ǀUni mîdi Davidi didi
1 Davidi, Isaib ôab, ǀgapi ǃkhais ai ǂnûihe hâ khoeb, ǀnausabeb Jakob Elob dib, Israeli di ǃgâi ǁnaetsanadi xoa-aob di ǀuni mîdi ge nēde:
2 “Gagab ǃKhūb dib ge tita ǃnâ-u ge ǃhoa;
mîs âb ge ti amǁgaukha ai ge hâ i.
3 Israeli di Elob ge ge ǃhoa,
ǃGareǀuib Israeli dib ge tita ge mîba:
‘Gao-aob ǂhanu-aise khoen ǂama ra gaob,
eloǃaoǃgâxasib ǀkha ra gaob
4 ge ǁgoasores ǃnâb, ǃanu ǀhomaib dib khami ī;
sores ǀapib khaoǃgâ ǀgâna ra ǂkhai kais khami.’
5 “Elob ge ti suriba nî ǀkhae,
ǀamo ǃgaeǀhao-eb ge tita ǀkha dī amaga;
ǃgaeǀhao-i tātsē khôahe tide-i,
ǃgaeǀhao-i tātsē dī-unuhe tide-e.
Ti huib hoab; ti ǃgâiaǂgaob hoab
ge ǁîba xu ra hā.
6 Xawe eloxoresa khoen ge ǁkhūn hîa ra aoxūhen khami ī;
khoe-i xare-i ge ǁîna ǃommi ǀkha a ǃkhō ǁoa.
7 ǁÎnats ge ǀurib tsî ǁhâigôab ǀkha nî sîsenū,
tsîn ge ǀaes ǀkha nî ǂhubiǂuihe.”
Kaise ǂansa toroǃkhamaogu Davidi digu
(1 Kroniks 11:10-41)8 Nēdi ge kaise ǂansa toroǃkhamaogu Davidi digu di ǀonde: Joseb-Basebeti, Takemons dib ge ge ǃnonagu di ǃkhōdana-ao i. ǁÎb ge ǁhâigôab âb ǀkha ǁkhaisakaidisi khoegu ǃoagu ǃkham tsî ǁîgu hoaga ǀgui ǃkhams ǃnâ ge ǃgam.
9 ǁÎb khaoǃgâb ge Dodob, Ahohiǃhaos dib di ôab Eleasara ge hâ i. ǁÎb ge Filisteǁîgu ge ǃkhammi ǃaroma ǀhaoǀhaosen ǃnubai Davidi ǀkha ge hâ i. Israelǁîgu ge ǃkhoeni, 10 xaweb ge ǁîba mâ tsî Filisteǁîga ge ǃkhamǃoa, ǃommi âb ge ega sī gôab âba ǁnāxū ǁoas kōse. ǃKhūb ge ǁnātsē kai dansa ge mā. Toroǂnubis ge ǁnās khaoǃgâ ǀgui, ǁō hâga xu gu nî ǃnarise, Eleasari tawa ge oaǀkhī.
11 ǁÎb khaoǃgâb ge Ageb ôab Sammab, Harars diba ge hâ i. Filisteǁîn ge Lehis tawa, lensenn xa ǀoa hâ ǃhana-i hâpa ge ǀhao hâ i. Israeli toroǂnubis ge Filisteǁîga xu a ǃkhoeni, 12 xaweb ge ǁîba ǁnā ǃhanab tawa sī mâ, ǁîba ǁkhauba tsî Filisteǁîga ge ǃgam. ǃKhūb ge ǁnātsē kai dansa ge mā.
13 ǀGui ǃnā-e gu ge ǃnona khoegu, ǃnonadisi danakhoegu diga ǃgû tsî ǃgaos ǁaeb di tsoatsoas ǃnâ Adulamǁhoab tawa Davidi tawa ge sī. Filisteǁîgu ge hâǃkhaib âga Refaimǃgoaǃnāb ǃnâ ge ǂnaumâi hâ i. 14 ǁNā ǁaeb ǃnâb ge Davida ǃhommi ai ǁhoab ǃnâ ge hâ i tsî Filisteǁîn ge Betlehemsa ge ūbasen hâ i. 15 Ob ge Davida kaise ǁkhore tsî ge mî: “Tari-e ǁgam-e, ā ta nîga Betlehems di dao-ams tawa hâ tsauba xu nî hā-ūba te?” 16 O gu ge nē ǃnona, ǂansa toroǃkhamaoga Filisteǁîgu di hâǃkhaib ǃnâ-u ǃkharu tsî Betlehems di dao-ams tawa hâ tsauba xu ǁgam-e sī xuri tsî Davida ge hā-ūba. Xaweb ge Davida ǁî-e ā ǂgao tama i tsî ǁguibas ase ǃKhūba ǂnâǂuiba 17 tsî ge mî: “ǃKhūtse, as ǁnāsa tā ī, ǁî-e ta nî āsa. Nē khoegu, ûib âga ǃaorosasib ǃnâ mâi tsî go ǃgûgu di ǀaoba ās ǁkhās khamis ge nē ǃkhaisa i.” ǁNā-amagab ge ǁî-e ā ǂgao tama ge i.
