1 ǂGui khoen ge hōǂgāsa ôabasens ǃnâ ge ǁore. ǃKhū ǂgaots kao, ots ge mûde ra ǁkhae xūde sa mûra ai nî ǂnûi. 2 ǁAmas tsî ǁamaxūs tsîra xu gāxaǃnâsiba ǀgoratsâs ge ǀgam ǀgaisa ǀuira ǁaegu ǃgâumâisa ǀuriba ǂgaeǂuitsâs khami ī. 3 Sa ǃkhūsibats ga ǃKhūbats ǃaoǃgâ tama ǀgaub ǃnâ hō, ots ge ǃhaese ūts hân hoana nî ǂoaǃnâ.
Khoe-i mîdi ge tari-i a ǃkhaisa ra ǁgau
4 Sībs ga ǃnobohe, ob ǀapoba ra ǃgau khami gu ge khoe-i di tsūdīga, ǃhoa-i ka, o ra ǂkherexa. 5 Sa ǃhoaǀgaub ge sa ǂūba, ǂapagu ra ǂgoasūs ga ǁganoms ǃnâ ǂhubiheo ǂkherexa khami ra ǁgau. 6 Hais di ǂûn ge mâtikōseb ge ǀhōnkhoeba nē haisa ǃkhōǂhomi ǃkhaisa ra ǁgau, ǁnātits ge khoe-i di hōǃâde ǁî-i ra ǁgâiǂuisen ǀgaub ai mû ǁkhā. 7 ǁNāb a khoen ra ǃâitsâhe ǀgau, xuige tā khoe-e ǃhoa-i nîs aiǃâ koa.
ǂHauǃnâsib
8 ǂHauǃnâ ǂgaots ka, ots ge nî hō bi tsîts ge ǁîba îsa anaǂamsarab khami nî ana. 9 ǀHomanin ǀgui ǀûb din ge ra ǀhao. ǁNāti i ge ī, sats ga khoen ǃoagu ǂhanu-ai, on ge ǁîna sats ǃoagu nî ǂhanu-ai. 10 Xammi hîa ǃkhōb nî xū-e ǃâuǁgoeb khamib ge ǁoreba, ǁnān hîa ǁoreban nî dī ǃkhais di ǃēsa ra ôana ra ǃâu.
Gâse ra ǃhoa khoena xu ūbēsen
11 Eloǃaoǃgâxa khoen ge hoaǁae ǁnâuǃāxase ra ǃhoa, xawe gâ khoen di ǃhoaxūn ge ǁkhâb khami ra ǀkharaǀkharasen. 12 Gâ khoen di ǀhaos ǃnâts ga hâ, o ī ǁkhā i as kōse ǁnāpa xu ǃhaese ūbēsen, xawe ǃgâi ǂâiǀgauba ūhâ khoen ǁaeguts ga hâ, o ī ǁkhā i as kōse ǁnāpa hâ. 13 Gâ khoen di ǃhoaxūn ge a ui-uisa, tsîn ge ǁîn di ǁgauoǃnâ ǁoren ǂama ra âi. 14 ǁNāti ī khoen ga ǃkhāǃkhā tsî mîǁgaiǁgai, on ge sa ǀûna ra khâi tsî ǁîǃnāben ga ǂnoagutsoatsoa, ots ge sa ǂgaera nî ǃkhōǂgan. 15 ǁÎǃnāben ǀgapiǂâixa khoena ra mîǁgaiǁgaigu ǀgauba ǁnâus ge tsûtsûsa, ǁîn di ǂnoagu-aidi ge ǀaoǂnâxūs kōse sī ǁkhā.
