2 Kroniks 34 - Khoekhoegowab New Translation 2020 (KKG20)

Judab gao-aob Josiab

1 Josiab ge disiǁkhaisaǀa kurixab a hîa Judab di gao-ao kai tsî ǃnonadisiǀguiǀa kuriga Jerusalems ǃnâ gere ǂgaeǂgui. 2 Josiab ge ǃKhūba a ǃgâibana gere dī; ǁîb ge ǁîb aboxab, gao-aob Davidi aiǁgausa gere sao tsî Elob ǂhanuba hoaragase ge ǁnâuǀnam hâ i.

Josiab ge ǀūben di ǀgoreǀîǃkhaide ra hîkākā

3 ǁKhaisaǁî kurib ǁîb ǂgaeǂguis dib ǃnâb ge Josiaba, noxopab a ǂkham hîa, ǁîb aboxab gao-aob Davidi Eloba ge ǃoabatsoatsoa. Haka kurigu khaoǃgâb ge ǁîba ǀūben di ǀgoreǀîǃkhaidi, ǁgôa-elos Aseras īgu tsî nau ǂnâhesa ǁgôa-elo-īgu hoagu tsîna, Judab tsî Jerusalems tsîra ǃnâ ge hîkākātsoatsoa. 4 ǁÎb kōǃgâs ǃnaka di ge Baali altarde khôaǂkhūhe tsî ǁîdi ǀgapika ge hâ i ǀanǀanaltarde ge khôaǁnâhe. Aseras īgu tsî nau ǂnâhesa īgu tsîga tsarab kōse ǂkhūǂkhū tsîn ge tsaraba, ǁîga gere ǀgoreǀî khoen di ǀhobadi ai ge tsoroxū. 5 ǀŪben pristergu di ǂkhōnab ge ǁîgu gere ǀgoreǀî-ai altardi ai ge khauǃkhū. ǁNātib ge Judab tsî Jerusalems tsîra ge ǃanuǃanu. 6 ǁKhās ǁkhāsab ge Manaseb, Efraimmi tsî Simeonni ǃādi tsî hîkākāsa ǀkharigu tsîn ǃnâ ge dī, Naftalib, ǀapasǀkhāb ǃnâ ǁgoeb kōse. 7 Hoaraga Israeli ǃnâb ge altardi tsî Aseras īgu tsîna khôaǂkhū, īga tsarab kōse xontsautsau tsî ǀanǀanaltarde ge khôaǃā. ǁNās khaoǃgâb ge Jerusalems ǁga ge oa.

ǂHanub di ǂkhanis ge ra hōhe

(2 Gao-aogu 22:3-20)

8 Disiǁkhaisaǀaǁî kurib ǁîb ǂgaeǂguis dib ǃnâ, ǃhūb tsî Tempeli tsîkhab ge ǃanuǃanus khaoǃgâb ge gao-aob Josiaba Asaliab ôab Safanni, Jerusalems ǂgaeǂgui-aob Maasejab tsî ǀgapi ǂamkhoeb Joaxi, Joahasi ôab tsîga Tempeli ǁga ge sî, ǃKhūb Elob di Tempela gu sī nî dī-unuse. 9 Leviǁî ǃûi-aogu ge Tempeli ǃnâ ǀhaoǀhao hâ i mari-eb ge ǀgapipristeri Hilkiaba ge māhe. ǁÎ-i ge Manaseb tsî Efraimmi tsî nau ǃâb Israeli dib di khoen, Judab tsî Benjaminni tsî Jerusalems di khoen tsîna xu ge ǀhaoǀhaohe hâ i. 10 ǁNā mari-e gu ge Tempela dī-unus ǁguiǂamsa ūhâ khoega ge māhe tsî gu ge ǁîga, 11 ǁî-e ǃnaokuru-aogu tsî omaogu tsîga ge mā, îgu Judab gao-aogu ǂgaeǂguis ǁaeb ǃnâ ge ǀorotoa omgu nî dī-unu-ūhe ǀuidi tsî hain tsîna ǁama. 12 Nē sîsenna gere dī khoegu ge hoaragase ge ǂhauǃnâ i. ǁÎgu ge haka Leviǁîgu, Jahati tsî Obadjab tsîkha Merariǁîn dikha tsî Saxariab tsî Mesulammi Kohatǁîn dikha tsîgu xa gere mûǂamhe. Leviǁîgu hoagu ge ǀkhōxūna, ǃgâise ge ǀkhō ǁkhā i. 13 ǀNî Leviǁîgu ge omūxūn di tani-aogu tsî ǃkharagaǃnâgu sîsenna ra dī khoegu tsîn ǂama mûǂamsa ge ūhâ i; ǀnîgu ge xoa-aose tamas ka io dao-amdi ǃûi-aose gere ǃoaba.

14 Mari-e gu sâuǃnâ-omma xu ra ūǂui, hîab ge Hilkiaba, ǃKhūb ǂhanub di ǂkhanis, ǃKhūb ge Moseba mā hâ i ǂhanub disa ge hō. 15 Ob ge Hilkiaba Safanna ge mîba: “ǂHanub ǂkhanisa ta ge Tempeli ǃnâ go hō.” ǁÎb ge Safanna ǂkhanisa ge mā 16 tsîb ge Safanna ǁîsa gao-aob tawa ge sī-ū. ǁÎb ge ǁkhāti gao-aoba ge ǂanǂan: “Sats go mîmā ge xūn hoana ge ge go dī. 17 Tempeli ǃnâ go hâ i mari-e ge ge ūǂui tsî sîsenaogu tsî ǁîgu di mûǂamaogu tsîga go mā.” 18 Tsîb ge Safanna ǃaruǀî “Nēpa ta ge Hilkiab go mā te ǂkhani-e ūhâ” ti mî tsî gao-aoba ǁîsa xu ge khomaiba.

