ǂHanu-aisib di ǀgores
1 ǃKhūtse, tare xū-i ǃaromats kha ǃnūse mâ?
Tare-i ǃaromats ǂōǂōsib ǁaeb ǃnâ ra gaugausen?
2 ǁÎn ǂnīsasib ǃnân ge ǂkhabadī-aona ǀgâsana ra ǃgôaǃgon
an ǁîn ǂûn ǂnûi hâ ǃnuidi xa ǃkhōhe.
3 ǂKhabadī-aon ge ǁîn di ǂkhaba turagu ǀkha ra koasen.
Xūǃgunuxan ge ǀâxareba ǃkhōǃoa tsî ǃKhūba ra ǃharaxū.
4 ǂKhabadī-aon ge ǁîn ǀgapiǂâixasib ǃnâ nēti ra ǂâi:
“Elob ge ǃeream-e ǂgaoǀkhā te tide.”
ǁÎn di ǂâidi ǃnâb ge Eloba a ǀkhai.
5 ǁÎn ge ǂâibasenn ra xūn hoan ǃnâ ra ǃgâiǃgâ,
sa ǀgoraǃgâdi ge ǁîna xu kaise a ǃnū.
ǃGôaǁnâs asen ge khākhoen ân ai ra ǂara.
6 ǂGaogu ân ǃnân ge ra mî:
“Tātsēs tsîna da ge tsūǃgâ-i ǃnâ ǂgâ tide.”
7 Ams â-i ge ǀâxareb tsî ǂhumib xa ǀoa hâ,
nams â-i ǃnaka ǂkhabasib tsî ǁgauoǃnâsib tsîkha.
8 ǀHôagaosen huio khoen ǃaroma ǃnuide ǃārodi ǃnâ ra ǁgui;
tsî ǂganǃgâsa ǃkhaidi ai ǀhapio khoena ra ǃgam
tsî di ge mûdi âna ǀkhomǀkhomsana ra ǃkhē.
9 Gauǃkhais ân ǃnân ge xam-i khami
ǀgâsan di ǃkharusa ǃâuǁgoe
tsî ǁîna ǃnuis ân ǃnâ ǃkhō tsî ra ǃkharabē.
10 Tsî i ge nē huio khoe-e ǂkhū tsî ra ǁnā
nē ǀgaiǀkhā-i xa danhe tsî.
11 ǂKhabadī-aon ge ǂgaogu ân ǃnâ
“Elob ge ǀuru hâ, tsî ais âba gaugau hâ,
tsî ǁkhawa mû tide” ti ra ǂâi.
12 Khâi re ǃKhūtse! Nē ǂkhabadī-aona ǁkhara re!
Îts ǁgâiǀāhe hâna tā ǀuru.
13 Mâtin kha ǂkhabadī-aona Eloba mîǁnâ tsî
“ǁÎb ge ǁkhara te tide” ti ǂgaogu ân ǃnâ ra mî?
14 Xawets ge satsa ǂōǂōsib tsî ǃoab tsîkha ra mû,
tsîts ge ǁîkha ra dībē.
Huio khoen ra sats ai mûmâinǃgâ,
tsîts ǃguniǀgôana ǁgûse ība.
15 Khôaǃā re ǁnā ǂkhabadī-aon di ǀgaiba,
î tsūdīb ân ai ǁîna ǁkhara re,
ôats ka xawets ǁkhawa hō tides kōse.
16 ǃKhūb ge ǀamose a gao-ao.
ǀŪben ge ǃhūbaiba xu nî kā.
17 ǃKhūtse, ǃgamǃgamsensan di ǀgoresa ǁnâu
tsîts ge ǁîna nî ǀgaiǀgai.
18 ǁGâiǀāhe hân tsî ǃguniǀgôan di āsa ǁnâu
tsîts ge ǁîn ǃgâib ǃoa nî ǀgoraǃgâ,
îb ǁō ǁkhā khoesiba tā ǃaruǀî ǁîna ǃaoǃao.
© Khoekhoegowab Elobmîs © Bible Society in Namibia, 2020.