Nē ǃkhaisa gu ge ǁnā ǃnona ǂansa toroǃkhamaoga ge dī.
18 Joab di ǃgâsab Abisaib, Serujas ôab ge nē ǃnonadisigu di ǃkhōdana-ao ge i. ǁÎb ge ǁhâigôab âb ǀkha ǃnonakaidisi khoega ge ǃgam; tsîb ge nē ǃnonadisigu ǃnâ kaise ge ǂansa i. 19 Nē ǃnonadisigu ǃnâb ge kaise ǃgôasa i, tsî ǁîgu ǂgaeǂgui-ao kai, xaweb ge nau ǃnonagu a ǂansa kōse ge ǂansa tama hâ i.
20 Jojadab ôab, Benajab ǃās Kabseels dib on ge ǂansa toro-ao ge ib, ǂgui ǁkhoaǂgaoxa dīga gere dība. ǁÎb ge ǀgam ǀgaisa Moabǁîkha ge ǃgam. ǁKhātib ge tsamaroxa tsēs ai tsaub ǃnâ ǁgôa tsî xamma ge ǃgam. 21 ǁÎb ge ǁkhāti kaimâ Egipteǁîb, ǁhâigôaba ge ǃomǁae ūhâ iba ge ǃgam. Benajab ge ǁîba haib ǀkha ǃgûǃoa, ǁhâigôaba ǃommi âba xu tsubuǂui tsî ǁîb di ǁhâigôab ǂûb ǀkha ge ǃgam bi. 22 Nēnab ge Jojadab ôab, Benajaba ge dī tsîb ge nē ǃnonadisigu ǃnâ kaise ge ǂansa i. 23 ǁÎb ge nē ǃnonadisigu ǃnâ ge mâǂoa hâ i, xaweb ge nau ǃnonagu kōse ge ǂansa tama hâ i. Davidi ge ǁîba ra ǃûi khoegu di mûǂamaose ge mâi bi.
24-39 Joab di ǃgâsab Asaeli ge ǃnonadisigu ǃnâ ge hâ i,
tsî ǁkhāti Elhananni, Dodob ôab, Betlehems dib;
Sammab, Harods dib; Elikab, Harods dib;
Helesi, Pelets dib; Irab, Ikeb ôab, Tekoas dib;
Abieseri, Anatots dib; Mebunaib, Husas dib;
Salmonni, Ahohis dib; Maharaib, Netofas dib;
Heleb, Baanab ôab, Netofas dib;
Ittaib, Ribaib ôab, Gibeas Benjaminni ǃnâ ǂnôas dib;
Benajab, Piratons dib; Hiddaib, Gaas ǃgoaǃnāgu dib;
Abi-Albonni, Arbas dib; Asmaveti, Bahurims dib;
Eljaxbab, Saalbons dib; Jasenni ôagu, Jonatanni,
Sammab, Harars dib; Ahiammi ôab, Sarari Harars dib;
Elifeleti, Ahasbaib ôab, Maakas dib; Eliammi, Ahitofeli ôab, Gilos dib;
Hesrob, Karmels dib; Paaraib, Arabs dib;
Jigali, Natanni ôab, Sobas dib; Banib, Gads dib;
Seleki, Amonǁîb; Naharaib, Serujas ôab, Joab di ǁâtanin tani-aob, Beerots dib;
Irab, Jeters dib; Gareb, Jeters dib;
Uriab, Hetǁîb tsîga.
ǀHaob ai gu ge ge ǃnonadisihûǀa i.
© Khoekhoegowab Elobmîs © Bible Society in Namibia, 2020.
