Gaoǀgôab tsî ǁâudīgu
1 Nētib ge ǃKhūb Eloba ra mî: “Ai-ommi di dao-ams, aiǂoasǀî ǃoa hâs ge ǃnani sîsentsēde ǂganamsase nî hâ, xawe sâtsēs ais ge nî ǁkhowa-amhe; ǁkhātis ge ǂkham ǁkhâb di tsēs ai nî ǁkhowa-amhe hâ. 2 Ob ge gaoǀgôaba ǁnā dao-ams ai-ommi di daoba-u nî ǂgâ ǃaugaba xu, tsîb ge ǂkhâǃnâhaib dao-ams dib tawa sī nî mâ, tsî pristergu ge ǁîb di khauǁguibas tsî ǁîb di ganganǁguibadi tsîde nî ǁāǁā, tsî ǁîb ge nî ǀgoreǀî dā-aihaib dao-ams dib tawa tsî ǁnās khaoǃgâ nî ǂoa, xawe dao-ams ge ǃuis kōse ǂganamhe tide. 3 ǁKhātis ge ǁaes ǃhūb disa dao-ams ǁnā dao-ams dis aiǃâ nî ǀgoreǀî sâtsēdi ai tsî ǂkham ǁkhâgu ai ǃKhūb di ais aiǃâ.
4 “Tsî khauǁguibas, gaoǀgôab ǃKhūba nî ǁguibas ge sâtsēs ai nî ī; ǃnani ūo ǁkhaogu tsî ǀgui ūo baib tsîga. 5 Tsî ǂûǁguibas ǀgui efaba baib tawa, tsî ǁkhaogu tawas ge ǂûǁguibasa ǁîb ǃommi di hōse nî ī, tsî olib xa ǀgui hinni kōse ǀgui efab tawa. 6 Tsî ǂkham ǁkhâb di tsēs ai ǀgui ǁgōb, ǂkham gomab, ūogu dib tsî ǃnani ǁkhaogu tsî ǀgui bairab tsîga, ǁîgu ge ūose nî ī. 7 Tsî ǂûǁguibaseb ge ǁîba nî ǁāǁā ǀgui efaba ǁgōb tawa tsî ǀgui efaba bairab tawa, tsî ǁkhaogu tawa ǃommi âb ga hō khami; tsî ǀgui hinni olib xa ǀgui efab tawa. 8 Tsî gaosab ga ǂûo, ob ge ai-ommi di dao-ams daoba-u nî ǂgâ tsî ǁnā daob ǁkhāba-u ǁkhawa nî ǂoa.
9 “Tsî ǁaes ǃhūb dis ga ǃKhūb di ais aiǃâ hāo ǂnûihe hâ ǀgapi ǁaegu ai, o i ge ǀapas di daoba-u ga ǀgoreǀî nîse ǂgâ-e ǃkhawagas dao-ams di daoba-u ǁkhawa nî ǂoa, tsî ǃkhawagas dao-ams di daoba-u ga ǂgâ-e ǀapas dao-ams di daoba-u ǁkhawa nî ǂoa, ǁî-i ge ǁnā daob dao-ams dib ǁîba ūb ge ǂgâba ū ǁkhawa oa tide, tsî i ge ǂhanuse nî ǂoa. 10 Tsî gaoǀgôab ga ǁîn ǁaegu ǂgâo, ǁîn ga ǂgâ ǃnubai tsî ǂoan kao, on ge ǀhûpe nî ǂoa. 11 ǃAruǀî kaitsēdi ai tsî ǂnûihe hâ ǀgapi ǁaegu ais ge ǂûǁguibasa ǀgui efaba ǁgōb tawa nî ī tsî ǀgui efaba baib tawa, tsî ǁkhaogu ge ǁîb ǃommi di hōse nî ī, tsî olib xa ǀgui hinni efab tawa.
