ǃKhūb di hās ǃaroma ǂhomisen hâse hâ re
1 Xawe ǃgâsado, ǁaegu tsî kamagu nē xūn nî īgu xa ta nî sado xoaba ǃkhais ge ǂhâbasa tama hâ, 2 sadu aitsama ǂan xui-ao, ǃKhūb di tsēb nî ǃnari-ao-i khami tsuxuba hā ǃkhaisa. 3 Tsî ǁîn ga “ǂKhîb tsî ǃnorasasib ge hâ” ti mî, ob ge ǁnātimîsi hîkākāba ǁoratsûb ǀgamǀkhā taras dib khami ǁîna nî hāǂam tsîn ge ǁîna nēsa ǁhâxū tide. 4 Xawe ǃgâsado, sadu ge ǃkhaenab ǃnâ hâ tama hâ, tsēs sado ǃnari-ao-i khami ǃâubasen tama du hâse hāǂam tidese. 5 Sadu hoadu a ǃnâb di ôa tsî tsēs di ôa amaga. Sada ge tsuxub tamas ka io ǃkhaenab di tama hâ. 6 ǁNā-amaga a da tā ǁnâi naun khami ǁom, xawe a da ǂkhaikari tsî ǃgāsase hâ. 7 ǁNān ǁom hân kom tsuxuba ra ǁomo, tsî ǁnān hîa ra ǀhoron kom tsuxuba ra ǀhoro-o. 8 Xawe sada tsēs dida, a da ǃgāsase ī, î da ǁkhaiǁkhausarab* ǂgoms tsî ǀnammi diba ǂgaeǂgāsen tsî toroǀgapas ase, sada ǃgâiǃōsib di ǃâubasensa. 9 Elob ge sada ǁîb ǁaib ǃoa mâi tama xawe ǃgâiǃōsiba da nî hōse, sada ǃKhūb Jesub Xristub* ǃnâ ge mâi, 10 ǁîb hîa sada amǃnâs ai ge ǁōba, ǁom da kas, ǂkhaikari da ga hâs hoasa da ǁîb ǀkha nî ǀhûpe ûise, ǁîb ga hāo. 11 ǁNā-amaga ǀgaiǀgaiǃnâgu, î ǂkhâkhâigu ǀnai du ra dī khami.
ǀUni ǁguiǂamdi tsî tawededi
12 ǀKhoma du ge ge ra, ǃgâsado, ǁnān hîa sadu ǁaegu ra sîsen tsî sado ǃKhūb ǃnâ ǂgaeǂgui tsî ǂgōǀauna ǂan re. 13 Î ǁîna kaise ǃnāǂamsase ǀnammi ǃnâ ǃgôa ǁîn di sîsenni ǃaroma. Î du ǂkhîb ǃnâ ûi-ūgu re.
14 ǂGan du ge ge ra ǃgâsado, î du ǀopesana ǂgōǀau, ǂkhabuǂâi hâna ǁkhaeǂgao, ǂkhabusana ǂkhâǃnâ, î du hoan ǃoagu ǃnūǃnâxa. 15 Mûǂam, î-i tā khoe-i xare-e tsūba tsūb ǀkha mādawa-am, xawe hoaǁae ôa-am sadu ǁaegu tsî hoan ǃaroma ǃgâise dīsa.
16 Hoaǁae ǃgâiaǂgao, 17 ǀûs ose ǀgore re, 18 hoa xun ǃnâ gangan re, nēs a Elob di ǂâi Xristub Jesub ǃnâ, sadu ǂama xuige.
19 Gagaba tā ǀari; 20 kēboside tā ǃharaxū, 21 xawe xūn hoana ǃâitsâ, î ǃgâina ǃkhōǀgara, 22 mâ ǂkhabaǃnôa-i hoa-e xu ūdabasen.
23 Ab nēsi ǂkhîb di Eloba ǀoasasib ǃnâ ǃanuǃanu du tsî sadu di hoaraga gagas tsî ǀoms tsî soros tsîna ūose sâu, sada ǃKhūb Jesub Xristub di hās ǃnâ. 24 ǂGomǂgomsab ge a ǁnāb sado ra ǂgaiba, ǁîb ǁnāsa nî dība.
25 ǃGâsado, sige tsîna ǁkhāti ǀgoreba re.
26 Hoa ǃgâsana ǃanu ǁoas ǀkha tawede re.
27 ǀKhoma du ta ge ra ǃKhūb di ǁkhāsib ǃnâ, nē sîǂkhanisa du nî hoaraga ǃgâsana khomaiba ǃkhaisa.
28 ǀKhommi sada ǃKhūb Jesub Xristub diba ab sadu ǀkha hâ re.
© Khoekhoegowab Elobmîs © Bible Society in Namibia, 2020.
