Huib ǃaroma hâ ǀgores
ǁNaetsanas
Koraxi ôagu di Psalms
ǁNaeǃnans ǂgaeǂgui-aob ǃoa Maxalat-Leanots ǃoa
Hemanni, Esraǁîb di koatsanas
1 ǃKhūtse, ti ǃgâiǃōsib di Elotse
tsēa tsî tsuxuba ta ge sats ǃoa ra ǂgai.
2 As ti ǀgoresa sa aiǃâ sī re
sa ǂgaesa ti ǀkhomabasens ǃoa ǂō re.
3 Ti ǀoms ge tsūǀkhāgu xa ǀoa hâ
tsî ti ûib ge ǁŌhân Hâǃkhaib ǃoa ra ǀgū.
4 ǁNān āb ǃnâ ra ǁgôan tawa ta ge tita ǃgôahe hâ;
huio khoe-i khami ta ge ge ī.
5 ǁŌ hân ǁaegu khaihe hâ-i khami;
ǃgamhe hân, ǀhobas ǃnâ ǁgoen,
sats ǁîn xa ǃarulî ǂâi taman,
tsî sa ǃomǃnāba xu ǃgaoǁnâhe hân khami.
6 Sats ge tita ǃgam āb ǃnâ ge ǂgā
ǃkhae ǃgammi ǃnâ.
7 Sa ǁaib ge tita ai hâ
tsîts ge ǃgabigu âts ǀkha ra ǁgâiǁgui te.
8 Ti ǂansabenats ge satsa tita xu ǃnūse ge dībē
sats ge tita ǁîna ǃharaxūxūse ge dība.
Tita ge ǂganamǂgāhe hâ, tsî ta ge a ǂoa ǁoa;
9 ti mûra ge sa ǁgâiǀāb xa ǃoa hâ.
Sats ǃoa ta ge tsūǀkhāb ǃnâ ge ǂgai
ǃKhūtse tsēkorobe ta ge ti ǃomkha sats ǃoa ge ǀhōǂui.
10 ǁŌ hâna buruxa sîsenga dībats nî?
Tamas ka io khâi gu nî?
ǁÎna xare gangan tsin nî?
11 ǀHobas ǃnâ sa hâhâ ra ǀnamma kha ǃgôaheb nî
sa ǂgomǂgomsasiba Abadonni ǃnâ hâb a?
12 ǃKhaenab ǃnâ sa buruxa sîsenga ǂanhe gu nî
tsî sa ǂhanu-aisiba ǀurusib di ǃhūb ǃnâ?
13 Sats ǃoa ta ge ra ǂgai ǃKhūtse
ti ǀgores ge ǃnauǁgoaga sats tawa ra sī.
14 ǃKhūtse tare-i ǃaromats kha ra ǂhara te?
Tare-i ǃaromats sa aisa tita xu ra gaugau?
15 Tita ge a ǂkhabusa tsî ta ge ra ǁōǁga ti ǂkhamsisa xu,
sa ǃaoǃaode ta ge ra tani, tsî ta ge ra ǂkhabu.
16 Sa ǁaixasigu ge tita ge īǂam
sa ǃhuriǃhuridi ge ge hîkākā te.
17 Hoaraga tsēsan ge ǁgam-i khami tita ge hâǂnami
hoatsaman ge ti ǂnamipe ge ǀhao.
18 Sats ge tita ǀnam hâna tita xu ǃnūse ge dībē,
ǃkhaenab ǀguib ge tita hâba.
© Khoekhoegowab Elobmîs © Bible Society in Namibia, 2020.