ǂGanǃgâsiga ǂhaiǂhais
16 ǂGanǃgâsigu sats ǃhoabahe hâgats ga ǀnî-e ǀhoeba, ots ge nau khoe-i sats ǃnâ ūhâ ǂgomǃgâsa ra hîkākā tsîts ge tātsē ǂgomǂgomsa ǀhōsa-e ūhâ tide. 17 Sa ǀhōsan sats ǃnâ ūhâ ǂgomǃgâsa ǃgôaǃgâ, î îǂhôase ǁîn ǃoagu tanisen. ǁÎ-i di ǂgomǃgâsats ga khôa, os ge ǁî-i di ǂgomǃgâsa ǁkhawa hō-oasa dītsâs tsîna xū-i xare-e hui tide. 18 Sats ge ǁnā ǀhōsagusisa, khoe-e ǁî-i di khākhoe-e ǃgams ǁkhās khami ge hîkākā. 19 Sa ǃommi ǃnâts ūhâ ǀhomaniro-ets ga sa ǃomma xu ǁnāxū, o i ge nî ǁkhanabē tsî ǁkhawa tātsē oahā tide. ǁNās ǁkhās khamits ge sa ǀhōsa-e nî ǂoaǃnâ tsî ǁî-e ǁkhawa hō-oa tide. 20 Kaisets go ǃonkhao xuige tā saoǃgon ǂgao. ǁÎ-i ge ǃnuisa xu ge ǃnora ǁgû-i khami go bē. 21 Khoe-ets ga tsui, o i ge ǀhapisa nî ǃgae-ai tsîs ge nî ǂuru tsî khoe-ets ga mîǁgaiǁgai, o kho ge ǀûbagu ǁkhā. Xawe sa ǀhōsa-i go mîba tsi ǂganǃgâsibats ga ǀnî khoena ǃhoaba, o i ge ǁkhawa ǂgomǃgâ tsi tide.
ǀHōsana ra ǀapexū khoen
22 Khoe-i ga mûǂgams ǀkha napetsoatsoa, o i ge ǂkhaba ǂâisa ūhâ, tsî i ge ǁî-e ga ǂan khoe-i hoa-e ǁî-e xu ǃnūse nî hâ. 23 Sats ǀkha i ga hâ, o i ge ǃgâise ra ǃhoa tsî mâ mîs sats ra mîs hoasa ra ǃkhō-am. Xawe i ge ega, sa ǁâb ai tsū xūn ǀguina sats xa nî ǃhoa tsî sa mîde sats ǃoagu nî sîsenū. 24 Tita ge ǁnāti ī khoena, xūn hoan ǃgâ-ai a ǃhuisa tsîn ge ǃKhūb xas tsîna ǁkhāti ǁkhanhe hâ.
25 ǀUi-ets ga ǂhanuse ǀgapigab ǁga aokhâi, o i ge sa danas ai nî ǁnā. ǃÛisen tamab ka io, ob ge toroǃkhamaoba ǁîb di hoaǀkhāǀāgôab ǂûb ǀkha a tsûtsûsen ǁkhā. 26 Khoen ge ǁîn ra khao āgu ǃnâ ra ǁnā tsî ǁîn ra ǁgui ǃnuidi ǃnâ ra ǃkhōhe. 27 Khoen ge naunan ga tsûtsû, on ǁî-aitsama ra tsûtsûsen ǃkhaisa hōǃâ tama hâ.
28 ǀGapiǂâixa khoen ge nauna ǃkhāǃkhā tsî ǁîn ǀkha ra ǃhōǃhōsen, xawe ǀnî ǃnādeb ge ǀkhaoba, ǁîna xam-i, gaugausen-i hâ ǃkhaiba xu ǃnapetamase ra uriǂoaxa-i khami ra ǃâu. 29 ǁNān hîa eloǃaoǃgâxa khoen ra ǃgomma tsâ, o ra ǃgâiaǂgaon ge ǃnuis ǃnâ ǃkhōhe hâ ǀguru-i khami tsûba ra tsâse nî ǁō.
ǁAib, ǀkhaob tsî ǀûbas
30 ǁAib tsî ǁaixasib tsîkha ge ui-uisa xūkha, xawen ge ǁore-aona hoakha ra ǃkhōǀgara.
© Khoekhoegowab Elobmîs © Bible Society in Namibia, 2020.
