre, tamas ka io ǂkhababa ǀape, o sa ǃomma sa ams ai ǁgui! 33 Dai-e ǁnubus ra gomasam-e kuru tsî ǂguis ai ǂnauhes ra dora kais ǁkhās khamis ge khoe-e ǁaiǁaisa ǃkhamsa ra ǃaroma.
© Khoekhoegowab Elobmîs © Bible Society in Namibia, 2020.
