2 Kroniks 35 - Khoekhoegowab New Translation 2020 (KKG20)

Josiab ge Pasxaba ra tsēdī

1 Gao-aob Josiab ge Pasxaba ǃKhūb di ǃgôasiba ǃoa Jerusalems ǃnâ ge tsēdī. Tsîn ge disihakaǀaǁî tsēs ǂguro ǁkhâb dis ai Pasxaǁkhaoga ge ǂā. 2 Gao-aob ge pristerga Tempeli ǃnâ gu nî dīse ī ǃoabadi di ǁguiǂamde mā tsî ǁîga ge ǁkhoaǂgaoxa kai, nē ǃoabasa dīs ǃoa. 3 ǁÎb ge ǁkhāti Leviǁîgu, hoaraga Israela gere ǁgauǃnâgu, ǃKhūba ge khaibahe hâ igu ǃoa ge mî: “ǃAnu ǃGaeǀhaos ǂGaesa, Davidi ôab gao-aob Salomob ge kuru Tempeli ǃnâ mâi. ǁÎsa go nî tanima ǃkhais ge ǃaruǀî ǂhâbasa tama hâ, nēsi go ge ǃKhūb, sadu Elob tsî ǁîb ǁaes, Israels tsîna nî ǃoaba. 4 Sago ǃhaoǃnādi ǃnâ, gao-aob Davidi tsî ǁîb ôab Salomob tsîkha xoaǁgui hâ ǀgoraǂgāde ǃoa, sago mâǃkhaide Tempeli ǃnâ ū, 5 î go ǁnāti ǀgoraǂgāsen, mâ ǃhaoǃnās Israelǁîn dis hoasab, ǀguib sago diba nî hui ǁkhāse. 6 Pasxaǁkhaoba ǂā, î go ǃanuǃanusen tsî ǁguibade ǂhomi, sago ǃgâsa Israeǁîn ǃKhūb ge Moseb ǃnâ-u a mā ǁguiǂamde nî dī ǁkhāse.”

7 Pasxab tawa ge ǀhao hâ i ǁaes ǃaromab ge gao-aob Josiaba ǃnonadisiǀoadisi ǁkhaon tsî ǂkham piriron tsî ǃnonaǀoadisi ǁgōgu tsîna, ǁîb di ǂgāriba xu ge mā. 8 ǁÎb di ǂamkhoegu tsîn ge māsenxase, khoen tsî pristergu tsî Leviǁîgu tsîn ǃaroma ge mā. Hilkiab, Saxariab tsî Jehieli tsîgu ge ǀgamǀoadisi tsî ǃnanikaidisi ǁkhaon tsî ǂkham piriron tsî ǃnonakaidisi ǁgōgu tsîna Pasxaǁguibadi ǃaroma pristerga ge mā. 9 Leviǁîgu di ǂgaeǂgui-aogu, Konanjab tsî ǁîb ǃgâsakha Semajab tsî Netanel hâkha, Hasabjab, Jeieli tsî Josabadi tsîgu ge ǁkhāti koroǀoadisi ǁkhaon tsî ǂkham piriron tsî korokaidisi ǁgōgu tsîna Leviǁîga Pasxaǁguibadi ǃaroma ge mā.