19 Gao-aob ge ǂkhanis ǃnâ a xoasa mîdeb ge ǁnâu, o ǃhuri tsî saran âba ǀkhau 20 tsî prister Hilkiab tsî Safanni ôab Ahikammi tsî Mikajab ôab Abdonni tsî xoa-aob Safanni tsî gao-aob di ǂamkhoeb Asajab tsîga ge mîmā: 21 “ǃGû, î nē ǂkhanis ǃnâ mā mîdi ǂama, tita tsî Israeli tsî Judab tsîkha ǃnâ ǃgau hâ khoen tsîda ǃKhūb tawa sī ǀape-ôaba. ǃKhūb ge sida ǀkha ǁaixa hâ, sida aboxagu ge nē ǂkhanis, dī da nîsa ra ǂgaoǀkhā da xūna dī tama i amaga.”

22 O gu ge Hilkiab tsî nau khoegu gao-aob digu tsîga kēbo-aos Huldas, ǀasa ǃâs Jerusalems dis ǃnâ ge ǁan hâ is ǁga ge ǀape-ôaǃgû. (ǁÎs aob Salummi, Tikwab ôa tsî Harhab ǁnurib ge Tempelsaran ǂama ge mûǂamao i.) ǁÎgu ge ī ge xūna a mîǃāba si, 23 os ge ǁîsa ǁîga ge mîba, î gu gao-aob ǃoa oa tsî ǁîba 24 sao ra ǂhôas ǃKhūba xu hâsa sī mîba: “Tita ge Jerusalems tsî ǁîs di ǁanǂgāsaben tsîna gao-aob go khomaibahe ǂkhanis ǃnâ i a xoamâisa khami nî ǁkhara. 25 ǁÎn ge tita ǁnāxū tsî ǀkhara eloga ǁguibade gere hā-ūba, tsîn ge dīn ge xūn hoan ǀkha tita ge ǁaiǁai. Tita ge Jerusalems ǂama kaise ge ǁaixa tsîb ge ti ǁaiba toa tide. 26 Tsî gao-aob xasa, nēti ta ge tita ǃKhūta, Israeli Elota ra mî: Sats ge ǂkhanis ǃnâ a xoasa mîde go ǃgaoǃgâ. 27 Sats ge ǃhobasen tsî ti aiǃâ ǃgamǃgamsen tsî saran âtsa ǀkhau tsî go ā, mâti ta Jerusalems tsî ǁîs ǁanǂgāsaben tsîna ra ǁkhara ǂgao ǃkhaisats go ǁnâuo. Tita ge sa ǀgoresa go ǁnâu 28 tsîb ge nē ǁkharab Jerusalems ǂama ta nî hā-ūba, sa ǁōb khaoǃgâ ǀgui nî ī. Sats ge ǂkhîb ǃnâ nî ǁō.”

O gu ge ǁîga gao-aob Josiab ǁga nē ǂhôas ǀkha ge oa.

Josiab ge ǃKhūba ǁnâuǀnamsa ra mîmâi

(2 Gao-aogu 23:1-20)

29 Gao-aob Josiab ge hoaraga ǂgaeǂgui-aogu Judab tsî Jerusalems tsîra diga ǂgaiǀhao, 30 tsî ǁîgu hoagu tsî pristergu tsî Leviǁîgu tsî nau khoen, ǃkhū hân tsî ǀgâsan tsîn hoan ǀkha Tempela ǃoa ge ǃgû. Tsîb ge gao-aoba ǁîn hoana, ǃgaeǀhaos ǂkhanis Tempeli ǃnâ ge hōhes hoaragasa ge khomaiba. 31 ǁÎb ge ǂkhâǃnâhaib tawa mâse ǃgaeǀhao-e ǃKhūb ǀkha dī tsî ge mîmâi, ǃKhūba ǁnâuǀnam, ǁîb ǂhanugu tsî mîmādi tsîna hoaraga ǂgaob tsî ǀoms ǀkha ǃkhōǀgaipe, tsîb ǃgaeǀhaos ǂkhanis ǃnâ a xoasa xūna, ǂkhanis ǃnân a xoamâisa khami nî dīsa. 32 Tsîb ge hoaraga khoen Benjaminni din tsî Jerusalems ǃnâ ge hâ in tsîn hoana, nē ǃgaeǀhaosan nî ǃkhōǀgaipe ǃkhaisa ge mîmâi kai. Tsîn ge Jerusalems ǁanǂgāsabena, ǃKhūb, ǁîn aboxagu di Elob ǀkhan ge dī ǃgaeǀhaos di ǂgaoǀkhāde ge ǁnâuǀnam. 33 Gao-aob Josiab ge hoaraga ui-uisa īgu, Israelǁîn di ǃhūb ǃnâ ge hâ igu hoaga ge hîkākā, tsîb ge ǁîb di ûitsēdi hoaden ǃKhūb, ǁîn aboxagu di Eloba nî ǃoabasa ǁîna ge ǂgaoǀkhā.