12 “Tsî gaoǀgôab ga māsenxa ǁguiba-e ǃKhūba ǁguibao, khauǁguibas kas, ganganǁguibadi kas hoasa, on ge dao-amsa ǁîba nî ǁkhowa-amba aiǂoasǀî ǃoa hâsa, ob ge ǁîba khauǁguibas âb tsî ganganǁguibadi âba sâtsēs aib nî dī hâ is ǁkhās xase nî dī; tsî ǁkhawab ga ǂoao, on ge dao-amsa nî ǂganam, ǂoab kas khaoǃgâ. 13 ǃAruǀîts ge tsēkorobe ǀgui ūo ǀgui kurixa ǁkhaoba ǃKhūba ǁguibase nî ǁāǁāba; mâ ǁgoas hoasats ge ǁîba nî ǂhomi. 14 Tsîts ge ǂûǁguibase nî dīǀaro mâ ǁgoas hoas ai, ǃnaniǁî ǃâs efab dis tsî olib xa ǃnonaǁî ǃâs hinni disa, ǀgui tsampereb nî ǂnâ-aihega, ǂûǁguibas, ǃKhūba ǀamo ǂnûiǂgāse ra ǁguibahes ge nî ǁî hugaǀgui. 15 On ge ǁkhaob tsî ǂûǁguibas tsî olib tsîna mâ ǁgoas hoas ai hugaǀgui hâ khauǁguibase nî ǁāǁā.”
Gaoǀgôab tsî ǃhūb
16 Nētib ge ǃKhūb Eloba ra mî: “Gaosab ga ǀgôagu âb di ǀguiba ǀumis âb xa ǀkhaexū-e māo, o i ge ǀumis âb ase nî ī; ǀgôagu ge ǁî-e nî ūhâ, ǁî-i ge nî ǁîgu di ǀumis ase ī. 17 Tsî ǀumis âb xab ga ǃgāgu âb di ǀguiba ǀkhaexū-e māo, ǁnāb ge ǁî-e ǃnorakurib kōse nî ūhâ; ǃnubai i ge ǁî-e gaosab ǃoa ǁkhawa nî oa, ǁîb di ǀumis a xui-ao, ǀgôagu âb ge ǁîsa nî ūhâ. 18 Tsî gaosab ge ǀumis ǁaes dis xa xū-i xare-e ū tide, ūn hâna xub nî ǁîna ūǂuise; ǁîb di xūn ǂûn xab ge ǁîb di ôaga nî ǀumi kai, îs ti ǁaesa mâ-i hoa-i âsa tā ǁî-i ǀumisa xu ǀgaruǀgaruhe.”
Tempeli di xapan
19 ǁNās khaoǃgâb ge tita ǁga dao-ams xōǀkhā hâsa-u ǁnā ǃanu ǃnā-omdi, pristerga anuba hâdi, ǀapasǀî ǃoa hâdi ǃoa ge ūsī, tsî ǁnāpa i ge ǃkhai-e ge hâ i ǃnamkha hoakha ai huriǂoasǀî. 20 Ob ge tita ǃoa ge mî: Nēs ge ǁnā ǃkhais, pristergu ǁîs tawa ǀhapiǁguibas tsî ǁoreǁguibas tsîra nî sâisa, tsî ǁîs tawa gu nî ǂûǁguibasa amsa, ǃauga hâ ai-ommi ǃoagu ǁîra ūǂui tidese, ǁaesa gu nî khaise.
21 ǃNūbaib ge ǁîba tita ǃauga hâ ai-ommi ǃoa ge ūsī tsî haka ǁhôadi ai-ommi didi ǃnâ ge ǂgaeǂguima, tsî mû, mâ ǁhôas ai-ommi dis hoas ǃnâ i ge ai-omro-e ge hâ i. 22 Haka ǁhôadi ai-ommi didi ǃnâ gu ge ai-omroga ge hâ i, mâb hoab ge ǀgamdisi metergu gaxusiba ūhâ i tsî disikoroǀa metergu di ǂhababa ūhâga; ǁî haka ǁhôa-omrogu ge ǀgui ǀguirob ǀguib di ge i. 23 Tsî ǃgupu ǂnubiǂgoab ge ǁîgu ǂnamipe ge hâ i ǁî hakagu ǂnamipe, tsî sâiǃnâǃkhaidi ge ǃnaka ǃgupu ǂnubiǂgoagu ǂnamipe ge dīhe hâ i. 24 Ob ge ǁîba tita ǁga ge mî: Nēdi ge ǁnā sâiǃnâǃkhaidi, ommi di ǃoabasabegu nî ǁîdi ǃnâ ǁaes di ǂāǁguibasa sâide.
© Khoekhoegowab Elobmîs © Bible Society in Namibia, 2020.