10 Pasxab di xūn hoan ge ǂhomitoahe, o gu ge pristergu tsî Leviǁîgu tsîga ǁîgu mâǃkhaide ge ū, gao-aob ge mîmā hâ i khami. 11 Pasxaǁkhaogu tsî pirigu ge ǂāhe, o gu ge pristerga ǀaoba ū tsî altars ai ge ǀgapi tsî Leviǁîgu ge ǁîga ge ǂāǁnâǀkhā. 12 ǁNās khaoǃgâ gu ge ǁîga, mâ ǃhaoǃnās hoasa khauǁguibas ǃaroma ge ǀgoraba, în ǁîga ǂhanub ǂkhanis Moseb dis ǃnâ i a xoaǁguisa khami ǃKhūba ǁguiba. ǁNās ǁkhāsan ge ǁgōgu tsîn ǀkha ge dī. 13 Leviǁîgu ge Pasxaǁguibade xoaǁguigu ǃoa ǀaes ai ge am, tsî nau ǃanu ǁguibade gu ge sūdi tsî pandi ǃnâ sâi tsî ǃhaese khoena ge ǀgoraba. 14 ǁNās khaoǃgâ gu ge Leviǁîga ǁîgu tsî Aronni surib di pristergu tsîga ǁgan-e ge ǂhomiba, pristergu ge tsuxub kōse khauǁguibadi tsî kaub tsîna ǁguibas ǀkha sîsenxa i xui-ao. 15 Leviǁî ǁnae-aogu Asafi surib digu, Asafi, Hemanni tsî gao-aob di kēbo-aob Jedutunni tsîgu ge Davidi di mîmāde ǃoa, ǁîgu mâǃkhaidi ai ge mâ i. Tempeli dao-amdi ǃûi-aogu ǁnāpa xu nî ǃgû ǃkhais ge ge ǂhâbasa tama hâ i, nau Leviǁîgu ge ǁîga Pasxaba gere ǂhomiba xui-ao. 16 Hoaraga xūn ge ǁnātsē, ǃKhūba ǃoabas ǃaroma, gao-aob Josiab ge mîmā khami ge dīhe; Pasxaǁâudība tsēdīs tsî khauǁguibade altars ai ǁguibas tsîna. 17 Hû tsēdi ǁaeban ge Israelǁîn ǁnāpa ge ǀhao hâ ina Pasxab tsî Khūkhū-e ūhâ tama Pere-i Kaitsēs tsîna ge tsēdī. 18 Kēbo-aob Samueli tsēde xub ge Pasxaba nēti ge tsēdīhe tama hâ i. Aiǃâ ge hâ i gao-aogu di ǀguib tsîn ge Pasxaba, nēb ge gao-aob Josiab, pristergu, Leviǁîgu, hoaraga khoen Judab tsî Israeli tsî Jerusalems tsîn din xa tsēdīhe khami ge tsēdī tama hâ i. 19 Nē Pasxab ge disiǁkhaisaǀaǁî kurib Josiab ǂgaeǂguis dib ǃnâ ge tsēdīhe.

Josiab ǂgaeǂguis di ǀams

(2 Gao-aogu 23:28-30)

20 Gao-aob Josiab ge nē xūn hoana Tempeli ǃaroma dīs khaoǃgâb ge Egipteb gao-aob Nekoba, Karkemis, Eufratǃāb tawa ǁgoes tawab sī nî ǃkhamse toroǂnubisa ge ǂgaeǂguiǂoa. Josiab ge Egipteb toroǂnubisa gere ǁkhae ǂgao, 21 xaweb ge Nekoba Josiaba nēti ge haisiba: “Nē ta ra ǃkham torob ge sats ǀkha dīxū-e ūhâ tama hâ, Judab di gao-aotse. Tita ge sats ǀkha ta nî ǃkhamse hā tama hâ, xawe ti khākhoen ǃoagu ta nî ǃkhamse go hā. Elob ge go mîba te, î ta ǃhaese dī. Elob ge tita ǀkha hâ, xuige tā tita mâǃoa, îb ǁîba tā hîkākā tsi.” 22 Xaweb ge Josiaba ge ǃkham ǂgaoxa i. ǁÎb ge Elob ra Nekob ǃnâ-u mîba bina ǃgâ ǂgao tama i tsî ǀkharaǀkharasen tsî Megidos ǂgāb ai nî ǃkhamse ge ǂoaxa.

23 Torob ǃnâb ge gao-aob Josiaba Egipteb ǁkhâu-aogu xa ge ǁkhâuhōhe. Ob ge ǁîb ǃgāga ge mîmā: “Nēpa xu ūǂui te, kaise ta go tsuihe xuige.” 24 O gu ge ǁîga kunisa xu ge ūǂui tsî ǀgamǁî kunis âb ǃnâ ǃnao bi tsî Jerusalems ǁga ge ǃgû-ū bi. Tsîb ge ǁnāpa ǁō tsî gao-aogu di ǀhobas ǃnâ ge ǁkhōhe. Hoaraga khoen Judab tsî Jerusalems tsîra din ge ǁîb ǂama ge ǃoa.

25 Tsîb ge kēbo-aob Jeremiaba ǃgaetsanasa Josiab ǂama ge xoa. Tsîs ge nēsa Israeli ǃnâ ǂnûiǂgās ase i, hoaraga ǁnae-aogu tsî ǁnae-aodi tsîn ǁîb ǂaman ra ǃoao, nē ǁnaetsanasa ra ǁnaesa. Nē ǁnaetsanas ge ǃGae-amdi ǃnâ a xoamâisa.

26 Josiab ge dī xūn hoan, ǃKhūbab ge ǂgomǂgomsaba is, ǂhanubab ge ǁnâuǀnam hâ is 27 tsî ǁîb di ǃnaeǃkhaidi tsoatsoasa xu ǀunis kōse ǁîn hoan ge ǃNaeǃkhaidi ǂKhanis Israeli tsî Judab Gao-aogu dis ǃnâ a xoamâisa.